ବଡ଼ବିଲ,୧୩।୬(ସ୍ବ.ପ୍ର.)- କେନ୍ଦୁଝର ଜିଲା ବଡବିଲ ବନବିଭାଗ ଗୁଆଲି ନିକଟରେ ଶୁକ୍ରବାର ରାତିରେ ଚଢାଉ କରି ଏକ କାଠ ବୋଝେଇ ପିକଅପ ଗାଡିକୁ ଜବତ କରିଛି। ଏଥିସହ ଚାଳକ ଚମ୍ପୁଆ ଅଞ୍ଚଳର ଏମ.ଡି ଇଶାକଙ୍କୁ ଗିରଫ କରି ଶନିବାର କୋର୍ଟଚାଲାଣ କରିଛି।
ବନବିଭାଗ ସୂତ୍ରରୁ ପ୍ରକାଶ, ଏକ ପିକଅପ ଗାଡ଼ି(ଜେଏଚ୦୫ ସିଏମ୮୪୧୦)ରେ ସୁନ୍ଦରଗଡ଼ ଜିଲା କୋଇଡ଼ାରୁ ପିଆଶାଳ କାଠ ଗଣ୍ଡି ବୋଝେଇ କରି ଝାଡ଼ଖଣ୍ଡ ରାଜ୍ୟ ମଝିଗାଁକୁ ଚୋରାଚାଲାଣ ହେଉଥିଲା। ଖବରପାଇ ବଡବିଲ ବନବିଭାଗ କର୍ମଚାରୀମାନେ ଚଢାଉ କରି ଉକ୍ତ ଗାଡିରୁ ୧୫ ଖଣ୍ଡ ପିଆଶାଳ କାଠ ଗଣ୍ଡି ଜବତ କରିଥିଲେ। ଏହାର ଆନୁମାନିକ ମୂଲ୍ୟ ପ୍ରାୟ ଦେଢ ଲକ୍ଷ ଟଙ୍କାରୁ ଊର୍ଦ୍ଧ୍ୱ ଟଙ୍କା ହେବ ବୋଲି ବନବିଭାଗ ପକ୍ଷରୁ ସୂଚନା ମିଳିଛି।