ଢେଙ୍କାନାଳ ଅଫିସ,୧୦ା୨: ଢେଙ୍କାନାଳ ଜିଲା ମହିମା ଧର୍ମ ପୀଠ ମହିମାଗାଦି ଯୋରନ୍ଦାରେ ବିଶ୍ୱ ପ୍ରସିଦ୍ଧ ମାଘ ମେଳାର ରବିବାର ଥିଲା ତୃତୀୟ ଦିବସ। ବର୍ଷାପାଗ ଯୋଗୁ ଶନିବାର ମେଳା ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଥିଲା। ଏଥିଯୋଗୁ ଉଠା ଦୋକାନୀମାନଙ୍କର ବ୍ୟବସାୟ ଠପ୍ ହୋଇଯାଇଥିଲା। ଦୂରଦୂରାନ୍ତରୁ ଆସିଥିବା ଦୋକାନୀମାନେ ନିରାଶ ହୋଇଥିଲେ। ରବିବାର ସକାଳେ ମଧ୍ୟ ଝିପିଝିପି ବର୍ଷା ହେବା ଦେଖି ମେଳାକୁ ଆସିଥିବା ଯାତ୍ରୀ ଓ ଦୋକାନୀମାନେ ପୁଣି ନିରାଶ ହୋଇଥିଲେ। କିନ୍ତୁ ପରେ ପାଗ ବଦଳିବା ସହିତ ଖରା ପଡିବାରୁ ଭିଡ ଜମିଥିଲା। ଫଳରେ ଦୋକାନୀଙ୍କ ମଧ୍ୟରେ ଉତ୍ସାହ ଦେଖାଦେଇଥିଲା। ସନ୍ଧ୍ୟାରେ ମେଳାରେ ନାହିଁ ନ ଥିବା ଭିଡ଼ ପରିଲକ୍ଷିତ ହୋଇଥିଲା। ତୃତୀୟ ସନ୍ଧ୍ୟାରେ ଗାଦିମନ୍ଦିରରେ ଝାଡଦୀପ ପ୍ରଜ୍ୱଳିତ ହୋଇଥିଲା। ମାଘମେଳା ଅବସରରେ ଯୋରନ୍ଦାଠାରେ ଏକ ବିଶାଳ ସନ୍ଥ ସମ୍ମିଳନୀ ମଧ୍ୟ ଆୟୋଜିତ ହୋଇଥିଲା। ଏହି ସମ୍ମିଳନୀରେ ସମସ୍ତ ସାଧୁସନ୍ଥ ଏକାଠି ହୋଇଥିଲେ। ରବିବାର ଛତିଶଗଡର ଜଗଦଲପୁର ସମେତ ଝାଡଖଣ୍ଡ, ଆନ୍ଧ୍ରପ୍ରଦେଶ, ଓଡ଼ିଶାର ସମ୍ବଲପୁର, ବରଗଡ ଓ ଦେବଗଡ ଆଦି ଅଞ୍ଚଳରୁ ବହୁ ସଂଖ୍ୟାରେ ଶ୍ରଦ୍ଧାଳୁ ମେଳା ବୁଲି ଦେଖିଥିଲେ ା