କରୋନା ଭୂତାଣୁକୁ ନେଇ ସାରା ବିଶ୍ୱରେ ଆତଙ୍କର ବାତାବରଣ ସୃଷ୍ଟି ହୋଇଛି। ଏହାକୁ ନେଇ ଦେଶ ତଥା ରାଜ୍ୟ ପ୍ରଶାସନ ପକ୍ଷରୁ ଅନେକ ପଦକ୍ଷେପ ନିଆଯାଉଛି। ମାସ୍କ ଓ ସାନିଟାଇଜର ବ୍ୟବହାର କରି ଏହାକୁ ରୋକିବାକୁ ସଚେତନ କରାଯାଉଛି। ତେବେ ସଚେତନତା ହିଁ ଏହାକୁ ରୋକିବାର ଏକମାତ୍ର ଉପାୟ ହୋଇଥିବା ବେଳେ ଅନେକ ସମୟରେ ବିଭିନ୍ନ ଗୁଜବ ସୃଷ୍ଟି ହେଉଥିବା ଶୁଣିବାକୁ ମିଳୁଛି। ଏଣୁ ଏଥିରୁ ଦୂରେଇ ରହି ସ୍ବାସ୍ଥ୍ୟ ପ୍ରତି ବିଶେଷ ଧ୍ୟାନ ଦେବା ସହ ଶରୀରର ରୋଗ ପ୍ରତିରୋଧକ ଶକ୍ତିକୁ ସୁଦୃଢ଼ ରଖିବାକୁ ଚେଷ୍ଟା କରନ୍ତୁ। ଏପରି ସ୍ଥିତିରେ କେତେକ ଆଣ୍ଟି ଭାଇରାଲ ଖାଦ୍ୟ ଖାଆନ୍ତୁ, ଯାହା ପ୍ରତିରକ୍ଷା ପ୍ରଣାଳୀ (ଇମ୍ୟୁନ ସିଷ୍ଟମ୍କୁ) ଶକ୍ତ କରିବ। ଏହା ମଧ୍ୟ ଆପଣଙ୍କୁ ସଂକ୍ରମିତ ରୋଗରୁ ଦୂରେଇ ରଖିବ। ଯେପରିକି ;
ରସୁଣ:
ଏଥିରୁ ଆଲିସିନ୍ ମିଳିଥାଏ, ଯାହାକୁ ଖାଇବା ଫଳରେ ଶରୀରରେ ରୋଗ ପ୍ରତିରୋଧକ ଶକ୍ତି ବଢ଼ିଥାଏ। ପ୍ରତିଦିନ ଗରମ ପାଣି ସହିତ ଦୁଇଟି ରସୁଣ ପାଖୁଡ଼ା ଖାଆନ୍ତୁ। ଏହା ସହିତ ଆପଣ ରସୁଣ ଗୁଣ୍ଡର ସୁପ୍ ମଧ୍ୟ ପିଇପାରିବେ।
ଦହି:
ନ୍ୟାଶନାଲ ସେଣ୍ଟର ଫର ବାୟୋଟେକ୍ନୋଲୋଜି ପକ୍ଷରୁ କରାଯାଇଥିବା ଏକ ଗବେଷଣା ଅନୁଯାୟୀ, ଦହି ଖାଇବା ଦ୍ୱାରା ଆରଟିଆଇଏସ୍ ଅର୍ଥାତ ଶ୍ୱାସକ୍ରିୟା ସଂକ୍ରମଣ ଆଶଙ୍କା କମ୍ ହୋଇଥାଏ। ଯେଉଁମାନଙ୍କର ରୋଗ ପ୍ରତିରୋଧକ ଶକ୍ତି ଦୁର୍ବଳ, ସେମାନଙ୍କ ଲାଗି ଏହା ରାମବାଣ ସଦୃଶ କାମ କରିଥାଏ।
ଛତୁ:
ଛତୁରେ ବିଟା ଗ୍ଲୁକୋନ୍ସ ଭରପୂର ରହିଥାଏ, ଯାହା ଆଣ୍ଟିଭାଇରାଲ ଏବଂ ଆଣ୍ଟିବ୍ୟାକ୍ଟେରିଆଲ ନାମରେ ପରିଚିତ। ଏହା କେବଳ ଆପଣଙ୍କ ରୋଗ ପ୍ରତିରୋଧକ ଶକ୍ତିକୁ ବଢ଼ାଇ ନ ଥାଏ ବରଂ ଅନେକ ରୋଗରୁ ମୁକ୍ତି ଦେଇଥାଏ। ନଡ଼ିଆ ତେଲରେ ଛତୁକୁ ରାନ୍ଧି ଖାଇପାରିବେ।
ଡାଳଚିନି:
ଏହି ସୁଗନ୍ଧିତ ମସଲା କେବଳ ଖାଦ୍ୟର ସ୍ବାଦ ବଢ଼ାଇ ନ ଥାଏ ବରଂ ରକ୍ତଚାପକୁ ମଧ୍ୟ ନିୟନ୍ତ୍ରଣ କରିଥାଏ। ଶରୀରକୁ ଭାଇରାଲ ସଂକ୍ରମଣରୁ ଏହା ରକ୍ଷା କରିଥାଏ। ନ୍ୟୁୟର୍କର ଟୁରୋ କଲେଜରେ କରାଯାଇଥିବା ଗବେଷଣାରୁ ଏହା ଜଣାପଡିଛି ଯେ, ଡାଳଚିନିରେ ଆଣ୍ଟି-ଭାଇରାଲ ଗୁଣ ରହିଛି। ଏହାର ଖଣ୍ଡକୁ ରାତିରେ ପାଣିରେ ଭିଜାଇ ପରଦିନ ସକାଳେ ସେହି ପାଣି ପିଅନ୍ତୁ। ଏହାସହିତ ଆପଣ ଚା’ କିମ୍ବା କଫିରେ ଏହାର ଅଳ୍ପ ଗୁଣ୍ଡ ମିଶାଇ ପିଇପାରିବେ।