ବରଗଡ଼ ଅଫିସ୍,୨୫।୪: ରାଷ୍ଟ୍ରୀୟ କୃଷି ବିପଣନ କାର୍ଯ୍ୟକ୍ରମ(ଇ-ନାମ୍)ରେ ଶନିବାର ବରଗଡ଼ ନିୟନ୍ତ୍ରିତ ବଜାର କମିଟି ଅନ୍ତର୍ଭୁକ୍ତ ହୋଇଛି। ଏହା ସହିତ ଦ୍ୱିତୀୟ ପର୍ଯ୍ୟାୟରେ କାର୍ଯ୍ୟକାରୀ ହୋଇଥିବା ଇ-ନାମ୍ ମାର୍କେଟ୍ ଜରିଆରେ ପନିପରିବା କିଣାବିକାରେ ପ୍ରଥମ କରି ସାମିଲ ହୋଇଛି। ଇ-ଟ୍ରେଡ଼ିଂ, ଇ- ବିଡ଼ିଂ ପ୍ରକ୍ରିୟା ଅବଳମ୍ବନ କରି ଆଗଲପୁର ଗ୍ରାମର ଚାଷୀ ଟଙ୍କଧର ବିଶ୍ୱାଳ ନିଜ ୫କୁଇଣ୍ଟାଲ ଟମାଟୋ(ପାତଲଘଣ୍ଟା)କୁ କୁଇଣ୍ଟାଲ ପ୍ରତି ୧ହଜାର ଟଙ୍କା ଦରରେ ବିକ୍ରି କରିଛନ୍ତି। ବରଗଡ଼ର ପରିବା ହୋଲସେଲ୍ ବ୍ୟବସାୟୀ ଗୋବର୍ଦ୍ଧନ ପ୍ରଧାନ ଅନଲାଇନ ମାଧ୍ୟମରେ ୫ହଜାର ଟଙ୍କାରେ ଏହା କିଣିଥିବାବେଳେ ଚାଷୀ ଟଙ୍କଧର ତାଙ୍କର ସେହି ପ୍ରାପ୍ୟ ପାଇଛନ୍ତି। ଏଭଳି କିଣାବିକାରେ ସେ ଲାଭବାନ୍ ହୋଇଥିବା ପ୍ରକାଶ କରିଛନ୍ତି। ଜାତୀୟ କୃଷି ବିପଣନର ରାଜ୍ୟ ସଂଯୋଜକ ପ୍ରସନଜିତ୍ ସାହଙ୍କ ତତ୍ତ୍ବାବଧାନ ତଥା ନିୟନ୍ତ୍ରୀତ ବଜାର କମିଟି ସମ୍ପାଦକ ଦୁର୍ଗାପ୍ରସାଦ ଛୁରିଆଙ୍କ ଉଦ୍ୟମରେ ଅଞ୍ଚଳର ପରିବା ଚାଷୀଙ୍କୁ ଏଭଳି କିଣାବିକା ସୁବିଧା ମିଳି ପାରିଛି। ଏହି ଅନଲାଇନ ମାର୍କେଟିଂ କାଯର୍ୟକ୍ରମ ପରିଚାଳନାରେ ସୁପରଭାଇଜର ବିଜୟ ରାଉତ୍, ଇ-ନାମ୍ ମାର୍କେଟ୍ ଇନଚାର୍ଜ ହିମାଂଶୁ ପ୍ରଧାନ, କମ୍ପ୍ୟୁଟର ଅପରେଟର ପ୍ରଶାନ୍ତ କୁମାର ଦାଶ, ପରେଶ କୁମାର ଖମାରୀ ପ୍ରମୁଖ ସକ୍ରିୟ ଭୂମିକା ନେଇଛନ୍ତି। ଚାଷୀମାନେ ବରଗଡ଼ ନିୟନ୍ତ୍ରୀତ ବଜାର କମିଟି ଅଧିନସ୍ଥ କୃଷକ ବଜାର ପରିସରସ୍ଥ ଇ-ନାମ୍ ମାର୍କେଟ୍ ମାଧ୍ୟମରେ ନିଜ ଉତ୍ପାଦିତ ପରିବାକୁ ଏଭଳି ବହୁଳଭାବେ ବିକ୍ରି କରି ଲାଭବାନ୍ ହେବାକୁ ସମ୍ପାଦକ ଛୁରିଆ ଅନୁରୋଧ କରିଛନ୍ତି।