ନୂଆଦିଲ୍ଲୀ,୧୮-୪: ରିଲାଏନ୍ସ ଗ୍ରୁପ୍ ଅଧ୍ୟକ୍ଷ ଅନିଲ ଅମ୍ବାନୀଙ୍କ ଅଡ଼ୁଆ ବଢ଼ୁଛି ପଛେ କମିବାର ନାଁ ଧରୁନି। ଏଚ୍ଏସ୍ବିସି ଡେଜି ଶେୟାରଧାରୀଙ୍କ ଦ୍ୱାରା ଦାୟର ଅବମାନନା ମାମଲାରେ ରାଷ୍ଟ୍ରୀୟ କମ୍ପାନୀ ଆଇନ ଅପିଲୀୟ ନ୍ୟାୟାଧିକରଣ(ଏନ୍ସିଏଲ୍ଏଟି) ଅନିଲଙ୍କୁ ନୋଟିସ ଜାରି କରି ଜବାବ ମାଗିଛନ୍ତି। ଆସନ୍ତା ୧୦ ଦିନ ଭିତରେ ଜବାବ ଦେବାକୁ ନିର୍ଦ୍ଦେଶ ଦିଆଯାଇଛି। ରିଲାଏନ୍ସ ଗ୍ରୁପ୍ର କମ୍ପାନୀ ଆର୍-ଇନ୍ଫ୍ରାଟେଲ ଦ୍ୱାରା ୨୩୦ କୋଟି ଟଙ୍କା ପ୍ରଦାନ କରିବାରେ ବିଫଳ ହେବାକୁ ନେଇ ଏଚ୍ଏସ୍ବିସି ଡେଜି ପକ୍ଷରୁ ଏନ୍ସିଏଲ୍ଏଟିରେ ଅପିଲ କରାଯାଇଛି। ଜଷ୍ଟିସ ଏସ୍.ଜେ. ମୁଖୋପାଧ୍ୟାୟଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରୁଛନ୍ତି। ଏଚ୍ଏସ୍ବିସି ଡେଜି ଇନଭେଷ୍ଟମେଣ୍ଟ(ମରିସସ୍) ଏବଂ କମ୍ପାନୀର କ୍ଷୁଦ୍ର ଶେୟାରଧାରୀଙ୍କ ପକ୍ଷରୁ ଦାଏର ଅଦାଲତ ଅବମାନନା ମାମଲାରେ ଖଣ୍ଡପୀଠ ଅନିଲ ଅମ୍ବାନୀଙ୍କ ଜବାବ ଜାଣିବାକୁ ଚାହାନ୍ତି। ସୂଚନାଥାଉ କି, ଏଚ୍ଏସ୍ବିସି ଓ କ୍ଷୁଦ୍ର ଶେୟାରଧାରୀଙ୍କୁ ରିଲାଏନ୍ସ ଇନଫ୍ରାଟେଲ ୨୩୦ କୋଟି ଟଙ୍କା ପ୍ରଦାନ କରିବାକୁ ଏନ୍ସିଏଲ୍ଏଟି ନିର୍ଦ୍ଦେଶ ଦେଇଥିଲେ। ତେବେ କମ୍ପାନୀ ଏହି ନିର୍ଦ୍ଦେଶ ପାଳନ କରିବାରେ ବିଫଳ ହୋଇଛି।