ଭଦ୍ରକ ଅଫିସ, ୨୨।୭ – ଭଦ୍ରକ ପୌରାଞ୍ଚଳ ଅନ୍ତର୍ଗତ ସମସ୍ତ ୱାର୍ଡରୁ ଏଣିକି ଦୁଇଟି ଭ୍ରାମ୍ୟମାଣ ଭ୍ୟାନ୍ ବର୍ଜ୍ୟବସ୍ତୁ ସଂଗ୍ରହ କରିବ। ଏଥିପାଇଁ ସୋମବାର ପୌରପାଳିକା ପକ୍ଷରୁ ଦୁଇଟି ଭ୍ୟାନ୍କୁ ଉଦ୍ଘାଟନ କରାଯାଇଛି। ଭଦ୍ରକ ବିଧାୟକ ସଞ୍ଜୀବ ମଲ୍ଲିକ ମୁଖ୍ୟଅତିଥି ଭାବେ ଯୋଗଦେଇ ଉଦ୍ଘାଟନ କରି ସହରକୁ ନିର୍ମଳ ଓ ବର୍ଜ୍ୟବସ୍ତୁମୁକ୍ତ କରିବାରେ ଏହି ଭ୍ୟାନ ଲାଭଦାୟକ ହେବ ବୋଲି କହିଥିଲେ। ଏହି ଭ୍ୟାନ୍ ବର୍ଜ୍ୟବସ୍ତୁ ପିଟ୍ ଓ ଘର ଘର ବୁଲି ବର୍ଜ୍ୟବସ୍ତୁ ସଂଗ୍ରହ କରିବ ବୋଲି ପୌରାଞ୍ଚଳ କାର୍ଯ୍ୟନିର୍ବାହୀ ଅଧିକାରୀ ପ୍ରଦୀପ ସାହୁ ସୂଚନା ଦେଇଥିଲେ। ବହୁ କାଉନସିଲର୍ ଓ ସହରବାସୀ ଉଦ୍ଘାଟନୀ କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହି ଅବସରରେ ବିଧାୟକଙ୍କ ଦ୍ୱାରା କେତେକ ହିତାଧିକାରୀଙ୍କୁ ଭତ୍ତା ଓ ଟ୍ରାଇସାଇକେଲ ବଣ୍ଟନ କରାଯାଇଥିଲା।