ଭୁବନେଶ୍ୱର,୧୭ା୨(ବ୍ୟୁରୋ): ଖଣ୍ଡଗିରି ଥାନା ଗଣ୍ଡମୁଣ୍ଡାରେ ବନ୍ଧୁକ ବିକ୍ରି କରୁଥିବାବେଳେ କ୍ରାଇମବ୍ରାଞ୍ଚ ଏସ୍ଟିଏଫ୍ ହାତରେ ଧରାପଡ଼ିଥିଲେ ଛାଡ଼ଖଣ୍ଡର ବିବିଏ ଛାତ୍ର ସାନୁ ପାଦର ଓ ଖଣ୍ଡଗିରିର ସୁରେଶ ପାଣିଗ୍ରାହୀ। ଉଭୟଙ୍କୁ ଏସ୍ଟିଏଫ୍ ଶୁକ୍ରବାରଠାରୁ ୪ ଦିନିଆ ରିମାଣ୍ଡରେ ଆଣି ପଚରାଉଚରା କରୁଛି। ଦୁଇ ବନ୍ଧୁକ ବେପାରୀଙ୍କୁ ଏସ୍ଟିଏଫ୍ ଡିଆଇଜି ଏକ ଗୁପ୍ତ ସ୍ଥାନରେ ରଖି ପଚରାଉଚରା କରୁଥିଲେ। ଜେରାବେଳେ ଏସ୍ଟିଏଫ୍କୁ ଏକ ବଡ଼ ସୁରାକ ମିଳିଛି। ଦୁଇ ଅଭିଯୁକ୍ତ ବନ୍ଧୁକ ଆଣୁଥିବା ଡିଲରଙ୍କ ଠିକଣା ଏସ୍ଟିଏଫ୍ ହାତରେ ଲାଗିଛି। ଏହି ଆଧାରରେ ଏକ ଟିମ୍ ସେମାନଙ୍କୁ ଧରି ବନ୍ଧୁକ ଡିଲର ଓ ଅନ୍ୟଜଣେ ବନ୍ଧୁକ ବେପାରୀଙ୍କୁ ଧରିବାକୁ ଯୋଜନା ହୋଇଥିବା ସୂଚନା ମିଳିଛି।
ସୂଚନା ଅନୁଯାୟୀ, ଏହି ଟିମ୍ ଉଭୟଙ୍କୁ ଓଡ଼ିଶା ଏବଂ ଛତିଶଗଡ଼ ସୀମାକୁ ନେବେ। ସୀମାରେ ଜଣେ ଡିଲର ସାନୁଙ୍କୁ ବନ୍ଧୁକ ଦେଇଥାନ୍ତି। ସାନୁ ଉକ୍ତ ବନ୍ଧୁକ ଓଡ଼ିଶା ଆଣି ବିକ୍ରି କରିଥାନ୍ତି। ତେଣୁ ଏସ୍ଟିଏଫ୍ ୨ଜଣଙ୍କୁ ରିମାଣ୍ଡରେ ଆଣିବା ପରେ ସାନୁ ବନ୍ଧୁକ ଆଣୁଥିବା ଡିଲର ସହ ଯୋଗାଯୋଗ କରିଥିଲେ। ଏପରି କି ଏସ୍ଟିଏଫ୍ ଅନ୍ୟ ଏକ ଫୋନ୍ ନମ୍ବର ସାହାଯ୍ୟରେ ଉକ୍ତ ଡିଲରଙ୍କୁ ବନ୍ଧୁକ ଦେବା ପାଇଁ ଡକାଇଛନ୍ତି। ଉକ୍ତ ଡିଲର ଜଣକ ସୋମବାର ବନ୍ଧୁକ ଆଣି ଓଡ଼ିଶା ଛତିଶଗଡ଼ ସୀମାରେ ଦେବେ। ତେଣୁ ଉକ୍ତ ଡିଲରଙ୍କୁ ଧରିବା ପାଇଁ ଏସ୍ଟିଏଫର ଏକ ଟିମ୍ ଜାଲ ବିଛାଇଛି। ସେଠାରୁ ପୁଣି ଏସ୍ଟିଏଫ୍ ଟିମ୍ ଦୁଇ ଅଭିଯୁକ୍ତଙ୍କୁ ଧରି କୋରାପୁଟ ଯାଇ ସମ୍ପୃକ୍ତ ଅନ୍ୟଜଣଙ୍କୁ ଧରିବାକୁ ଏସ୍ଟିଏଫ୍ ଯୋଜନା କରିଛି। ଯୋଜନା କାର୍ଯ୍ୟକାରୀ ହେଲେ ଏସ୍ଏଫ୍କୁ ବଡ ସଫଳତା ମିଳିବ ବୋଲି କୁହାଯାଉଛି।