ରତ୍ନଗିରି,୨୯।୪(ଡି.ଏନ୍.ଏ.): ଯାଜପୁର ଜିଲା ବରୀ ଅଞ୍ଚଳକୁ କୋଲକାତାରୁ ଫେରିଥିବା ୧୪୬ ଜଣ ମଙ୍ଗଳବାର ସୁଦ୍ଧା ନିଜ ନାମ ପଞ୍ଜୀକୃତ କରିଛନ୍ତି। ଏହି ବ୍ଲକ ଅଧୀନସ୍ଥ ୨୬ଟି ପଞ୍ଚାୟତରେ ଥିବା ବ୍ୟକ୍ତିଙ୍କ ସ୍ବାବକୁ ୪ଟି କେନ୍ଦ୍ରରେ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଛି। ୪ଟି କେନ୍ଦ୍ର ଯଥା ବିଧାନ ଚନ୍ଦ୍ର ଏକାଡେମୀ ବାଲିଆପାଳରେ ୬୫ଜଣ, ରତ୍ନଗିରି ନୋଡାଲ ହାଇସ୍କୁଲରେ ୨୭ ଜଣ, ରାମଚନ୍ଦ୍ରପୁର ଅସ୍ଥାୟୀ ଚିକିତ୍ସା କେନ୍ଦ୍ରରେ ୩୦ଜଣ ଓ ସାମନ୍ତ ସିଂହର ହାଇସ୍କୁଲରେ ୨୪ଜଣଙ୍କ ସ୍ବାବ୍ ସଂଗ୍ରହ କରାଯାଇଥିବା ଜଣାପଡ଼ିଛି। ମାତ୍ରାଧିକ ବ୍ୟକ୍ତି କୋଲକାତାରୁ ବରୀକୁ ଫେରିଥିବାରୁ ସଂକ୍ରମଣକୁ ଦୃଷ୍ଟିରେ ରଖି ଏହି ବ୍ଲକକୁ ୫୪ଘଣ୍ଟା କଣ୍ଟେନମେଣ୍ଟ ଜୋନ ଭାବେ ଘୋଷଣା କରାଯାଇଛି। ସ୍ବାବ୍ ସଂଗ୍ରହ ବେଳେ ସ୍ବାସ୍ଥ୍ୟବିଭାଗ ତରଫରୁ ସତର୍କତା ଅବଲମ୍ବନ କରାଯାଇଥିଲା। ଏହି ଅବସରରେ ବରୀ ବ୍ଲକର ଭାରପ୍ରାପ୍ତ ବିଡିଓ ଶାଶ୍ୱତ ଜେନା, ବରୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡ.କୌଶିକ ପାତ୍ର, ଜିନ୍ନତ ଦାସ, ମୁକୁନ୍ଦ ଚନ୍ଦ୍ର ନାୟକ ପ୍ରମୁଖ ଅଧିକାରୀ ଉପସ୍ଥିତ ରହି ସ୍ବାବ ସଂଗ୍ରହ କରିଥିଲେ। ମହିଳା ସ୍ବାସ୍ଥ୍ୟ କର୍ମୀ, ଅଙ୍ଗନବାଡି ସୁପରଭାଇଜର, ଅଙ୍ଗନବାଡିକର୍ମୀ ଓ ଆର.ଆର.ସି ଟିମ୍ ଉପସ୍ଥିତଥିଲେ। ୩ରୁ ୪ ଦିନ ମଧ୍ୟରେ ସଂଗ୍ରହ ହୋଇଥିବା ସ୍ବାବର ରିପୋର୍ଟ ଆସିବ ବୋଲି ଜଣାପଡ଼ିଛି।