ବଲାଙ୍ଗୀର ଅଫିସ, ୧୩।୮: ଲଗାଣ ବର୍ଷାରେ ବଲାଙ୍ଗୀର ସହର ଉବୁଟୁବୁ ହେଉଛି । ବନ୍ୟା ଜଳରେ ସମଗ୍ର ସହର ଭାସମାନ ଅବସ୍ଥାରେ। ପରିସ୍ଥିତି ଅନୁଧ୍ୟାନକରି ଜିଲାପାଳ ଅରିନ୍ଦମ ଡାକୁଆ ଜରୁରୀ ବୈଠକ ଡାକିଛନ୍ତି। ବଲାଙ୍ଗୀର ବିଧାୟକ ନରସିଂହ ମିଶ୍ର, ଡିଆର୍ଡିଏ ପିଡି ଡ. ମହେଶ୍ବର ସ୍ବାଇଁ, ଉପଜିଲାପାଳ ସଞ୍ଜୟ ମିଶ୍ର, ସହରାଞ୍ଚଳ ପିଡି ଯୁଗଳେଶ୍ବରୀ ଦାସ, ମ୍ୟୁନିସିପାଲିଟି ନିର୍ବାହୀ ଅଧିକାରୀ ବିପିନ ଦୀପ, ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ଜୟଦେବ ପାଣିଗ୍ରାହୀ ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ ।
ରାଜେନ୍ଦ୍ର ପଡା ଡ୍ୟାମ୍ରେ ବନ୍ୟା ଜଳ ଭର୍ତ୍ତି ହୋଇଯାଇଛି । ଯେକୌଣସି ସମୟରେ ଏହି ଡ୍ୟାମ୍ ଭସାଇ ନେବା ପରିସ୍ଥିତି ସୃଷ୍ଟି ହୋଇଛି । ବ୍ରାହ୍ମଣପଡ଼ା-ବରପାଲିପଡା ରାସ୍ତା ପୋଲ ଉପରେ ୩ ଫୁଟର ପାଣି ଚାଲିଥିବା ବେଳେ ଶିଶୁ ଉଦ୍ୟାନରୁ ପେଲେସ ଲାଇନ ରାସ୍ତା ଉପରେ ୪ ଫୁଟ ପାଣି ଯାଉଛି । ସେହିପରି ତୁଲସୀନଗର ରାସ୍ତା ଉପରେ ୩ ଫୁଟର ପାଣି ଯାଉଛି। ଡ୍ୟାମ୍ପଡ଼ା, ଚମାରପଡ଼ା, ରାଜେନ୍ଦ୍ରପଡ଼ା, ଠିକାଦାରପଡ଼ା, ବରପାଲିପଡା, ମାଳପଡ଼ା, ଚିମିନୀଭାଟିପଡା, ବିଭୂତିପଡା, ବ୍ରାହ୍ମଣପଡା, ତୁଲସୀନଗର ଓ ଅନ୍ୟ ପଡ଼ାର ସହସ୍ରାଧିକ ଲୋକ ଜଳ ଘେରରେ ରହିଛନ୍ତି । ୧ ହଜାରରୁ ଊର୍ଦ୍ଧ୍ୱ ଲୋକଙ୍କୁ ନିରାପଦ ସ୍ଥାନକୁ ନିଆଯାଇଛି । ସେଠାରେ ରିଲିଫ୍ ବଣ୍ଟନ କରାଯାଇଛି । ବିଜାଖମନ, ଖୁଜେନପାଲି, ମାଧିଆପାଲି, ରିନବଚନ, ଚନ୍ଦନଭାଟି, ପରଧିଆପାଲି ଗାଁର ଲୋକେ ଜଳବନ୍ଦୀ ହୋଇ ରହିଛନ୍ତି । ସମଗ୍ର ସହରରେ ବନ୍ୟା ପରିସ୍ଥିତି ଉଦ୍ବେଗଜନକ ସ୍ଥିତିରେ ରହିଛି । ଅଗ୍ନିଶମ ବିଭାଗ କର୍ମଚାରୀ ଉଦ୍ଧାର କାର୍ଯ୍ୟରେ ଲାଗିଛନ୍ତି । ଏସ୍ପି କେ. ଶିବା ଶୁବ୍ରମଣି ବନ୍ୟା ପରିସ୍ଥିତିକୁ ଅନୁଧ୍ୟାନ କରୁଛନ୍ତି।
