ବାରିପଦା ଅଫିସ,୬ା୬ : କିଛିଦିନ ହେବ ବାରିପଦା ସହରରେ ଲୁଟ୍ ୍ଘଟଣା ବୃଦ୍ଧି ପାଇବାରେ ଲାଗିଛି। ପୋଲିସ ପକ୍ଷରୁ ଏଥିପ୍ରତି ଗୁରୁତ୍ୱ ଦିଆଉ ନ ଥିବା ଅଭିଯୋଗ ହୋଇଛି। ଏମିତି ଅଭିଯୋଗ କରିଛନ୍ତି ବାରିପଦା ସହରର ବରିଷ୍ଠ ନାଗରିକ ସୁଧାଂଶୁ କୁମାର ଆଚାର୍ଯ୍ୟ। ତାଙ୍କ ଅଭିଯୋଗ ଅନୁଯାୟୀ, ଗୁରୁବାର ବାରିପଦା ସହରର ଜନଗହଳି ପୂର୍ଣ୍ଣ ଅଞ୍ଚଳ ବାଣ୍ଠିଆ ଜଗନ୍ନାଥ ମନ୍ଦିର ନିକଟସ୍ଥ ଏକ ବ୍ୟାଙ୍କକୁ ନିଜ ପେନ୍ସନ ଟଙ୍କା ଉଠାଇବାକୁ ଆସିଥିଲେ। ମଧ୍ୟାହ୍ନରେ ସେ ୧୯ ହଜାର ଟଙ୍କା ଉଠାଇ ବ୍ୟାଗରେ ଭର୍ତ୍ତି କରି ମୋଟରସାଇକେଲରେ ଫେରୁଥିଲେ। ପୂର୍ବରୁ ତାଙ୍କ ବ୍ୟାଗରେ ୩ ହଜାର ଟଙ୍କା ଥିଲା। ତେବେ ମୁଖ୍ୟ ରାସ୍ତାରେ ଆସୁଥିବାବେଳେ ଜଣେ ଯୁବକ ତାଙ୍କ ଉପରକୁ କିଛି ପାଉଡର ଫିଙ୍ଗିଥିଲେ। ଫଳରେ ତାଙ୍କ ଶରୀରରେ ଜଳାପୋଡ଼ା ଅନୁଭବ କରିଥିଲେ। ଉକ୍ତ ଯୁବକ ହିଁ ତାଙ୍କୁ ନିକଟସ୍ଥ ଦୋକାନ ସମ୍ମୁଖରେ ପାଣି ଥିବାରୁ ଦେହରେ ସିଞ୍ଚି ହେବାକୁ କହିଥିଲେ। ଆଚାର୍ଯ୍ୟ ତାଙ୍କର ଗାଡ଼ି ଛାଡ଼ି ପାଣି ସିଞ୍ଚି ହେବାକୁ ଯିବାବେଳେ ଗାଡ଼ିରେ ଥିବା ଟଙ୍କା ବ୍ୟାଗ ନେଇ ଯୁବକ ଫେରାର ହୋଇଯାଇଥିଲେ। ଆଚାର୍ଯ୍ୟ ସେହି ଯୁବକଙ୍କୁ ଭଲ ଭାବେ ଦେଖି ପାରି ନ ଥିବା କହିଛନ୍ତି। ପରେ ଆଚାର୍ଯ୍ୟଙ୍କଠାରୁ ପରିବାର ଲୋକେ ସୂଚନା ପାଇ ତାଙ୍କୁ ବାରିପଦା ପିଆରଏମ ମେଡିକାଲରେ ଚିକିତ୍ସା କରାଇଥିଲେ। ଏନେଇ ବାରିପଦା ଟାଉନ ଥାନାରେ ଲିଖିତ ଅଭିଯୋଗ କରିବାରୁ ପୋଲିସ ଘଟଣାସ୍ଥଳରେ ପହଞ୍ଚି ଲୁଟ୍ ସ୍ଥାନରେ ଥିବା ଦୋକାନଗୁଡ଼ିକର ସିସିଟିଭି ଯାଞ୍ଚ କରିଛି।