ଯୋଡା, ୨୧।୪(ଡି.ଏନ.ଏ.)-କେନ୍ଦୁଝର ଜିଲା ବାମେବାରୀ ଥାନା ଅନ୍ତର୍ଗତ ଜାମୁପାଣିଠାରେ ବନ ବିଭାଗ ପକ୍ଷରୁ ଚୋରା କାଠ ବୋଝେଇ ଡମ୍ପର ଜବତ ବେଳେ ବନ କର୍ମଚାରୀମାନେ ମରଣାନ୍ତକ ଆକ୍ରମଣର ଶିକାର ହୋଇଥିବା ବାମେବାରୀ ଥାନାରେ ଅଭିଯୋଗ ହୋଇଛି। ଏନେଇ ପୋଲିସ ଏକ ମାମଲା (ନଂ.୪୯/୨୦୨୦) ରୁଜୁ କରି ଉକ୍ତ ଗ୍ରାମର ରଇଦାସ ଗାଗରାଇ, ସନାତନ ଗାଗରାଇ ଓ ବୁଧରାମଙ୍କୁ ଗିରଫ କରି ମଙ୍ଗଳବାର କୋର୍ଟଚାଲାଣ କରିଥିବା ବାମେବାରୀ ଓଆଇସି ଅମିତାବ୍ ଦାସ ସୂଚନା ଦେଇଛନ୍ତି।
ସୋମବାର ରାତି ୯ଟାରେ ବନ କର୍ମଚାରୀଙ୍କ ସହିତ ହାତୀ ଘଉଡାଇବା ପାଇଁ ଯାଇଥିବା ସମୟରେ ଜାମୁପାଣି ଜଙ୍ଗଲରେ ଏକ ଡମ୍ପରରେ କାଠ ବୋଝେଇ କରି ଚୋରା ଚାଲାଣ ହେଉଥିବା ବେଳେ ବନକର୍ମଚାରୀ ମାନେ ଡମ୍ପରଟିକୁ ଅଟକାଇଥିଲେ। ଏହି ସମୟରେ ନିକଟସ୍ଥ ଜାମୁପାଣୀ ଗ୍ରାମର ପ୍ରାୟ ୧୦ ରୁ ୧୫ ଜଣ ଲୋକ ଆସି ବନ କର୍ମଚାରୀଙ୍କ ଉପରେ ଅତର୍କିତ ଭାବେ ମରଣାନ୍ତକ ଆକ୍ରମଣ କରିଥିଲେ। ଏହି ଆକ୍ରମଣରେ ବାମେବାରୀ ଫରେଷ୍ଟ ସେକ୍ସନର ଡ୍ରାଇଭର କୁଳମଣି ଆପଟ ଏବଂ ଦୁଇ ବନ କର୍ମଚାରୀ ଚନ୍ଦନ ବାରିକ ଓ ରବିନନ୍ଦନ ମହାନ୍ତ ଗୁରୁତର ହୋଇଥିଲେ। ବନବିଭାଗ ପକ୍ଷରୁ ଚୋରା କାଠ ବୋଝେଇ ଡମ୍ପରଟିକୁ ଜବତ କରି କାଳିମାଟି ବିଟ୍ ହାଉସରେ ରଖାଯାଇଥିବା ବେଳେ ଗୁରୁତର ଆହତ ହୋଇଥିବା ବନକର୍ମଚାରୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା।