ବଲାଙ୍ଗୀର ଅଫିସ/ପୁଇଁତଲା, ୨୦ା୧୧ (ଡି.ଏନ୍.ଏ.)-ବଲାଙ୍ଗୀର ଜିଲାରେ ଗତ ଅଗଷ୍ଟ ମାସରେ ପ୍ରଳୟଙ୍କରୀ ବନ୍ୟା ବିତ୍ପାତ ଦେଖାଦେଇଥିଲା। ରାସ୍ତାଘାଟ ଧୋଇ ହୋଇଯିବା ସହ ଘରଦ୍ୱାର ଭାଙ୍ଗି ପ୍ରଭୁତ କ୍ଷୟକ୍ଷତି ହୋଇଥିଲା। ପୁଇଁତଲା ବ୍ଳକ ଭାଲେର ପଞ୍ଚାୟତ ଅନ୍ତର୍ଗତ ଫଟକରା (କ) ଗାଁରେ ବନ୍ୟା ଜଳ ପଶି ଯାଇଥିଲା। ରାସ୍ତାଘାଟ ଧୋଇ ହୋଇଯିବା ସହ ଚାଷଜମି ବାଲିଚର ହୋଇ ଯାଇଥିଲା। ଇତିମଧ୍ୟରେ ବନ୍ୟା ହେବାର ୩ ମାସରୁ ଉର୍ଦ୍ଧ୍ୱ ସମୟ ଅତିବାହିତ ହୋଇଯାଇଥିଲେ ମଧ୍ୟ ସ୍ଥିତି ସଳଖିନାହିଁ। ଫଟକରା ଛକରୁ ଗାଁ ଭିତରକୁ ଯାଇଥିବା ପ୍ରଧାନମନ୍ତ୍ରୀ ରାସ୍ତାର ଲକ୍ଷ୍ମୀଯୋର ପୋଲ ପାଖ ରାସ୍ତାର ୫ ମିଟର ଧୋଇ ହୋଇଯାଇଥିଲା। ଏହାବାଦ୍ ଉକ୍ତ ରାସ୍ତାର ଗାଁ ମୁଣ୍ଡରେ ପ୍ରାୟ ୧୮ ଫୁଟର ଗଭୀର ଗର୍ତ୍ତ ଖୋଳି ସେଠାରେ ରାସ୍ତା ସମ୍ପୂର୍ଣ୍ଣ ଧୋଇ ହୋଇଯାଇଥିଲା। ଏହାବାଦ୍ ରାସ୍ତାର ଅନ୍ୟାନ୍ୟ ସ୍ଥାନରେ ମଧ୍ୟ ବର୍ଷାଜଳ କ୍ଷତିସାଧନ କରିଥିଲା। ବନ୍ୟା ପରେ କ୍ଷୟକ୍ଷତି ସମ୍ପର୍କରେ ପଞ୍ଚାୟତ ଓ ବ୍ଳକ କାର୍ଯ୍ୟାଳୟକୁ ଗ୍ରାମବାସୀ ସୂଚନା ଦେଇଥିଲେ। ପଞ୍ଚାୟତ ନାଏବ ସରପଞ୍ଚ ଶଙ୍କର ଜାଲ ଏହି ଗାଁର ହୋଇଥିବାରୁ ତାଙ୍କ ନେତୃତ୍ୱରେ ଗ୍ରାମବାସୀ ଶୀଘ୍ର ରାସ୍ତା ମରାମତି ପାଇଁ ଦାବି ଜଣାଇଥିଲେ। ମାତ୍ର ବନ୍ୟାର ଦୀର୍ଘ ୩ ମାସ ସମୟ ଅତିବାହିତ ହୋଇଯାଇଥିଲେ ମଧ୍ୟ ସରପଞ୍ଚ, ବିଡିଓ, ତହସିଲଦାର, ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠ ଯନ୍ତ୍ରୀ, ନିର୍ବାହୀ ଯନ୍ତ୍ରୀ କେହି କିଛି ବି ପଦକ୍ଷେପ ନେଲେନାହିଁ। ଫଳରେ ଏହି ଗାଁର ଧୋଇ ହୋଇଯାଇଥିବା ରାସ୍ତା ମରାମତି କରାଯାଇନାହିଁ। ମରାମତି ନ ହେବାରୁ ଗାଁ ଲୋକେ ହଇରାଣ ହରକତ ହେଉଛନ୍ତି। ସନ୍ଧ୍ୟା ପରେ ଏହି ରାସ୍ତାରେ ଯାତାୟାତ କରିବା ବିପଜ୍ଜନକ ହୋଇପଡିଛି। ଅନେକ ଲୋକ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ରାସ୍ତା ଧୋଇହେବା ସହ ଅନେକ ଚାଷୀଙ୍କ ଜମିରେ ବାଲିଚର ହୋଇଯାଇ ଫସଲ ନଷ୍ଟ ହୋଇଛି। ଏବେ ଗ୍ରାମବାସୀ ତିଆରି କରିଥିବା ପାଦଚଲା ଅସ୍ଥାୟୀ ବାଟରେ ଗ୍ରାମବାସୀ ଯିବା ଆସିବା କରୁଛନ୍ତି। ପ୍ରଶାସନିକ ଅବହେଳାକୁ ଆଖି ଆଗରେ ରଖି ମଙ୍ଗଳବାର ଗାଁରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ତୁରନ୍ତ ରାସ୍ତା ମରାମତି କରା ନ ଗଲେ ଗ୍ରାମବାସୀ ଜିଲାପାଳ ଅଫିସ ଫେରାଉ କରିବେ ବୋଲି ଚେତାବନୀ ଦେଇଥିଲେ।