ବନ୍ତ,୨୧।୫(ଡି.ଏନ୍.ଏ.)-କରୋନା ମହାମାରୀ ମୁକାବିଲା ପାଇଁ ଗତ ମାର୍ଚ୍ଚ ଶେଷ ସପ୍ତାହଠାରୁ ଦେଶରେ ଲକଡାଉନ ଜାରି ରହିଛି। ସେହିଦିନଠାରୁ ଭଦ୍ରକ ଜିଲା ବନ୍ତ ବଜାରର ସମସ୍ତ ବ୍ୟବସାୟ ପ୍ରତିଷ୍ଠାନ ବନ୍ଦ ରହିଥିଲା। ପରେ କେନ୍ଦ୍ର ସରକାର ୪ର୍ଥ ପର୍ଯ୍ୟାୟ ଲକ୍ ଡାଉନ୍ ଘୋଷଣା କରିଛନ୍ତି। ଏ ନେଇ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ କଟକଣା ଲାଗୁ କରିଛନ୍ତି। ଗୁରବାର ବନ୍ତ ବଜାରର ସମସ୍ତ ଦୋକାନ ଖୋଲା ରହିଛି। ଶୁକ୍ରବାର ସାବିତ୍ରୀ ବ୍ରତ ଥିବାରୁ ବଜାରରେ ଲୋକଙ୍କ ଭିଡ ଦେଖିବାକୁ ମିଳିଛି। ମାତ୍ର ଦୋକାନ ଖୋଲିବା ନେଇ ବ୍ୟବସାୟୀମାନେ ଦ୍ୱନ୍ଦରେ ପଡିଛନ୍ତି। ଜିଲା ପ୍ରଶାସନସ୍ତରରେ ପ୍ରତ୍ୟେକ ରିଟେଲ୍ ସପ୍ ସକାଳ ୭ଟାରୁ ସା ୬ଟା ଏବଂ ଔଷଧ ଦୋକାନ ଓ ପେଟ୍ରୋଲ ପମ୍ପ୍ ସକାଳ ୭ଟାରୁ ରାତି ୧୦ଟା ପର୍ଯ୍ୟନ୍ତ ଖୋଲା ରଖିବା ପାଇଁ ନିର୍ଦ୍ଦେଶ ହୋଇଛି। ଏପରିସ୍ଥଳେ ବ୍ଲକ ପ୍ରଶାସନ ପକ୍ଷରୁ କୌଣସି ବିଧିବଦ୍ଧ ସୂଚନା ଡାକବାଜି ଯନ୍ତ୍ର ସହାୟତାରେ ବ୍ୟବସାୟୀମାନଙ୍କୁ ଦିଆଯାଇ ନାହିଁ। ଫଳରେ ବନ୍ତ ବ୍ଲକର ବିଭିନ୍ନ ବଜାରର ବ୍ୟବସାୟୀମାନେ ଦ୍ୱନ୍ଦରେ ପଡିଛନ୍ତି। ବ୍ୟବସାୟୀମାନେ କହିଛନ୍ତି, ଆମେ ଦୋକାନ ଖୋଲିବା ପରେ ପ୍ରଶାସନ ଆସି ଦୋକାନ ବନ୍ଦ କରିବ ଏବଂ ଆମ ଉପରେ ଜରିମାନା ଲାଗୁ କରିବ। ତେଣୁ ବ୍ଲକ ପ୍ରଶାସନ ତରଫରୁ ଡାକବାଜି ଯନ୍ତ୍ର ଯୋଗେ ଦୋକାନ ଖୋଲାଯିବା ସମ୍ପର୍କରେ ସୂଚନା ଦିଆଯାଉ ବୋଲି ସେମାନେ ଦାବି କରିଛନ୍ତି।