ରାଜନଗର,୧୯।୧୨(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ରାଜନଗର ବ୍ଲକ କଂଗ୍ରେସ କାର୍ଯ୍ୟାଳୟରେ ବୁଧବାର ରାଜନଗର ବନବିଭାଗ ପକ୍ଷରୁ ବାର୍ହା ମାଂସ ଜବତ କରିବା ଲାଗି ଚଢ଼ାଉ କରାଯାଇଥିଲା। ହେଲେ ଚଢ଼ାଉ ସମୟରେ ବାର୍ହା ମାଂସ ନ ପାଇ ବନ ବିଭାଗ ଫେରି ଆସିଥିଲେ। ଏହାକୁ ନେଇ ବ୍ଲକର ଶତାଧିକ କଂଗ୍ରେସ କର୍ମୀ ବ୍ଲକ ସଭାପତି ଚୌଧୁରୀ ରବୀନ୍ଦ୍ର ରାଉତରାୟଙ୍କ ନେତୃତ୍ୱରେ ସମ୍ମାନ ଫେରାଇବା ଦାବି ନେଇ ଡିଏଫ୍ଓଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ରାଜନଗର ଏସିଏଫ୍ଓ ହରେକୃଷ୍ଣ ମଲିକ ଧାରଣାରତ କଂଗ୍ରେସ କର୍ମୀଙ୍କ ସହ ଆଲୋଚନା କରି ଏହି ଚଢ଼ାଉ ନେଇ ପ୍ରକୃତ ସତ୍ୟାସତ୍ୟ ତଦନ୍ତ କରାଯିବ। ଏଥିରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିବା ଜଣାପଡ଼ିଛି।
