ଆନନ୍ଦପୁର, ୧। ୮(ସ୍ବ.ପ୍ର.)-କେନ୍ଦୁଝର ଜିଲା ରାମଚନ୍ଦ୍ରପୁର ଥାନା ଅଧୀନ କୃଷ୍ଣପୁର ଗ୍ରାମର ଏକ ବଧୂ ହତ୍ୟା ମାମଲାରେ ରାୟ ଗୁରୁବାର ପ୍ରକାଶ ପାଇଛି। ସ୍ବାମୀ, ଶାଶୁ , ଶ୍ୱଶୁରଙ୍କୁ ୧୦ ବର୍ଷ ଓ ନଣନ୍ଦଙ୍କୁ ୭ ବର୍ଷ ଜେଲଦଣ୍ଡାଦେଶ ହୋଇଛି। ଆନନ୍ଦପୁର ଅତିରିକ୍ତ ଜିଲା ଦୌରାଜଜ୍ ରାଜେଶ ଦାଶ ଏହି ଦଣ୍ଡାଦେଶ ଶୁଣାଇଛନ୍ତି। ସୂଚନାମୁତାବକ, ନନ୍ଦିପଦା ଥାନା ଗିରିଗାଁ ଗ୍ରାମର ଗଣେଶ ସ୍ବାଇଁଙ୍କ ଝିଅ ରମାମଣି ତା୯।୬।୨୦୧୪ରିଖରେ ଘସିପୁରା ବ୍ଲକ କୃଷ୍ଣପୁର ଗ୍ରାମର ବସନ୍ତ ଓଝାଙ୍କ ପୁଅ ଗଣେଶ ଓରଫ ଦୟାନିଧି ଓଝାଙ୍କୁ ବୈଦିକ ରୀତିରେ ଘସିପୁରା ଝାଡେଶ୍ୱର ମନ୍ଦିରରେ ବିବାହ କରିଥିଲେ। ବିବାହ ସମୟରେ ଦାବି ମୁତାବକ ଯାନୀ ଯୌତୁକ ଦିଆଯାଇଥିଲା। କିଛି ମାସ ପରେ ଅଧିକ ଯୌତୁକ ଦାବି କରି ଶ୍ୱଶୁର ଘର ଲୋକେ ରମାମଣିଙ୍କୁ ମାରି ଟାଙ୍ଗି ଦେଇଥିବା ରମାମଣିଙ୍କ ଭାଇ ଅଲେଖ ସ୍ବାଇଁ ରାମଚନ୍ଦ୍ରପୁର ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (୧୦୪/୧.୧୦.୨୦୧୫) ରୁଜୁ କରିଥିଲା। ଜିଆର୍ (ନଂ ୫୩୩/୨୦୧୫) କୋର୍ଟ ସ୍ବାମୀ ଗଣେଶ, ଶ୍ୱଶୁର ବସନ୍ତ , ଶାଶୁ ଜହ୍ନ, ନଣନ୍ଦ କୁନିକୁ ମୁଦାଲା ଭାବେ ଗ୍ରହଣ କରି ଦଣ୍ଡାଦେଶ ପ୍ରଦାନ କରିଛନ୍ତି। ସାକ୍ଷୀ ପ୍ରମାଣକୁ ଆଧାର କରି ୪୯୮(ଏ),୩୪ ଧାରାରେ ସ୍ବାମୀ , ଶାଶୁ , ଶ୍ୱଶୁର ଓ ନଣନ୍ଦକୁ ୨ ବର୍ଷ ଜେଲ୍ ଦଣ୍ଡ ଓ ୧୦ ହଜାର ଜରିମାନା, ୪ଡିପି ଆକ୍ଟରେ ସମସ୍ତଙ୍କୁ ୧ ବର୍ଷ ଜେଲ୍ ଦଣ୍ଡ ଓ ୫ ହଜାର ଟଙ୍କା ଜରିମାନା ଏବଂ ୩୪-ବି, ୩୪ ଧାରରେ ସ୍ବାମୀ, ଶାଶୁ, ଶ୍ୱଶୁରଙ୍କୁ ୧୦ ବର୍ଷ ଜେଲ ଦଣ୍ଡ ସହ ନଣନ୍ଦ କୁନିର ବୟସ ଏବଂ ଏକ ଛୋଟ ପିଲା ଥିବାରୁ ତାକୁ ଦୃଷ୍ଟିରେ ରଖି ମାନ୍ୟବର କୋର୍ଟ ତାଙ୍କୁ ୭ ବର୍ଷ ଜେଲ ଦଣ୍ଡାଦେଶ ଦିଆଯାଇଛି। ସେସନ୍ ଟ୍ରାଏଲ୍ କେସ୍ (ନଂ ୪୬/୮୪) ଜରିମାନା ଅନାଦେୟ ଅଧିକ ୬ ମାସ ଜେଲଦଣ୍ଡ ଭୋଗିବାକୁ ପଡିବ ବୋଲି ରାୟ ପ୍ରକାଶ ପାଇଛି। ସରକାରୀ ଓକିଲ ଭାବେ ବରିଷ୍ଠ ଆଇନଜୀବୀ ମହେନ୍ଦ୍ର ମହାପାତ୍ର ମାମଲା ପରିଚାଳନା କରିଥିଲେ।