ଭୁବନେଶ୍ୱର,୨୩ା୪(ବ୍ୟୁରୋ): ଚଳିତବର୍ଷ ବିଦ୍ୟୁତ ଶୁଳ୍କ ବଢ଼ିବ ନାହିଁ। କରୋନା(କୋଭିଡ୍-୧୯) ମହାମାରୀ ମୁକାବିଲା କରୁଥିବା ରାଜ୍ୟବାସୀଙ୍କ ଉପରେ ଓଡିଶା ବିଦ୍ୟୁତ ନିୟାମକ ଆୟୋଗ(ଓଇଆର୍ସି) ଏବେ ଆଉ ଶୁଳ୍କ ବୋଝ ଲଦିବାକୁ ଚାହୁଁ ନାହାନ୍ତି। ୨୦୨୦-୨୧ ଆର୍ଥିକ ବର୍ଷ ପାଇଁ ଓଇଆର୍ସି ବିଦ୍ୟୁତ ଦରକୁ ଅପରିବର୍ତ୍ତିତ ରଖିଛନ୍ତି। ଏନେଇ ଓଇଆର୍ସି ପକ୍ଷରୁ ବୁଧବାର ବିଜ୍ଞପ୍ତି ପ୍ରକାଶ କରାଯାଇଛି। ଓଇଆର୍ସିଙ୍କ ଏହି ନିଷ୍ପତ୍ତି ଘରୋଇ ଉପଭୋକ୍ତାଙ୍କୁ ଆଶ୍ୱସ୍ତ କରିଛି। ଏହି ନୂତନ ନିର୍ଦ୍ଦେଶନାମା ଆସନ୍ତା ମେ’ ପହିଲାରୁ ରାଜ୍ୟରେ ଲାଗୁ ହେବ। କରୋନା ସଂକ୍ରମଣ ଆଶଙ୍କାରେ ଛଟପଟ ହେଉଥିବା ବିଦ୍ୟୁତ ଉପଭୋକ୍ତାଙ୍କ ପାଇଁ ଓଇଆର୍ସି ରିଟେଲ ସପ୍ଲାଇ ତାରିଫ(ଆର୍ଏସ୍ଟି) ଏବଂ ବଲ୍କ ସପ୍ଲାଇ ତାରିଫ(ବିଏସ୍ଟି)କୁ ବୃଦ୍ଧି କରି ନାହାନ୍ତି। ପରିସ୍ଥିତିରେ ପରିବର୍ତ୍ତନ ହେଲେ ବିଦ୍ୟୁତ୍ ଶୁଳ୍କ ବୃଦ୍ଧି ନେଇ ନିଷ୍ପତ୍ତି ନିଆଯାଇ ପାରେ ବୋଲି ଓଇଆର୍ସି ପକ୍ଷରୁ କୁହାଯାଇଛି। ସାଧାରଣ ନିର୍ବାଚନ ଥିବାରୁ ଗତ ବର୍ଷ ମଧ୍ୟ ବିଦ୍ୟୁତ ଶୁଳ୍କ ବୃଦ୍ଧି କରାଯାଇ ନ ଥିଲା।
ଏବେ ବିଦ୍ୟୁତ୍ ଉପଭୋକ୍ତାଙ୍କୁ ୫୦ ୟୁନିଟ ପର୍ଯ୍ୟନ୍ତ ୟୁନିଟ ପିଛା ୨ଟଙ୍କା ୫୦ ପଇସା, ୫୦ରୁ ୨୦୦ୟୁନିଟ ଯାଏ ୪ଟାଙ୍କା ୩୦ ପଇସା, ୨୦୦ରୁ ୪୦୦ ୟୁନିଟ ଯାଏ ୫ ଟଙ୍କା ୩୦ପଇସା ଓ ୪୦୦ ୟୁନିଟରୁ ଅଧିକ ବ୍ୟବହାର ପାଇଁ ୟୁନିଟ ପିଛା ୫ଟଙ୍କା ୭୦ ପଇସା ଦେବାକୁ ପଡୁଛି। ତାହା ବଳବତ୍ତର ରହିବ। ଏଥିସହିତ ଡିିଜିଟାଲ ମୋଡରେ ଶୁଳ୍କ ପଇଠ କରୁଥିବା ସମସ୍ତ ଗ୍ରାହକଙ୍କୁ ୨ ପ୍ରତିଶତ ଏବଂ ପ୍ରି-ପେଡ ଗ୍ରାହକଙ୍କୁ ୨ ପ୍ରତିଶତ ହିସାବରେ ରିହାତି ଦିଆଯିବ। ବିଦ୍ୟୁତ ଶୁଳ୍କ ବଢି ନ ଥିବାରୁ ଗ୍ରୀଡ୍କୋ ଉପରେ ଋଣ ଭାର ମଧ୍ୟ ବଢିବ। ପ୍ରକାଶିତ ବିଜ୍ଞପ୍ତି ଅନୁଯାୟୀ ୨୦୧୯-୨୦ରେ ଗ୍ରୀଡ୍କୋ ୨୫୯.୫୮ପଇସାରେ ବିଦ୍ୟୁତ କିଣୁଥିବାବେଳେ ୨୦୨୦-୨୧ରେ ୨୭୮.୫୭ ପଇସାରେ କିଣିବ। ୨୦୨୦-୨୧ ଆର୍ଥିକ ବର୍ଷରେ ଗ୍ରୀଡ୍କୋ ୨୯୦୧୮ ନିୟୁତ ୟୁନିଟ ବିଦ୍ୟୁତ କିଣି ବଣ୍ଟନ କମ୍ପାନୀ ସେସୁ, ନେସ୍କୋ, ୱେସ୍କୋ ଏବଂ ସାଉଥକୋକୁ ୨୮୦୯୦ନିୟୁତ ୟୁନିଟ ବିକ୍ରିି କରିବ। ଫଳରେ ୨୦୧୯-୨୦ରେ ଗ୍ରୀଡକୋର ବକେୟା ୧୭୨.୯୪ କୋଟି ଟଙ୍କା ଥିବା ବେଳେ ତାହା ୨୦୨୦-୨୧ରେ ୬୬୦.୧୫ କୋଟି ଟଙ୍କାରେ ପହଞ୍ଚତ୍ବ ବୋଲି ଅନୁମାନ କରାଯାଇଛି। ଗ୍ରୀଡ୍କୋ, ବଣ୍ଟନ କମ୍ପାନୀ, ଉପତ୍ାଦନ କରୁଥିବା କମ୍ପାନୀଗୁଡିକ ଶୁ୍ଳ୍କ ବୃଦ୍ଧି ନେଇ ଓଇଆରସିଙ୍କ ନିକଟରେ ଦାବି କରିଥିଲେ। କରୋନା ଯୋଗୁ ଓଇଆରସି ଶୁଳ୍କ ବୃଦ୍ଧିକୁ ସାମୟିକ ଭାବେ ସ୍ଥଗିତ କରିଛନ୍ତି। କରୋନା ଲକ୍ଡାଉନ ଯୋଗୁ ସେସୁ ପକ୍ଷରୁ ମାର୍ଚ୍ଚ ଏବଂ ଏପ୍ରିଲ ମାସ ପାଇଁ ଶୁୁଳ୍କ ପଇଠ ଉପରେ ୪ପ୍ରତିଶତ ରିହାତି ଦେବାକୁ ଘୋଷଣା କରାଯାଇଛି।