ତିର୍ତ୍ତୋଲ,୧୬।୯(ଡି.ଏନ୍.ଏ.): ଜଗତସିଂହପୁର ଜିଲା ତିର୍ତ୍ତୋଲ ଥାନା ଅନ୍ତର୍ଗତ ତରଜଙ୍ଗା ପଞ୍ଚାୟତ ବଫାପୁର ପ୍ରାଥମିକ ବିଦ୍ୟାଳୟର ଶିକ୍ଷୟିତ୍ରୀ ସୁଜାତା ମଲ୍ଲିକଙ୍କ ଠାରୁ ସୋମବାର ବନ୍ଧୁକ ଦେଖାଇ ସୁନାହାର ନେଇ ଯାଇଛନ୍ତି ଦୁର୍ବୃତ୍ତ। ସେ ଆଜି ସକାଳେ ଶ୍ରେଣୀରେ ପଢ଼ାଉଥିବା ସମୟରେ ଦୁଇଜଣ ଯୁବକ ଏକ ବାଇକ୍ରେ ଆସି ବିଦ୍ୟାଳୟ ନିକଟରେ ଅଟକିଥିଲେ। ଯୁବକ ଦ୍ୱୟଙ୍କ ମଧ୍ୟରୁ ଜଣେ ଶିକ୍ଷୟିତ୍ରୀଙ୍କ ପାଖକୁ ଆସି କଥା ହେବା ଆଳରେ ବନ୍ଧୁକ ଦେଖାଇ ସୁନାହାର ବେକରୁ ଖୋଲି ଦେବାକୁ କହିଥିଲେ। ଭୟରେ ଶିିକ୍ଷୟିତ୍ରୀ ହାର ଖୋଲି ଦେବା ପରେ ଯୁବକ ଜଣକ ପୂର୍ବରୁ ପ୍ରସ୍ତୁତ ଥିବା ବାଇକ ଚାଳକଙ୍କ ପଛରେ ବସି ଚାଲିଯାଇଥିଲେ। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।