କିଙ୍ଗଷ୍ଟନ,୨।୬(ପି.ଟି.): ବର୍ଣ୍ଣବୈଷମ୍ୟ ବିରୋଧରେ ସ୍ବର ଉତ୍ତୋଳନ କରିବାକୁ ସାରା କ୍ରିକେଟ ଜଗତକୁ ନିବେଦନ କରିଛନ୍ତି ବିଶ୍ୱକପ୍ ବିଜୟୀ ପୂର୍ବତନ ଅଧିନାୟକ ଡାରେନ ସାମି। ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ସମେତ ପୂରା କ୍ରିକେଟ ଜଗତକୁ ଏନେଇ ଆଭିମୁଖ୍ୟ ସ୍ପଷ୍ଟ କରିବାକୁ ସେ ଆହ୍ବାନ ଦେଇଛନ୍ତି। ନହେଲେ ଏ ଭଳି ସମସ୍ୟା ଅଂଶ ହୋଇ ରହିବାକୁ ପ୍ରସ୍ତୁତ ରହିବାକୁ ପଡିବ ବୋଲି ସେ ଚେତାଇ ଦେଇଛନ୍ତି। ଆମେରିକାର କୃଷ୍ଣକାୟ ବ୍ୟକ୍ତି ଜର୍ଜ ଫ୍ଲଏଡଙ୍କ ହତ୍ୟା ପରେ ଏବେ ବର୍ଣ୍ଣବୈଷମ୍ୟ ନେଇ ସାରା ବିଶ୍ୱରେ ଚର୍ଚ୍ଚା ସୃଷ୍ଟି ହୋଇଛି।
ସାରା ବିଶ୍ୱରେ କୃଷ୍ଣକାୟ ସମ୍ପ୍ରଦାୟ ଅତ୍ୟାଚାରର ଶିକାର ହେଉଛନ୍ତି ବୋଲି ସେ ସୋସିଆଲ ମିଡିଆରେ ନିଜର ବାର୍ତ୍ତା ପୋଷ୍ଟ କରି କହିଛନ୍ତି। ରଙ୍ଗଭେଦ ନେଇ ଅତ୍ୟାଚାର ହେଉଥିବା ଲୋକମାନଙ୍କ ପାଇଁ ଏବେ ବାହାରିବାର ପ୍ରକୃତ ସମୟ ଆସି ପହଞ୍ଚିଛି। ଚୁପ୍ ରହିଲେ ଏବେ ଚଳିବ ନାହିଁ। ନହେଲେ ଆମେ ସମସ୍ତେ ଏଭଳି ଅନ୍ୟାୟ ଓ ଅତ୍ୟାଚାରର ଶିକାର ହେବା ବୋଲି ସେ ଟୁଇଟ୍ କରି ସତର୍କ କରାଇଛନ୍ତି। ବର୍ଣ୍ଣବୈଷମ୍ୟବାଦ କେବଳ ଆମେରିକାରେ ସୀମିତ ହୋଇ ରହିନାହିଁ। ସାରା ବିଶ୍ୱରେ କୃଷ୍ଣକାୟ ବ୍ୟକ୍ତିମାନେ ଏଭଳି ସାମାଜିକ କଳଙ୍କ ତଥା ଆକ୍ଷେପରେ ଶିକାର ହେଉଛନ୍ତି। ଆଇସିସି ସମେତ ସେ ସବୁ ଦେଶର ବୋର୍ଡଗୁଡିକୁ ଏ ନେଇ ଦୃଷ୍ଟାନ୍ତମୂଳକ ପଦକ୍ଷେପ ଗ୍ରହଣ କରିବାକୁ ସେ ନିବେଦନ କରିଛନ୍ତି।
