ପାଟଣା,୧୭ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଢେଙ୍କିକୋଟ ଦେଇ ଯାଇଥିବା ୨୨୦ ନମ୍ବର ଜାତୀୟ ରାଜପଥର କାଶିଆ ଜଙ୍ଗଲ ହନୁମାନ ମନ୍ଦିର ନିକଟରେ ସୋମବାର ଅପରାହ୍ନରେ ଏକ ବାଇକ୍ ଭାରସାମ୍ୟ ହରାଇ ଏକ ଶାଳ ଗଛରେ ପିଟି ହୋଇଛି। ଏଥିରେ ଜଣଙ୍କର ମୃତ୍ୟୁ ଘଟିଥିବା ବେଳେ ୨ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ମୃତକ ହେଲେ ପାଟଣା ଥାନା ଟଭାସରୁଆ ଗ୍ରାମ ଖୁଞ୍ଚିବେଡା ସାହିର ମଙ୍ଗୁ ମୁଣ୍ଡା(୨୨) । ଗୁରୁତର ଦ୍ୱୟ ହେଲେ ଯାଜପୁର ଜିଲା ଜେନାପୁର ଥାନା ଆରୁଆ ଗ୍ରାମର ପପୁ ସିଂ ଓ ଟୁଣୀଆ ଦାସ।
ସୂଚନା ମୁତାବକ, ମଙ୍ଗୁ ଆରୁଆର ଏକ କ୍ରଶରରେ କାମ କରନ୍ତି। ବନ୍ଧୁ ପପୁ ଓ ଟୁଣୀଆ ତାଙ୍କୁ ଖୁଞ୍ଚି ବେଡାରେ ଛାଡିବା ପାଇଁ ବାଇକ(ଓଏମ୍୮୪୭୪)ଯୋଗେ ବାହାରିଥିଲେ। ହନୁମାନ ମନ୍ଦିର ନିକଟରେ ବାଇକ୍ ଭାରସାମ୍ୟ ହରାଇ ଏକ ଗଛକୁ ଧକ୍କା ଦେଇଥିଲା। ଘଟଣା ସ୍ଥଳରେ ମଙ୍ଗୁଙ୍କର ମୃତ୍ୟୁ ଘଟିଛି। ଗୁରୁତର ପପୁ ଓ ଟୁଣୀଆଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ଜଣାପଡ଼ିଛି।