ନୂଆଦିଲ୍ଲୀ,୧୪।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ତାଙ୍କ ସୋସିଆଲ ମିଡିଆ ଆକାଉଣ୍ଟର ପ୍ରୋଫାଇଲ ଫଟୋକୁ ବଦଳାଇ ଦେଇଥିବା ଦେଖାଯାଇଛି। କରୋନା ସଂକ୍ରମଣ ଯୋଗୁ ଦେଶରେ ଚାଲିଥିବା ୨୧ ଦିନିଆ ଲକ୍ଡାଉନ ଅବଧିକୁ ମୋଦି ପୁଣିଥରେ ମେ’୩ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏଥିପାଇଁ ମଙ୍ଗଳବାର ସେ ଦେଶବାସୀଙ୍କୁ ଉଦ୍ବୋଧନ ଦେବା ସମୟରେ ଏକ ପାରମ୍ପରିକ ଗାମୁଛାରେ ନିଜ ମୁହଁ ଘୋଡାଇବା ସହ ପ୍ରଥମେ ଦେଶବାସୀଙ୍କୁ ନମସ୍କାର ଜଣାଇଥିଲେ। ମାସ୍କ ବଦଳରେ ଜଣେ ଗାମୁଛାରେ ମୁହଁ ଘୋଡାଇଲେ କରୋନାକୁ ଦୂରେଇ ଦେଇ ପାରିବ ବୋଲି ମୋଦି ବାର୍ତ୍ତା ଦେଇଛନ୍ତି। ଏହି ସମୟର ଏକ ଫଟୋକୁ ସେ ତାଙ୍କ ସୋସିଆଲ ମିଡିଆ ପ୍ରୋଫାଇଲରେ ରଖିଥିବା ଦେଖାଯାଇଛି। ତେବେ ଏହି ଫଟୋକୁ ଦେଖିବା ପରେ ସୋସିଆଲ ମିଡିଆରେ ତାଙ୍କ ପ୍ରଶଂସକଙ୍କ ସଂଖ୍ୟା ବଢି ଯାଇଛି ବୋଲି କୁହାଯାଉଛି।