ଅନୁଗୋଳ ଅଫିସ, ୧୩।୮
ବଦଳିବ ଅନୁଗୋଳ ଷ୍ଟାଡିୟମ ରୂପରେଖ। ଅତ୍ୟାଧୁନିକ ଜ୍ଞାନକୌଶଳରେ ଏହାର ନବକଳେବର କରାଯିବ। ଏଥିସହ ବିଭିନ୍ନ ଖେଳ ସୁବିଧାରେ ଏଠାରେ ଯେପରି ଆୟୋଜନ ହୋଇପାରିବ ସେ ନେଇ ମଧ୍ୟ ବିଚାର କରାଯିବ। ଏ ନେଇ ଭିତ୍ତିଭୂମି ପରଖିବା କାର୍ଯ୍ୟ ଆରମ୍ଭ ହୋଇଛି। ଭୁବନେଶ୍ୱରରୁ ଆର୍କିଟେକଚର ଗୋପୀନାଥ ରଣା ସୋମବାର ଅନୁଗୋଳ ଷ୍ଟାଡିୟମ ଆସି ପରିଦର୍ଶନ କରି ଫେରିଛନ୍ତି। ତାଙ୍କ ସହ ତାଳଚେର ବିଧାୟକ ବ୍ରଜ କିଶୋର ପ୍ରଧାନ ମଧ୍ୟ ଉପସ୍ଥିତ ଥିଲେ।
ଅନୁଗୋଳ ଷ୍ଟାଡିୟମ ପୁରୁଣା ଗ୍ୟାଲେରିକୁ ପୂର୍ବରୁ ଅସୁରକ୍ଷିତ ଘୋଷଣା କରାଯାଇଛି। ହେଲେ ଏହାର ମରାମତି ନିମନ୍ତେ ପ୍ରଶାସନିକସ୍ତରରେ ଟଣା ଓଟରା ଜାରି ରହିଛି। ତେବେ ସୋମବାର ଭୁବନେଶ୍ୱରରୁ ଆସିଥିବା ଆର୍କିଟେକଚର ଷ୍ଟାଡିୟମର ଭିତ୍ତିଭୂମି ପରଖିବା ପରେ ଏହାର ନବକଳେବର ନେଇ ଆଶା ସୃଷ୍ଟି ହୋଇଛି। ଅସୁରକ୍ଷିତ ଥିବା ପୁରୁଣା ଗ୍ୟାଲେରିକୁ ସମ୍ପୂର୍ଣ୍ଣ ଭାବେ ଭଙ୍ଗାଯିବା ପରେ ନିର୍ମାଣ ପାଇଁ ବ୍ୟବସ୍ଥା ହେବ ବୋଲି ତାଳଚେର ବିଧାୟକ ପ୍ରଧାନ ସୂଚନା ଦେଇଛନ୍ତି। ଏଥିସହ ନୂଆ ଗ୍ୟାଲେରିର କ୍ଷମତା ଓ ଏହା କେତେ ସୁରକ୍ଷିତ ତାହାର ଯାଞ୍ଚ ଏକ ଇଞ୍ଜିନିୟରିଂ ଟିମ୍ କରିବେ। ଏହାପରେ ଉକ୍ତ ଗ୍ୟାଲେରି ରହିବ ନା ଭଙ୍ଗାଯିବ ସେ ନେଇ ନିଷ୍ପତ୍ତି ନିଆଯିବ ବୋଲି ବିଧାୟକ କହିଛନ୍ତି।