ଅନୁଗୋଳ ଅଫିସ, ୧୨।୯ – ଉପସ୍ଥିତ ବୁଦ୍ଧି ଖଟାଇ ଚଳନ୍ତା ଟ୍ରେନ୍ ତଳୁ ନିଜ ସହପାଠିନୀ ପ୍ରମିଳାଙ୍କୁ ଟାଣି ଆଣି ଜୀବନ ରକ୍ଷା କରିବାରେ ସକ୍ଷମ ହୋଇଥିବା ତାଳଚେରର ୧୦ ବର୍ଷୀୟା ବାଳିକା ଶ୍ରୀମତୀ ବଦ୍ରାଙ୍କୁ ତାଙ୍କର ଅଦମ୍ୟ ସାହସିକତା ପାଇଁ ଗତ ୨୯ ତାରିଖରେ ରାଜ୍ୟ ସରକାର ବିଜୁ ପଟ୍ଟନାୟକ ସାହସିକତା ପୁରସ୍କାର ପ୍ରଦାନ କରିଥିଲେ। ତେବେ ବୁଧବାର ଅନୁଗୋଳ ଜିଲାପାଳ ବଦ୍ରାଙ୍କୁ ସମ୍ବର୍ଦ୍ଧିତ କରିଛନ୍ତି। ବଦ୍ରାଙ୍କ ସାହସିକତା ପାଇଁ ତାଙ୍କୁ ପ୍ରଶଂସା କରିବା ସହ ଜିଲାପାଳ ତାଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଥିଲେ। ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ଜିଲା ପରିଷଦ ସଭାପତି ବାସନ୍ତୀ କିଷାନଙ୍କ ସମେତ ଅତିରିକ୍ତ ଜିଲାପାଳ ତପନ କୁମାର ଶତପଥୀ, ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଅତୁଲ୍ୟ କୁମାର ଚମ୍ପତିରାୟ, ଜିଲା ସମାଜ ମଙ୍ଗଳ ଅଧିକାରୀ ଅଲମା ବରୁଆ, ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ (ବୈଷୟିକ) ହରିହର ପାଢ଼ୀ, ଜିଲା କ୍ରୀଡ଼ା ଅଧିକାରୀ ଅକ୍ଷୟ କୁମାର ସିଠ, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶରତ ଚନ୍ଦ୍ର ସେଠୀ ଓ ସାମାଜିକ କର୍ମୀ କ୍ଷୀରୋଦ ସାହୁ ପ୍ରମୁଖ ଉପସ୍ଥିତ ଥିଲେ। ସୂଚନାଯୋଗ୍ୟ ଯେ, ଗତବର୍ଷ ନଭେମ୍ବର ୨୭ରେ ତାଳଚେର ଘଣ୍ଟପଡ଼ା ନୋଡାଲ ଉଚ୍ଚ ବିଦ୍ୟାଳୟରୁ ସହପାଠିନୀ ପ୍ରମିଳାଙ୍କ ସହ ଫେରୁଥିବା ବେଳେ ବଦ୍ରା ଏହି ସାହସିକତାର ପରିଚୟ ଦେଇଥିଲେ। ଡେରା ଓଭର ବ୍ରିଜ ତଳେ ଏକ ମାଲବାହୀ ଟ୍ରେନରେ ପ୍ରମିଳାଙ୍କ ଗୋଡ଼ କଟିଯାଇଥିଲା। ଗୋଡ଼ କଟିଯିବା ପରେ ଟ୍ରେନ୍ରେ ସାର୍ଟ ଲାଗିଯିବାରୁ ପ୍ରମିଳା ଘୋଷାରି ହୋଇଯାଇଥିଲେ। ଏହି ସମୟରେ ବଦ୍ରା ପ୍ରମିଳାଙ୍କୁ ଟ୍ରେନ ତଳୁ ଟାଣି ଆଣି ୪ ଶହ ମିଟର ବସ୍ତି ପର୍ଯ୍ୟନ୍ତ ବୋହି ନେଇଥିଲେ। ଏହି ସାହସିକତା ପାଇଁ ବଦ୍ରାଙ୍କ ନଁା ତାଳଚେର ଉପଜିଲାପାଳ ଓ ଅନୁଗୋଳ ଜିଲାପାଳଙ୍କ ସୁପାରିସକ୍ରମେ ରାଜ୍ୟ କ୍ରୀଡ଼ା ଓ ଯୁବ ସେବା ବିଭାଗକୁ ପଠାଯାଇଥିଲା।