ଆଠମଲ୍ଲିକ, ୩୦ା୧୧(ଡି.ଏନ.ଏ.) – ପତ୍ରଫଡିରୁ ଆରମ୍ଭ ହୋଇ ଗ୍ରାମବାସୀଙ୍କ ଉଦ୍ୟମରେ ବରଡା ଛପର ଘରେ ପହଞ୍ଚିଥିବା ବିଦ୍ୟାଳୟର ବିକାଶ ଭୁଲିଯାଇଛି ପ୍ରଶାସନ। ଫଳରେ ବିନା ଶ୍ରେଣୀଗୃହରେ ଖୋଲାମେଲାରେ ବିପଦସଙ୍କୁଳ ଭାବେ ପାଠ ପଢୁଛନ୍ତି ଅନୁଗୋଳ ଜିଲା ଆଠମଲ୍ଲିକ ସଦର ମହକୁମା ୩ ନମ୍ବର ଓ୍ବାର୍ଡ ସିଦ୍ଧପୁର ଗ୍ରାମର ପିଲାମାନେ। ଅବସ୍ଥା ଏପରି କି ଘରଟିଏ ନ ଥିବାରୁ ଶୌଚାଳୟରେ ବିଦ୍ୟାଳୟର କାର୍ଯ୍ୟାଳୟ ଚାଲୁଛି। ଶିକ୍ଷା ବ୍ୟବସ୍ଥାରେ ଉନ୍ନତି ପାଇଁ ସରକାର ସର୍ବାଧିକ ଉଦ୍ୟମ କରୁଥିବା କହୁଥିବାବେଳେ ଏହାର ବାସ୍ତବତାକୁ ନେଇ ଅସନ୍ତୋଷ ଜାହିର କରିଛନ୍ତି ଗ୍ରାମବାସୀ। ବାରମ୍ବାର ଅବଗତ କରାଇବା ସତ୍ତ୍ୱେ ଏ ଦିଗରେ କୌଣସି ପଦକ୍ଷେପ ନିଆଯାଉ ନ ଥିବା ସେମାନେ ଅଭିଯୋଗ ଆଣିଛନ୍ତି।
୨୦୦୯ ଡିସେମ୍ବରରେ ସ୍ଥାପନ ହୋଇଥିଲା ସିଦ୍ଧପୁର ପ୍ରୋଜେକ୍ଟ ପ୍ରାଥମିକ ବିଦ୍ୟାଳୟ। ଏହି ସ୍କୁଲରେ ପ୍ରଥମରୁ ପଞ୍ଚମ ପର୍ଯ୍ୟନ୍ତ ଶିକ୍ଷାଦାନର ବ୍ୟବସ୍ଥା ଥିବାବେଳେ ୨ ଜଣ ଶିକ୍ଷକଙ୍କୁ ଏଠାରେ ନିଯୁକ୍ତି ଦିଆଯାଇଛି। ସୂଚନା ମୁତାବକ, ଗ୍ରାମ ଫଡିରୁ ପ୍ରଥମେ ଏହି ବିଦ୍ୟାଳୟ ଆରମ୍ଭ ହୋଇଥିଲା। ସ୍କୁଲର ବିକାଶ ପାଇଁ ଗ୍ରାମବାସୀଙ୍କ ଉଦ୍ୟମରେ ନଡା, ବରଡ଼ା ଛପର କରି ଅସ୍ଥାୟୀ ଭାବେ ଶିକ୍ଷାଦାନର ବ୍ୟବସ୍ଥା ହୋଇଥିଲା। ହେଲେ ବିଦ୍ୟାଳୟ ସ୍ଥାପନକୁ ପ୍ରାୟ ୧୦ ବର୍ଷ ପୂରିଥିଲେ ହେଁ ବିଭାଗ କିମ୍ବା ପ୍ରଶାସନ ପକ୍ଷରୁ ସେଠାରେ ଶ୍ରେଣୀଗୃହ ଖଣ୍ଡିଏ ନିର୍ମାଣ ହୋଇପାରି ନ ଥିବା ଅଭିଭାବକମାନେ ଅଭିଯୋଗ କରିଛନ୍ତି। ପାଠ ପଢାଯାଉଥିବା ସ୍ଥାନରେ କାନ୍ଥ କିମ୍ବା ପାଚେରିଟିଏ ନ ଥିବାରୁ ପିଲାମାନେ ଖୋଲାରେ ବସୁଛନ୍ତି। ଅନେକ ସମୟରେ ପାଠପଢା ସ୍ଥାନରେ ସାପ ଆଦି ପଶି ଯାଉଥିବାରୁ ପିଲାମାନଙ୍କ ମଧ୍ୟରେ ଭୟ ଲାଗି ରହୁଛି। ଗୋରୁ, ବୁଲା କୁକୁର ମଧ୍ୟ ସେଠାରେ ଚରାବୁଲା କରୁଛନ୍ତି। ସେହିପରି ଗୋଟିଏ ସ୍ଥାନରେ ପାଠପଢା ଏବଂ ରୋଷେଇ କରାଯାଉଛି। ବର୍ଷା ହେଲେ ଶିକ୍ଷାଦାନ କଷ୍ଟକର ହୋଇପଡୁଛି। ତେଣୁ ବର୍ଷାଦିନେ ପଲିଥିନ ଉପରେ ନିର୍ଭର କରିବାକୁ ପଡେ। ପାଖରେ ବଡ ବଡ ଗଛ ଥିବାରୁ ବଜ୍ରପାତର ଭୟ ମଧ୍ୟ ରହିଥାଏ। ସେହିପରି ଗୃହ ନ ଥିବାରୁ ଶୌଚାଳୟରେ ବିଦ୍ୟାଳୟ କାର୍ଯ୍ୟାଳୟ ଚାଲୁଛି। ସମସ୍ୟା ସମ୍ପର୍କରେ ଅବଗତ କରାଇବା ସତ୍ତ୍ୱେ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉ ନ ଥିବାରୁ ତୀବ୍ର ଅସନ୍ତୋଷ ସୃଷ୍ଟି ହୋଇଛି। ଅଭିଯୋଗ ପାଇ ଶୁକ୍ରବାର ଆଠମଲ୍ଲିକ ଉପଜିଲାପାଳ ରଜନୀକାନ୍ତ ବିଶ୍ୱାଳ ସ୍କୁଲ ପରିଦର୍ଶନରେ ଯାଇଥିଲେ। ଏ ସମ୍ପର୍କରେ ଉପଜିଲାପାଳ କୁହନ୍ତି, ଖୁବଶୀଘ୍ର ବିଦ୍ୟାଳୟ ପାଇଁ ଜାଗା ଯୋଗାଇ ଦିଆଯିବ। ଡିପିସିଙ୍କ ସହ ଆଲୋଚନା କରି ଟଙ୍କା ମଞ୍ଜୁର ପାଇଁ କୁହାଯାଇଛି।