ଭୁବନେଶ୍ୱର,୨୮।୨(ବ୍ୟୁରୋ): ସ୍ଥାନୀୟ ଜନତା ମଇଦାନରେ ଆୟୋଜିତ ସାଧାରଣ ସଭାରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଉଦ୍ବୋଧନ ଦେଇଛନ୍ତି। ଜଗନ୍ନାଥଙ୍କୁ ସ୍ମରଣ କରି ଶାହା ନିଜର ବକ୍ତବ୍ୟ ରଖିଛନ୍ତି। ସଭାରେ ସେ କେନ୍ଦ୍ର ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ପଦକ୍ଷେପ ସହ ନାଗରିକତ୍ୱ ସଂଶୋଧନ ଆଇନ(ସିଏଏ)କୁ ନେଇ ମତ ରଖିଛନ୍ତି। ଶାହା ସିଏଏକୁ ନେଇ କଂଗ୍ରେସ, ବାମଦଳକୁ ଟାର୍ଗେଟ କରି କହିଛନ୍ତି, ନାଗରିକତା ଚାଲିଯିବା ନେଇ ଅପପ୍ରଚାର କରାଯାଉଛି। ସିଏଏକୁ ନେଇ ସରକାରକୁ ବଦନାମ କରାଯିବା ଜଣାଥିଲା। ହେଲେ ବଦନାମକୁ ଭୟ ନ କରି ନରେନ୍ଦ୍ର ମୋଦି ସିଏଏ କରାଇଛନ୍ତି। ପୂର୍ବରୁ ସଂଖ୍ୟାଲଘୁଙ୍କ ମାନବାଧିକାର ହନନ ହେଉଥିଲା, ଆଉ ହେବନାହିଁ। ସିଏଏ ଦ୍ୱାରା କାହାରି ନାଗରିକତା ଯିବନାହିଁ। କୌଣସି ସଂଖ୍ୟାଲଘୁଙ୍କର ନାଗରିକତା ଆଦୌ ଯିବନାହିଁ। ବରଂ ସିଏଏ ଦ୍ୱାରା ପ୍ରପୀଡ଼ିତଙ୍କ ନାଗରିକତା ସୁରକ୍ଷିତ ହେବ। ସିଏଏର କୌଣସି ଧାରାରେ ନାଗରିକତା ଯିବା ବିଷୟରେ ଉଲ୍ଲେଖ ନାହିଁ ବୋଲି ସେ କହିଛନ୍ତି।
କଂଗ୍ରେସ ଯିବା ବେଳକୁ ଅର୍ଥନୀତିରେ ଭାରତ ୧୧ ନଂରେ ଥିଲା। ମୋଦି ଆସିବା ପରେ ୫ ବର୍ଷରେ ଆମେ ୫ମ ସ୍ଥାନକୁ ଉଠିଛୁ। ୨୦୨୪ ପୂର୍ବରୁ ୫ ବିଲିଅନ ଡଲାର ଅର୍ଥବ୍ୟବସ୍ଥା ସହ ଦେଶ ବିଶ୍ୱସ୍ତରରେ ନାମ କରିବ। କଂଗ୍ରେସର ୫୫ବର୍ଷ ଶାସନ ଉପରେ ଆମର ୫ ବର୍ଷ ଭାରି ପଡ଼ିଛି। ଏବେ ମୋଦିଙ୍କ ହାତକୁ ଶକ୍ତ କରନ୍ତୁ ବୋଲି ଶାହା କହିଛନ୍ତି।
ଏହାଛଡ଼ା କେନ୍ଦ୍ର ସରକାର ଶାସନକୁ ଆସିବା ପରେ ନେଇଥିବା ପଦକ୍ଷେପ ବିଷୟରେ ଶାହା ମତ ରଖିଛନ୍ତି। କାଶ୍ମୀରକୁ ଭାରତର ମୁକୁଟ ବନାଇବାକୁ ମୋଦି ପଦକ୍ଷେପ ନେଇଛନ୍ତ। ୩୭୦ ଉଚ୍ଛେଦ କରି କାଶ୍ମୀରକୁ ଭାରତର ମୁକୁଟ ବନାଇଛନ୍ତି। ରାମ ମନ୍ଦିର ନିର୍ମାଣ ଲାଗି ଏକ ଟ୍ରଷ୍ଟ ଗଠନ କରିଛନ୍ତି। ଆଉ କିଛି ଦିନ ମଧ୍ୟରେ ଭବ୍ୟ ମନ୍ଦିର ନିର୍ମାଣ ହେବ ବୋଲି ଶାହା କହିଛନ୍ତି।