ବରଗଡ ଅଫିସ,୮।୧: କେନ୍ଦ୍ରୀୟ ଟ୍ରେଡ୍ ୟୁନିଅନ ଆହ୍ବାନରେ କେନ୍ଦ୍ର ସରକାରଙ୍କ ଶ୍ରମିକ, ଚାଷୀମାରଣ ନୀତି, ଦରଦାମ ବୃଦ୍ଧି ବିରୋଧରେ ତଥା ୧୨ଦଫା ଦାବିରେ ଦିଆଯାଇଥିବା ଭାରତ ବନ୍ଦ ଡାକରାର ପ୍ରଭାବ ବରଗଡରେ ପରିଲକ୍ଷିତ ହୋଇଛି। ଏହି କ୍ରମରେ ବରଗଡ ଶ୍ରମିକ ସମନ୍ବୟ ସମିତି ନେତୃତ୍ୱରେ ବୁଧବାର ସ୍ଥାନୀୟ କୋର୍ଟ, କଚେରୀ, ଜିଲାପାଳ ଅଫିସ ସମେତ ସମସ୍ତ ସରକାରୀ ଅଫିସକୁ ଅଚଳ କରିଦିଆଯାଇଛି। ଦିନ ପ୍ରାୟ ୧୦ଟାରେ ବିଚାରପତି ଏବଂ ଅନ୍ୟ ବିଚାର ବିଭାଗୀୟ କର୍ମଚାରୀମାନେ ସ୍ଥାନୀୟ କୋର୍ଟକୁ ଆସୁଥିଲେ। ମାତ୍ର କୋର୍ଟ ସମ୍ମୁଖରେ ଚାଲିଥିବା ପିକେଟିଂ ତଥା ବନ୍ଦ ପାଳନକାରୀଙ୍କଠାରୁ ସେମାନଙ୍କ ଆନ୍ଦୋଳନ ନେଇ ଅବଗତ ହେବା ପରେ ବିଚାରପତି, ବିଚାର ବିଭାଗୀୟ କର୍ମଚାରୀମାନେ ସେଠାରୁ ଫେରି ଯାଇଥିଲେ। ଏହାପରେ ସଂଗଠନର କର୍ମକର୍ତ୍ତାମାନେ ଅନ୍ୟ ସରକାରୀ ଅଫିସକୁ ଯାଇ ସେଠାରେ ପିକେଟିଂ କରି ସେହି ଅଫିସଗୁଡିକୁ ବନ୍ଦ କରି ଦେଇଥିଲେ। କଂଗ୍ରେସ ନେତୃବୃନ୍ଦ ମଧ୍ୟ ଏଥିରେ ସକ୍ରିୟ ଅଂଶଗ୍ରହଣ କରିଥିଲେ। ବରଗଡ ଜିଲା ଶ୍ରମିକ ସମନ୍ବୟ ସମିତିର ବ୍ରହ୍ମା ମହାକୁଡ, ଜେଠୁ ଭୋଇ, କଂଗ୍ରେସର ଯୁଗଳ ପ୍ରସାଦ ସିଂ, ନିପନ କୁମାର ଦାଶ, ନିହାର ରଞ୍ଜନ ମହାନନ୍ଦ ପ୍ରମୁଖ ଏହାର ନେତୃତ୍ୱ ନେଇଥିଲେ। ଅନ୍ୟପକ୍ଷରେ ବରଗଡ ଧନୁଯାତ୍ରା ମହୋତ୍ସବ ଚାଲୁଥିବା ଯୋଗୁ ଯାନବାହାନ ଚଳାଚଳ ଏବଂ ଦୋକାନ ବଜାରକୁ ବନ୍ଦ ପାଳନରୁ ବାଦ ଦିଆଯାଇଛି। ଫଳରେ ବରଗଡରେ ଦୋକାନ ବଜାର ଖୋଲାଥିବାବେଳେ ଯାନବାହାନ ଚଳାଚଳ ସ୍ବାଭାବିକ ରହିଛି।