ବଣାଇଁ,୧୬।୨(ସ୍ବ.ପ୍ର.): ସୁନ୍ଦରଗଡ଼ ଜିଲା ବଣାଇଁ ଥାନା ଅନ୍ତର୍ଗତ ଦେଉଳହୁଡ଼ି ଗ୍ରାମରେ ଶନିବାର ବିଳମ୍ବିତ ରାତିରେ ଅଭାବନୀୟ ଘଟଣା ଘଟିଛି। ଟଙ୍କା ଧାର ଉଧାରକୁ କେନ୍ଦ୍ରକରି ସାନଭାଇ ବଡ଼ଭାଇ ସମେତ ତାଙ୍କ ସପରିବାରଙ୍କୁ ଟାଙ୍ଗିଆରେ ହାଣି ହତ୍ୟା କରିଛନ୍ତି। ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି। ହତ୍ୟା ପରେ ସାନଭାଇ କାଲି ମୁଣ୍ଡା (୨୨)ରବିବାର ଥାନାରେ ଆତ୍ମସମର୍ପଣ କରିଛନ୍ତି। ମୃତକମାନେ ହେଲେ କାଲିଙ୍କ ବଡ଼ଭାଇ କାଣ୍ଡେ (୩୦), ଭାଉଜ ସୁମି (୨୫ ), ଝିଆରୀ ମାଲିନି (୭) ଏବଂ ପୁତୁରା ମାରା (୫)।
ସୂଚନାଯୋଗ୍ୟ, କାଣ୍ଡେ ଗରିବ ହୋଇଥିବା ବେଳେ ଡ୍ରାଇଭର ଥିବା ସାନଭାଇ କାଲିଙ୍କଠୁ କିଛି ଟଙ୍କା ଉଧାର ନେଇଥିଲେ। ମାତ୍ର ସେ ଏହି ଉଧାର ଟଙ୍କା ଫେରାଇ ନ ଥିଲେ। ବିଳମ୍ବିତ ରାତିରେ ସାନଭାଇ ନିଶାରେ ଥାଇ ବଡଭାଇଙ୍କୁ ଟଙ୍କା ମାଗିଥିଲେ। ମାତ୍ର ବଡଭାଇ କାଣ୍ଡେ ବର୍ତ୍ତମାନ ଟଙ୍କା ଦେଇପାରିବି ନାହିଁ ବୋଲି କହିଥିଲେ। ଏଥିରେ ଉତ୍ତ୍ୟକ୍ତ ହୋଇ ସାନଭାଇ କାଲି ଏକ ଟାଙ୍ଗିଆରେ କାଣ୍ଡେ, ସୁମି, ମାଲିନି ଏବଂ ମାରାଙ୍କୁ ହତ୍ୟା କରିଥିଲେ। ତେବେ ଆତ୍ମସମର୍ପଣ ପରେ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଥିବା ବେଳେ ମୃତଦେହ ବ୍ୟବଚ୍ଛେଦ ଲାଗି ପଠାଯାଇଛି।