ସୁକିନ୍ଦା, ୫।୬ (ଡି.ଏନ୍.ଏ.)-ଯାଜପୁର ଜିଲା ସୁକିନ୍ଦା କ୍ରୋମ୍ ଉପାତ୍ୟାକାକୁ ସଂଯୋଗ କରୁଥିବା ଟମକା-ମଙ୍ଗଳପୁର ରାସ୍ତାରେ ଶୁକ୍ରବାର ଦିନ ଦ୍ୱିପ୍ରହରରେ ଲୁଟେରାମାନେ ବନ୍ଧୁକ ଦେଖାଇ ଫାର୍ମା କମ୍ପାନୀର ଦୁଇ କର୍ମଚାରୀଙ୍କଠାରୁ ନଗଦ ୬୦ହଜାର ଟଙ୍କା ଓ ଅନ୍ୟାନ୍ୟ ସାମଗ୍ରୀ ଲୁଟି ନେଇଛନ୍ତି। ଖବରପାଇ ସୁକିନ୍ଦା ଥାନା ପୋଲିସ ଘଟଣାସ୍ଥଳରେ ପହଞ୍ଚତ୍ ଘଟଣାର ତଦନ୍ତ ଜାରି ରଖିଛି।
ଘଟଣା ମୁତାବକ, ଜାରକା ଅଞ୍ଚଳରେ ମେଡିସିନ ଡିଷ୍ଟ୍ରିବ୍ୟୁଟର ଓ ମେଡିସିନ ରିପ୍ରେଜେଣ୍ଟେଟିଭ ଭାବେ କାମ କରୁଥିବା ଦୁଇ କର୍ମଚାରୀ ରମେଶ ଦାସ ଓ ସଞ୍ଜୟ କୁମାର ଦାସ ଶୁକ୍ରବାର ଅପରାହ୍ନରେ କେତେକ ମେଡିସିନ ଷ୍ଟୋରରୁ ବକେୟା ଅର୍ଥ ଆଦାୟ କରି ବାଇକ୍ (ନଂ.-ଓଡ଼ି-୦୪ପି-୪୨୪୦) ଯୋଗେ ଫେରୁଥିଲେ। ଏହି ସମୟରେ ଟମକା-ମଙ୍ଗଳପୁର ରାସ୍ତାର ସୁକିନ୍ଦା ବ୍ଲକ ଦାମୋଦରପୁର ମଙ୍ଗଳା ମନ୍ଦିର ସନ୍ନିକୋଟଠାରେ ଏକ ନମ୍ବର ବିହୀନ କଳା ପଲ୍ସରରେ ଯାଉଥିବା ଦୁଇ ଜଣ ବ୍ୟକ୍ତି ସେମାନଙ୍କୁ ଅଟକାଇଥିଲେ। ଭୁଜାଲି ଓ ବନ୍ଧୁକ ଦେଖାଇ ସେମାନଙ୍କଠାରୁ ନଗଦ ୬୦ହଜାର ଟଙ୍କା, ଏକ ମୋବାଇଲ, ଦୁଇଟି ବ୍ୟାଗ୍ ସହ ବହୁ କାଗଜପତ୍ର ଲୁଟି ନେଇଥିଲେ। ଖବରପାଇ ଏସ୍ଆଇ ଅନ୍ତର୍ଯ୍ୟାମୀ ଶ୍ରୀଚନ୍ଦନଙ୍କ ନେତୃତ୍ୱରେ ଏକ ଟିମ୍ ଘଟଣାସ୍ଥଳରେ ପହଞ୍ଚତ୍ଜ ଛାନଭିନ ଆରମ୍ଭ କରିଛନ୍ତି। ଏ ନେଇ ଥାନାରେ ଅଭିଯୋଗ ହେବା ପରେ ପୋଲିସ ମାମଲା ରୁଜୁ କରି ତଦନ୍ତ ଜାରି ରଖିଛି।