କେଶିଙ୍ଗା, ୨୭।୮(ଡି.ଏନ୍.ଏ.): କଳାହାଣ୍ଡି ଜିଲା କେଶିଙ୍ଗା ବ୍ଲକର ୫ ପଞ୍ଚାୟତ ଗତ ବନ୍ୟାରେ ବ୍ୟାପକ କ୍ଷୟକ୍ଷତି ହୋଇଥିଲା। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଷ୍ଟେଟ୍ ୟୁଥ୍ ଓ୍ବେଲ୍ଫେୟାର ବୋର୍ଡର ସଭାପତି ବିଜୟ କୁମାର ନାଏକ, କଳାହାଣ୍ଡି ଜିଲା ପ୍ରକଳ୍ପ ଅଧିକାରୀ, କେଶିଙ୍ଗା ବିଡିଓ ଭୀମସେନ ଶବର ପ୍ରମୁଖ ମଙ୍ଗଳବାର ଉକ୍ତ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରିଥିବା ଜଣାପଡ଼ିଛି। ଏହି ଅବସରରେ ପଞ୍ଚାୟତ ସମିତି ସଭାଗୃହରେ ଏକ ସଭାର ଆୟୋଜନ କରାଯାଇଥିଲା। ଏଥିରେ ସଭାପତି ପ୍ରକାଶ କରିଥିଲେ ଯେ, କେଶିଙ୍ଗା ବିଜୁ ବାହିନୀର ଅଗ୍ରଗତି ଏବଂ ବିଜୁ ବାହିନୀ ଦ୍ୱାରା ମୁଖ୍ୟମନ୍ତ୍ରୀ ବହୁ ଉପକୃତ ହୋଇଥିବାରୁ ପୁନର୍ବାର ବିଜୁ ବାହିନୀର କାର୍ଯ୍ୟକ୍ରମକୁ ଆଗେଇ ନେବା ପାଇଁ ନାଏକଙ୍କୁ ମୁଖ୍ୟମନ୍ତ୍ରୀ ଦାୟିତ୍ୱ ଦେଇଛନ୍ତି। ସଭାରେ ଜିଲା ପ୍ରକଳ୍ପ ଅଧିକାରୀ ଜ୍ଞାନରଞ୍ଜନ ଭଞ୍ଜଦେଓ, କେଶିଙ୍ଗା ବିଡିଓ ପ୍ରମୁଖ ନିଜସ୍ବ ମତ ପ୍ରକାଶ କରି ଗତ ବନ୍ୟାରେ କ୍ଷୟକ୍ଷତି ହୋଇଥିବା ବିଭିନ୍ନ ଅଞ୍ଚଳ ବୁଲି ଦେଖିଥିଲେ।
