ଭଞ୍ଜନଗର,୬।୭(ଡି.ଏନ.ଏ.)-ବନ୍ୟଜନ୍ତୁ ସୁରକ୍ଷା ପାଇଁ ସାଉଥ୍କୋ ଏବଂ ଜଙ୍ଗଲ ବିଭାଗ ମଧ୍ୟରେ ବିଭିନ୍ନ ସମୟରେ ସମନ୍ବୟ ବୈଠକ ହେଉଛି। ମିଳିତ ପାଟ୍ରୋଲିଂ କରିବାକୁ ନିଷ୍ପତ୍ତି ନିଆଯାଇଥିଲେ ମଧ୍ୟ ଏହା କାଗଜ କଲମରେ ରହିଯାଉଛି । ଯାହାର ଫାଇଦା ନେଉଛନ୍ତି ବନ୍ୟଜନ୍ତୁ ଶିକାରୀ। ସେମାନେ ରାତି ହେଲେ ଜଙ୍ଗଲ ରାସ୍ତା ଦେଇ ଯାଇଥିବା ବିଦ୍ୟୁତ୍ ତାରରେ ହୁକିଂ କରି ଶିକାର କରୁଥିବାରୁ ଫ୍ୟୁଜ୍ ଚାଲିଯାଉଛି। ଏହାକୁ ରୋକିବା ପାଇଁ ସାଉଥ୍କୋ ପକ୍ଷରୁ ରାତିରେ ଲାଇନ କାଟି ଦିଆଯାଉଥିବା ଅଭିଯୋଗ ହେଉଛି। ଭଞ୍ଜନଗର ଉତ୍ତର ଘୁମୁସର ବନଖଣ୍ଡ କେନ୍ଦ୍ରୀୟ ବନାଞ୍ଚଳର ନାଟେଙ୍ଗା, ଗୋବରା, କଣ୍ଟେଇପଲ୍ଲୀ ଆଦି ଅଞ୍ଚଳରେ ରାତିରେ ବିଦ୍ୟୁତ୍ କାଟ୍ ହେଉଛି। ଏପଟେ ଲୋକେ ନାହିଁ ନ ଥିବା ହଇରାଣ ହେଉଛନ୍ତି। ପାଟ୍ରୋଲିଂ କଡ଼ାକଡ଼ି କିମ୍ବା ବିକଳ୍ପ ବ୍ୟବସ୍ଥା କରା ନ ଯାଇ ଏଭଳି ବିଦ୍ୟୁତ୍ କାଟ କରାଗଲେ ଆଗାମୀ ଦିନରେ ଲୋକେ ଆନ୍ଦୋଳନକୁ ଓହ୍ଲାଇବେ ବୋଲି ଶ୍ରୀକରପୁର ଗ୍ରାମର ଆଇନଜୀବୀ ଚନ୍ଦ୍ରମଣି ମହାପାତ୍ର କହିଛନ୍ତି। ଏ ନେଇ ସାଉଥ୍କୋ ଯନ୍ତ୍ରୀ ରତ୍ନାକର ତ୍ରିପାଠୀ ବନ୍ୟଜନ୍ତୁ ପାଇଁ ବିଦ୍ୟୁତ୍ କାଟ ହେଉଥିବା ଅଭିଯୋଗକୁ ଖଣ୍ଡନ କରିଛନ୍ତି । ସେ କହିଛନ୍ତି, କେଉଁ କାରଣରୁ ରାତି ହେଲେ ଫ୍ୟୁଜ୍ ଚାଲିଯାଉଛି ତାହା ଠିକ୍ ଭାବେ ଜଣାପଡ଼ୁନାହିଁ । ପ୍ରାୟ ୮ଦିନ ହେବ ଏହି ସମସ୍ୟା ଲାଗି ରହିଛି । ସକାଳେ ବିଦ୍ୟୁତ୍ ସେବା ସ୍ବାଭାବିକ ହୋଇଯାଉଛି। ଶୁକ୍ରବାର ରାତିରେ ବିଭିନ୍ନ ଅଞ୍ଚଳ ଯାଞ୍ଚ କରାଯାଇଥିଲେ ମଧ୍ୟ ତ୍ରୁଟି ଜଣାପଡ଼ିନି। ତଥାପି କାକର ପଡ଼ିଲେ କିମ୍ବା ବର୍ଷା ହେଲେ ଏଭଳି ସମସ୍ୟା ଉପୁଜିପାରେ । ଆଗାମୀ ଦିନରେ ଏହି ସମସ୍ୟା ଦୂର ହେବ ବୋଲି ଯନ୍ତ୍ରୀ କହିଛନ୍ତି।