ନିରାକାରପୁର,୯ା୮(ଡି.ଏନ.ଏ.): ଖୋର୍ଦ୍ଧା ଜିଲା ନିରାକାରପୁର ଅଞ୍ଚଳରେ ଏବେ ମାନସିକ ରୋଗୀଙ୍କ ଉତ୍ପାତ ବୃଦ୍ଧିପାଉଛି। ରାଜ୍ୟ ଓ ବାହାରୁ ବସ, ଟ୍ରେନ୍ ଓ ଅନ୍ୟ ପଥରେ ଏଠାକୁ ମହିଳା, ପୁରୁଷ ମାନସିକ ବିକାରଗ୍ରସ୍ତ(ମାନସିକ ରୋଗୀ) ଏଠାକୁ ଆସି ବିଭିନ୍ନ କାଣ୍ଡ କରି ବସୁଛନ୍ତି। ଫଳରେ ଏହାକୁ ନେଇ ସାଧାରଣରେ ଆତଙ୍କ ଖେଳିଯାଇଛି। କେହି ଏଟିଏମ୍ କେନ୍ଦ୍ରରେ ପଶି ଭିତର ପଟୁ କବାଟ ବନ୍ଦକରି ଏଟିଏମ୍ ମେଶିନ ଉପରେ ଲୁଗା ଘୋଡ଼ାଇ ଦେଉଛନ୍ତି ତ କେହି ରାସ୍ତାରେ ଲୋକଙ୍କୁ ଭୟଭୀତ କଲା ଭଳି ବ୍ୟବହାର ପ୍ରଦର୍ଶନ କରୁଛନ୍ତି। ଉଲ୍ଲେଖଯୋଗ୍ୟ, ରାସ୍ତାରେ ବୁଲୁଥିବା ଅସହାୟ, ମାନସିକ ଭିନ୍ନକ୍ଷମ ଏବଂ ରୋଗୀମାନଙ୍କ ଥଇଥାନ, ସେବା ଓ ସହାୟତା ଯୋଗାଇଦେବା ନିମନ୍ତେ ସରକାରୀ ଓ ବେସରକାରୀସ୍ତରୀୟ ଅନୁଷ୍ଠାନଗୁଡ଼ିକ କାର୍ଯ୍ୟ କରୁଛନ୍ତି। ଦେଶ, ବିଦେଶରୁ ସ୍ବେଚ୍ଛାସେବୀ ଅନୁଷ୍ଠାନଗୁଡ଼ିକ ଲକ୍ଷ ଲକ୍ଷ ଟଙ୍କା ଅନୁଦାନ ପାଉଥିବାବେଳେ କେବଳ କାଗଜକଲମରେ ହିଁ କାର୍ଯ୍ୟକୁ ସୀମିତ ରଖି ଅର୍ଥ ହଡ଼ପ କରୁଥିବା ଜଣାପଡ଼ିଛି। ରାସ୍ତାଘାଟ, ବିଭିନ୍ନ ଅଞ୍ଚଳରେ ଘୂରି ବୁଲୁଥିବା ଏହି ଅସହାୟ, ଉଭୟ ଶାରୀରିକ ଓ ମାନସିକ ଭିନ୍ନକ୍ଷମଙ୍କ ଫଟୋ ଉଠାଇ ନାମକୁ ମାତ୍ର କିଛି ସହାୟତା କରି ଅନେକ ଅନୁଷ୍ଠାନ ସେବାର ନାଟକ କରିବାରେ ଲାଗିଛନ୍ତି। ଏ ସମୟରେ ସ୍ଥାନୀୟ କିଛି ସ୍ବେଚ୍ଛାସେବୀ ବା ସାମାଜିକ ଅନୁଷ୍ଠାନକୁ ପଚାରିବାରୁ ସେମାନେ କୌଣସି ସନ୍ତୋଷଜନକ ଉତ୍ତର ଦେଇ ନ ଥିଲେ। ଉକ୍ତ ସମସ୍ୟା ନେଇ ନିରାକାରପୁର ଥାନା ଏଏସ୍ଆଇ ଶରତ ପାଇକରାୟ କହିଥିଲେ, ନିକଟସ୍ଥ ଅନୁଷ୍ଠାନଗୁଡ଼ିକ ଏମାନଙ୍କୁ ରଖିବା ପାଇଁ ରାଜି ହେଉନାହାନ୍ତି। ତେବେ ଉକ୍ତ ପାଗଳ, ଅସ୍ବାଭାବିକ ଆଚରଣ କରୁଥିବା ଅସହାୟଙ୍କୁ ଅନ୍ୟତ୍ର ପଠାଇବା ପାଇଁ ଉଦ୍ୟମ ହେଉଥିବା ନେଇ ସେ ସୂଚନା ଦେଇଛନ୍ତି।