ରତ୍ନଗିରି,୪ା୪ (ଡି.ଏନ୍.ଏ.)-କୌଣସି କାରଣ ନ ଦର୍ଶାଇ ଅନୁପସ୍ଥିତ ରହିବା ଯୋଗୁ ଯାଜପୁର ଜିଲାର ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡା. ହେମନ୍ତ କୁମାର ମହାରଣାଙ୍କୁ ବଦଳି କରାଯାଇଛି। କିଛିଦିନ ତଳେ ଜିଲାସ୍ତରୀୟ ଅଧିକାରୀଙ୍କ ଗସ୍ତ ସମୟରେ ସେ କାର୍ଯ୍ୟରେ ଅନୁପସ୍ଥିତ ଥିବା ନଜରକୁ ଆସିଥିଲା। ଏ ନେଇ ଡା. ମହାରଣାଙ୍କୁ ଯାଜପୁର ଜିଲାପାଳ ରଞ୍ଜନ କୁମାର ଦାସ କୈଫଏତ ତଲବ କରିଥିଲେ। ସେହିପରି ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଓ କର୍ମଚାରୀଙ୍କ ମଧ୍ୟରେ ବିବାଦ ସମ୍ପର୍କରେ ଯାଜପୁର ଜିଲା ଚିକିତ୍ସାଧିକାରୀଙ୍କ ପାଖରେ ବହୁବାର ଅଭିଯୋଗ ହୋଇଥିଲା। ଶୁକ୍ରବାର ଜିଲା ଚିକିତ୍ସାଧିକାରୀ ଏକ ନିର୍ଦ୍ଦେଶନାମା(ପତ୍ରସଂଖ୍ୟା ୨୮୮୭) ଜାରି କରି ଡା. ମହାରଣାଙ୍କୁ ଯାଜପୁର ଜିଲା ମୁଖ୍ୟ ଚିକିତ୍ସାଳୟକୁ ବଦଳି କରିଛନ୍ତି। ତାଙ୍କ ସ୍ଥାନରେ ଡା. କୌଶିକ ପାତ୍ରଙ୍କୁ ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଦାୟିତ୍ୱ ହସ୍ତାନ୍ତର କରାଯାଇଛି ।