ରସୁଲପୁର,୧୧।୪(ଡିଏନଏ): ହାଟଗୁଡିକରେ ସାମାଜିକ ଦୂରତ୍ୱ ଓ ସଂଗରୋଧ ରକ୍ଷା କରାଯାଉ ନ ଥିବାରୁ ଏହାକୁ କରୋନା ପାଇଁ ଉଷ୍ମପ୍ରବଣ ଅଞ୍ଚଳ ବୋଲି ମନେ କରାଯାଉଛି। ଏହିକ୍ରମରେ ପ୍ରଶାସନ ସମଗ୍ର ରାଜ୍ୟରେ ହାଟଗୁଡିକୁ ବିଭାଜିତ କରିବା ସହ ଖୋଲା ସ୍ଥାନକୁ ସ୍ଥାନାନ୍ତରିତ କରିଛି। ଏହାସତ୍ତ୍ୱେ ଗ୍ରାମାଞ୍ଚଳର ସାପ୍ତାହିକ ହାଟଗୁଡିକରେ କରୋନା କଟକଣାକୁ ଆଦୌ ଗୁରୁତ୍ୱ ଦିଆଯାଉ ନାହିଁ। ଏହିକ୍ରମରେ ଯାଜପୁର ଜିଲାର ରସୁଲପୁର ବ୍ଲକ ବଡକଇଁଚି ପଞ୍ଚାୟତର ମଧୁବନ ହାଟକୁ ଶନିବାରଠାରୁ ପ୍ରଶାସନ ବନ୍ଦ କରିବାକୁ ଘୋଷଣା କରିଛି। ଏନେଇ ପ୍ରଶାସନ ବାରମ୍ବାର ତାଗିଦ୍ କରିବା ପରେ ବି ହାଟ ପରିଚାଳକ, ବ୍ୟବସାୟୀ, ଚାଷୀ, ଗ୍ରାହକ ସମୂହ କରୋନା କଟକଣା ଅବମାନନା କରିବାରୁ ଏଭଳି ନିଷ୍ପତି ନେଇଛି। ଏହାଛଡା ଏହି ବ୍ଲକ ଅଧୀନ କଲଣ, ତରାପୁର, ବାଲିପାଟଣା, ହରିପୁର, ନଠୁଆବର ଆଦି ହାଟକୁ ଖୋଲା ପଡ଼ିଆକୁ ସ୍ଥାନାନ୍ତର କରାଯାଇଛି ା ଏହିସବୁ ହାଟ ପରିଚାଳନା ଦାୟିତ୍ୱରେ ଥିବା କର୍ମକର୍ତ୍ତାଙ୍କ ମଧ୍ୟରୁ ୫ଜଣଙ୍କୁ ନେଇ ଏକ କମିଟି ଗଠନ କରାଯାଇଛି। ଉକ୍ତ କମିଟି ହାଟ ପରିଚାଳନାବେଳେ କରୋନା କଟକଣାକୁ ତଦାରଖ କରିବେ। କଟକଣା ଭଙ୍ଗ ହେଲେ ଦାୟିତ୍ୱରେ ଥିବା ବ୍ୟକ୍ତିଙ୍କୁ ଦାୟୀ କରାଯିବ। ଏଥିସହ ହାଟକୁ ଅନିର୍ଦ୍ଦିଷ୍ଟକାଳ ପର୍ଯ୍ୟନ୍ତ ବନ୍ଦ କରିଦିଆଯିବ ବୋଲି ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ସହାୟତାରେ ପ୍ରଚାର କରି ଜନସାଧାରଣଙ୍କୁ ସଚେତନ କରାଯାଇଛି।