ଚାର୍ଲୋଟ,୬।୬(ଏପି): ବର୍ଣ୍ଣବୈଷମ୍ୟ ବିରୋଧୀ ଲଢ଼େଇରେ ସାମିଲ ହୋଇଛନ୍ତି କିମ୍ବଦନ୍ତୀ ବାସ୍କେଟବଲ ଖେଳାଳି ତଥା ଏନ୍ବିଏ ତାରକା ମାଇକେଲ ଜୋର୍ଡାନ। ସମାଜରେ ଥିବା ରଙ୍ଗ ଭେଦକୁ ଦୂରେଇବା ପାଇଁ ଓ ସାମାଜିକ ସମାନତା ପ୍ରତିଷ୍ଠା କରିବା ଲାଗି ଜୋର୍ଡାନ ୧୦୦ ମିଲିୟନ ଆମେରିକୀୟ ଡଲାର ଅର୍ଥାତ ୭୫୫ କୋଟି ଟଙ୍କା ଦାନ କରିବେ ବୋଲି ଘୋଷଣା କରିଛନ୍ତି। ଜୋର୍ଡାନ ଓ ଜୋର୍ଡାନ ବ୍ରାଣ୍ଡ ତରଫରୁ ଏହି ଅର୍ଥ ଆସନ୍ତା ୧୦ ବର୍ଷ ମଧ୍ୟରେ ପ୍ରଦାନ କରାଯିବ। ସାମାଜିକ ନ୍ୟାୟ, ସାମାଜିକ ସମାନତା ଓ ଶିକ୍ଷାର ଉନ୍ନତି ପାଇଁ ଏହି ଅର୍ଥ ଖର୍ଚ୍ଚ କରାଯିବ ବୋଲି କୁହାଯାଇଛି।
ପୂର୍ବତନ ଚିକାଗୋ ବୁଲ୍ସ କିମ୍ବଦନ୍ତୀ ଖେଳାଳି ୫୭ବର୍ଷୀୟ ଜୋର୍ଡାନ ଚୋର୍ଲୋଟ ହାର୍ନେଟ୍ସର ମାଲିକ ରହିଛନ୍ତି। ସ୍ପୋଟର୍ସ ଜୋତା କମ୍ପାନୀ ନାଇକ ପାଇଁ ଜୋର୍ଡାନ ବ୍ରାଣ୍ଡ ବେଶ୍ ପରିଚିତ। ନାଇକ ତରଫରୁ ମଧ୍ୟ ସମକାରଣ ପାଇଁ ୪୦ ମିଲିୟନ ଆମେରିକୀୟ ଡଲାର ଆଗାମୀ ୪ ବର୍ଷ ମଧ୍ୟରେ ପ୍ରଦାନ କରିବାକୁ କୁହାଯାଇଛି।
କିଛି ଦିନ ତଳେ ଆମେରିକାରେ ଜଣେ କୃଷ୍ଣକାୟ ବ୍ୟକ୍ତି ଜର୍ଜ ଫ୍ଲଏଡ୍ଙ୍କୁ ଜଣେ ଗୋରା ପୋଲିସ ନିର୍ମମ ଭାବେ ହତ୍ୟା କରିବା ପରେ ସାରା ବିଶ୍ୱରେ ବର୍ଣ୍ଣବୈଷମ୍ୟ ନେଇ ଆନ୍ଦୋଳନ ଆରମ୍ଭ ହୋଇଛି। ଏଥିରେ ଜୋର୍ଡାନ ଦୁଃଖ ପ୍ରକାଶ କରିଛନ୍ତି ଓ ସାମାଜିକ ନ୍ୟାୟ ପାଇଁ ଏହି ପରିମାଣର ଅର୍ଥ ଦାନ ଦେବାକୁ ଘୋଷଣା କରିଛନ୍ତି। ଫେସ୍ବୁକ୍ ଓ ଆମାଜନଠାରୁ ୧୦ ଗୁଣା ଅର୍ଥ ପ୍ରଦାନ କରିବେ ଜୋର୍ଡାନ। ଯେପର୍ଯ୍ୟନ୍ତ ଆମ ଦେଶରେ ରଙ୍ଗଭେଦ ତଥା ବର୍ଣ୍ଣବୈଷମ୍ୟର ମୂଳୋତ୍ପାଟନ ନ ହୋଇଛି ସେପର୍ଯ୍ୟନ୍ତ ଆମର ଲଢେଇ ଜାରି ରହିବ ବୋଲି ଜୋର୍ଡାନ କହିଛନ୍ତି। ସମାଜ ସଂସ୍କାର ପାଇଁ କାର୍ଯ୍ୟ କରୁଥିବା ସଂସ୍ଥାଗୁଡିକୁ ଏହି ଅର୍ଥ ପ୍ରଦାନ କରାଯିବ ବୋଲି ସେ କହିଛନ୍ତି। କଳା ତଥା କୃଷ୍ଣକାୟ ବ୍ୟାକ୍ତିମାନଙ୍କ ଜୀବନର ମଧ୍ୟ ମୂଲ୍ୟ ରହିଛି ବୋଲି ଜୋର୍ଡାନ ଓ ତାଙ୍କ ବ୍ରାଣ୍ଡ ତରଫରୁ କୁହାଯାଇଛି। କଳା ଲୋକଙ୍କ ଜୀବନରେ ପରିବର୍ତ୍ତନ ଆଣିବା ଆମର ମୂଳ ଲକ୍ଷ୍ୟ ବୋଲି ସେ କହିଛନ୍ତି। ପୂର୍ବରୁ ମଧ୍ୟ ଜୋର୍ଡାନ ଫ୍ଲଏଡଙ୍କ ହତ୍ୟା ନେଇ ରୋଷ ଜାହିର କରିଥିଲେ।