ଶିମ୍ଲା,୨୦।୮: ଦେଶର ବହୁ ରାଜ୍ୟ ଏବେ ବନ୍ୟା ଘେରରେ ରହିଛି। ତେବେ ବନ୍ୟା ପ୍ରଭାବିତ ଅଞ୍ଚଳରେ ଫଶି ରହିଥିବା ମାଲାୟାଲମର ଜଣାଶୁଣା ଅଭିନେତ୍ରୀ ମଞ୍ଜୁ ଓ୍ବାରିୟର, ନିର୍ଦ୍ଦେଶକ ଓ ତାଙ୍କର କିଛି ସାଥୀଙ୍କୁ ମଙ୍ଗଳବାର ଅପରାହ୍ନରେ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ଜଣାପଡ଼ିଛି। ସୂଚନାଯୋଗ୍ୟ, ହିମାଚଳ ପ୍ରଦେଶର ଚତରୁ ଅଞ୍ଚଳରେ ଅଭିନେତ୍ରୀ ମଞ୍ଜୁ, ନିର୍ଦ୍ଦେଶକ ସନଲ କୁମାର ଶଶିଧରନଙ୍କ ସମେତ ଫିଲ୍ମର କିଛି କ୍ରିୟୁ ମେମ୍ବର ବନ୍ୟାପାଣି ଘେରରେ ଫଶି ଯାଇଥିଲେ। ତେବେ ଉଦ୍ଧାର ପାଇଁ ଅଭିନେତ୍ରୀ ଜଣଙ୍କ ସାଟେଲାଇଟ ଫୋନ ସାହାଯ୍ୟରେ ତାଙ୍କ ଭାଇଙ୍କୁ ଫୋନ କରି ଜଣାଇଥିଲେ। ଏହାପରେ ମଞ୍ଜୁଙ୍କ ଭାଇ ମଧୁ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଏନେଇ ଜଣାଇବା ସହ ଉଦ୍ଧାର ପାଇଁ ସାହାଯ୍ୟ ଲୋଡିଥିଲେ। ତେବେ ବନ୍ୟା ଯୋଗୁ ଉକ୍ତ ଅଞ୍ଚଳରେ ମୋବାଇଲ ନେଟଓ୍ବାର୍କ ବାଧାପ୍ରାପ୍ତ ହୋଇଥିବାରୁ କାହା ସହ ସମ୍ପର୍କ ହୋଇପାରୁନାହିଁ।