ଭୁବନେଶ୍ୱର,୨୫ା୧୨(ବ୍ୟୁରୋ):ଗଞ୍ଜାମ ଜିଲା ସଲପତଇଲା ଗ୍ରାମରେ ରହୁଥିବା କେତେକ ଆଦିବାସୀ ପରିବାର ଉପରେ ପୋଲିସର ନିର୍ଯାତନା ବଢିବାରେ ଲାଗିଛି। ତାରସିଂ ଥାନା ପୋଲିସ ମିଥ୍ୟା ମାମଲାରେ ଲୋକଙ୍କୁ ମନଇଚ୍ଛା ଉଠାଇ ନେଇ ନିର୍ଯାତନା ଦେଉଛି। ମଦ ବିକ୍ରି କରିବା ଅଭିଯୋଗରେ ଆଦିବାସୀଙ୍କ ଘରେ ପଶି ମହିଳାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ମାଡ଼ ମାରୁଛି। ଏଭଳି ଅକଥନୀୟ ନିର୍ଯାତନାର ଶିକାର ହୋଇ ୪ ଆଦିବାସୀ ପରିବାରର ୮ ଜଣ ସଦସ୍ୟ ମଙ୍ଗଳବାର ରାଜ୍ୟ ମାନବାଧିକାର କମିଶନ (ଓଏଚ୍ଆର୍ସି)ଙ୍କ ଦ୍ୱାରସ୍ଥ ହୋଇଛନ୍ତି। ଅଭିଯୋଗ ଅନୁଯାୟୀ, ୨୦୧୮ରେ ସଲପତଇଲା ଗ୍ରାମର ଗଣେଶ ମଲ୍ଲିକ ଓ ଜିତୁ ପ୍ରଧାନଙ୍କୁ ହତ୍ୟା କରାଯାଇଥିଲା। ପ୍ରଥମେ ନିଖୋଜ ଅଭିଯୋଗ ହୋଇଥିଲେ ମଧ୍ୟ ପୋଲିସ ଖୋଜାଖୋଜି ପାଇଁ ତତ୍ପରତା ପ୍ରକାଶ କରି ନ ଥିଲା। ମୃତଦେହ ମିଳିବା ପରେ ପୋଲିସ ଅଭିଯୁକ୍ତଙ୍କୁ ଗିରଫ କରିଥିଲା। ଜିତୁ ହତ୍ୟା ମାମଲାରେ ସମ୍ପୃକ୍ତ କଟକ ଜିଲା ବଡମ୍ବା ଅଞ୍ଚଳର ବିଭୂତି ଭୂଷଣ ରଥଙ୍କୁ ପୋଲିସ ଗିରଫ ନ କରି ତାଙ୍କ ଘର ପୋଡି ଘଟଣାରେ ପୋଲିସ ଆଦିବାସୀ ଲୋକଙ୍କ ନାଁରେ ମିଛ ମାମଲା କରି ନାନା ନିର୍ଯାତନା ଦେଉଥିଲେ। ଏନେଇ ସେମାନେ ଜିଲା ଏସ୍ପି, ଡିଆଇଜି ଏବଂ ପୋଲିସ ଡିଜିଙ୍କୁ ଭେଟିଥିଲେ ମଧ୍ୟ କିଛି ସୁଫଳ ମିଳି ନ ଥିବା ସେମାନେ କହିଛନ୍ତି। ଏନେଇ ଗଞ୍ଜାମ ଏସ୍ଡିଓପିଓ ଶୁଭ୍ରାଂଶୁ ମିଶ୍ରଙ୍କୁ ଫୋନ୍ରେ ଯୋଗାଯୋଗ କରାଯାଇଥିଲେ ମଧ୍ୟ ସେ କଲ୍ ରିସିଭ୍ କରି ନ ଥିଲେ।