ଢେଙ୍କାନାଳ ଅଫିସ, ୧୮।୭ – ଢେଙ୍କାନାଳ ସହରରେ ବୁଲା ଷଣ୍ଢଙ୍କ ଉପଦ୍ରବ ବଢ଼ିବାରେ ଲାଗିଛି। ପ୍ରମୁଖ ବଜାର, ଜନଗହଳିପୂର୍ଣ୍ଣ ରାସ୍ତା ଗୋରୁଙ୍କ କବ୍ଜାରେ ରହୁଛି। ବାରମ୍ବାର ଅଭିଯୋଗ ସତ୍ତ୍ୱେ ପୌରସଂସ୍ଥା ଏହାକୁ ଗୁରୁତ୍ୱ ଦେଉନାହିଁ। ଏପରି ସମସ୍ୟା ପାଇଁ ଯେ କୌଣସି ମୁହୂର୍ତ୍ତରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେବା ଆଶଙ୍କା ସୃଷ୍ଟି ହୋଇଛି।
ଜବାହରଚୌକ ଅଞ୍ଚଳର ଜଣେ ଔଷଧ ବ୍ୟବସାୟୀ ମଙ୍ଗଳବାର ରାତି ପ୍ରାୟ ୧୨ଟାରେ ଘରକୁ ଫେରୁଥିବା ବେଳେ ସହରର ପ୍ରମୁଖ ରାସ୍ତାରେ ହଠାତ୍ ଏକ ଷଣ୍ଢ ତାଙ୍କୁ ପଛପଟୁ ଆକ୍ରମଣ କରିଥିଲା। ଏଥିରେ ତାଙ୍କର ବାମହାତ ଭାଙ୍ଗିଯାଇଛି। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟ ଏବଂ ପରେ କଟକ ସ୍ଥାନାନ୍ତର କରାଯାଇଛି। ସେହିପରି ବୁଧବାର ସକାଳେ ରଥଗଡ଼ା ନିକଟ ପରିବା ମାର୍କେଟରେ ଏକ ଷଣ୍ଢ ଆକ୍ରମଣାତ୍ମକ ହୋଇ ବ୍ୟାପକ କ୍ଷତି ଘଟାଇଛି। ଏଥିରେ ୩ଟି କାର୍ ଏବଂ ଗୋଟିଏ ବାଇକ୍ ଭାଙ୍ଗିଯାଇଛି। ଅନୁରୂପ ଭାବେ କିଛିଦିନ ତଳେ ଜଣେ ଅବସରପ୍ରାପ୍ତ ସାମରିକ କର୍ମଚାରୀ ବୁଲା ଷଣ୍ଢ ଯୋଗୁ ବାଇକ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଗୁରୁତର ଅବସ୍ଥାରେ ସେ ଏବେ କଟକରେ ଚିକିତ୍ସାଧୀନ ଅଛନ୍ତି। ପୁରୀ ରଥଯାତ୍ରାର ଦୁଇ ସପ୍ତାହ ପୂର୍ବରୁ ଉକ୍ତ ଅଞ୍ଚଳରୁ ବହୁ ବୁଲା ଷଣ୍ଢକୁ ଆଣି ଢେଙ୍କାନାଳ ସୀମାନ୍ତରେ ଛାଡ଼ି ଦିଆଯାଇଛି। ସେମାନେ ସହରରେ ପଶି ଏପରି ଦୌରାତ୍ମ୍ୟ ସୃଷ୍ଟି କରିଥିବା ସାଧାରଣରେ ଆଲୋଚନା ହେଉଛି। ଜନବହୁଳ ଅଞ୍ଚଳରେ ଷଣ୍ଢ ଉପଦ୍ରବ ଯୋଗୁ ଦୈନିକ ଛୋଟବଡ଼ ଦୁର୍ଘଟଣା ଘଟୁଛି। ଟ୍ରାଫିକ ସମସ୍ୟା ସୃଷ୍ଟି ହେଉଛି। ପଥଚାରୀ, ବାଇକ୍ ଆରୋହୀମାନେ ରାସ୍ତାରେ ଯିବାକୁ ଅସୁରକ୍ଷିତ ମନେ କରୁଛନ୍ତି। ପୌରସଂସ୍ଥାର କାଓ କ୍ୟାଚର ଯାନ ଥିଲେ ମଧ୍ୟ ଏହା କାମରେ ଆସୁନାହିଁ। ଏହାର ବିହିତ ପ୍ରତିକାର କରିବାକୁ ସହରବାସୀ ଦାବି କରିଛନ୍ତି।
ଏ ନେଇ ପୌରସଂସ୍ଥା ନିର୍ବାହୀ ଅଧିକାରୀ ଅତନୁ ସାମନ୍ତ କୁହନ୍ତି, ସେ ଏକ ପ୍ରଶିକ୍ଷଣ କାର୍ଯ୍ୟକ୍ରମରେ ଯୋଗଦେବାକୁ ଅହମ୍ମଦାବାଦରେ ଅଛନ୍ତି। ଫେରିବା ପରେ ଏ ନେଇ ଆଲୋଚନା କରି ପଦକ୍ଷେପ ନିଆଯିବ।