ଅନୁଗୋଳ ଅଫିସ, ୧୩।୧୦ – ଅନୁଗୋଳ ପୋଲିସ ପକ୍ଷରୁ ଶନିବାର ମଧ୍ୟାହ୍ନରେ ବରିଷ୍ଠ ନାଗରିକମାନଙ୍କୁ ପରିଚୟପତ୍ର ପ୍ରଦାନ କରାଯାଇଛି। ଅନୁଗୋଳ ଥାନା ପରିସରରେ ଆୟୋଜିତ ଏହି କାର୍ଯ୍ୟକ୍ରମରେ ଏସ୍ପି ଜଗମୋହନ ମୀନା ମୁଖ୍ୟ ଅତିଥିଭାବେ ଯୋଗ ଦେଇ ପରିଚୟପତ୍ର ପ୍ରଦାନ କରିଥିଲେ। ଏହି ଅବସରରେ ଏସ୍ପି କହିଥିଲେ ଯେ, ପିଲାମାନଙ୍କଠାରୁ ଯେଉଁ ବୟସ୍କମାନେ ଅଲଗା ରହୁଛନ୍ତି, ସେମାନଙ୍କ ଉପରେ ଅନୁଗୋଳ ପୋଲିସ ପକ୍ଷରୁ ସ୍ବତନ୍ତ୍ର ଭାବେ ଦୃଷ୍ଟି ରଖାଯିବ। ସମ୍ପୃକ୍ତ ବରିଷ୍ଠ ନାଗରିକଙ୍କ ଏକ ତାଲିକା କରିବାକୁ ଏସ୍ପି ଅନୁଗୋଳ ଥାନା ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। କିଛି ଅଭିଯୋଗ ଥିଲେ ବରିଷ୍ଠ ନାଗରିକମାନେ ପ୍ରଥମେ ସ୍ଥାନୀୟ ଥାନା ଅଧିକାରୀଙ୍କୁ ଭେଟିବେ। ଥାନା ଅଧିକାରୀ ଅନୁପସ୍ଥିତ ଥିଲେ ଏସ୍ଡିପିଓଙ୍କ ନିକଟକୁ ଯିବେ। ଯଦି ଦୁଇ ଅଧିକାରୀ ଅନୁପସ୍ଥିତ ଥିବେ ତାହେଲେ ଏସ୍ପିଙ୍କ ନିକଟକୁ ଯାଇ ଅବଗତ କରିପାରିବେ ବୋଲି ମୀନା ସୂଚନା ଦେଇଥିଲେ। ତେବେ ବିଭିନ୍ନ ଅଞ୍ଚଳରେ ପାଟ୍ରୋଲିଂ ବ୍ୟବସ୍ଥା ବଢ଼ାଇବାକୁ ବରିଷ୍ଠ ନାଗରିକମାନେ ଏସ୍ପିଙ୍କୁ ଅନୁରୋଧ କରିଥିଲେ। ଅନୁଗୋଳ ପୋଲିସ ପକ୍ଷରୁ ମିଳିଥିବା ସୂଚନା ମୁତାବକ ମୋଟ ୪୧୧ ଜଣ ବରିଷ୍ଠ ନାଗରିକ ଥାନାରେ ପଞ୍ଜୀକୃତ ହୋଇଛନ୍ତି। ସେମାନଙ୍କ ମଧ୍ୟରୁ ପୂର୍ବରୁ ୩୦୫ ଜଣଙ୍କୁ ପରିଚୟପତ୍ର ପ୍ରଦାନ କରାଯାଇଥିଲା। ଶନିବାର ୭୦ ଜଣଙ୍କୁ ପରିଚୟପତ୍ର ବଣ୍ଟା ଯାଇଥିବାବେଳେ ବାକି ଥିବା ୩୬ ଜଣଙ୍କୁ ପରେ ପ୍ରଦାନ କରାଯିବ। ଅନ୍ୟ ବରିଷ୍ଠ ନାଗରିକମାନେ ଆବେଦନ କଲେ ସେମାନଙ୍କ ଘରେ ପରିଚୟପତ୍ର ପ୍ରଦାନ କରାଯିବ ବୋଲି ଅନୁଗୋଳ ପୋଲିସ ପକ୍ଷରୁ କୁହାଯାଇଛି। ଏହି କାର୍ଯ୍ୟକ୍ରମରେ ଏସ୍ଡିପିଓ ଅଶ୍ୱିନୀ ସାହୁ, ଥାନା ଅଧିକାରୀ ରମେଶଚନ୍ଦ୍ର ବିଶୋଇ, ବରିଷ୍ଠ ନାଗରିକ ସଂଘ ସଭାପତି ସୁବାସ ଚନ୍ଦ୍ର ସାହୁ ଓ ସମ୍ପାଦକ କୃଷ୍ଣଚନ୍ଦ୍ର ନନ୍ଦଙ୍କ ଅନ୍ୟ ବରିଷ୍ଠ ନାରିକମାନେ ଉପସ୍ଥିତ ଥିଲେ।