ବର୍ଷାଦିନେ ନଦୀବନ୍ଧ ପଥର ପ୍ୟାକିଂ : ସୂଚନା ଫଳକରେ ସୀମିତ ରହିଛି କାର୍ଯ୍ୟ
21 ନାଉଗାଁ,୧୪।୮(ସ୍ବ.ପ୍ର.): ନାଉଗାଁ ବ୍ଲକର ଗଜରାଜପୁର, ରୋହିଆ, ବଛାଳୋ, ଗଳଦାରୀ, ଶିଖର, ଓଷକଣା ଓ କୋରୁଅ ଆଦି ପଞ୍ଚାୟତ ଦେଇ ପ୍ରବାହିତ ହୋଇଛି ଦେବୀ ନଦୀ। ତଳିଆ ଅଞ୍ଚଳ ହୋଇଥିବାରୁ ଅତ୍ୟଧିକ ବର୍ଷା ହେଲେ କିମ୍ବା ନଦୀରେ ବନ୍ୟା ଆସିଲେ ଏସବୁ ପଞ୍ଚାୟତର ଲୋକେ କ୍ଷତିଗ୍ରସ୍ତ ହୋଇଥାନ୍ତି। ତେଣୁ ଏହାକୁ ଦୃଷ୍ଟିରେ ରଖି ନଦୀବନ୍ଧ ସୁଦୃଢ କରିବା ଓ ବନ୍ୟା ଦାଉରୁ ବନ୍ଧକୁ ସୁରକ୍ଷା ଦେବା ପାଇଁ ଜଳ ସମ୍ପଦ ବିଭାଗ ପକ୍ଷରୁ ବନ୍ଧର ବିଭିନ୍ନ ସ୍ଥାନରେ ପଥର ପ୍ୟାକିଂ କରାଯାଉଛି। କିନ୍ତୁ ଏହି କାର୍ଯ୍ୟ ଖରାଦିନେ ନ କରି ବର୍ଷାଦିନେ କରାଯାଉଛି। ଫଳରେ ଠିକ୍ ଭାବେ କାର୍ଯ୍ୟ ନ କରି ଲକ୍ଷାଧିକ ଟଙ୍କା ଆତ୍ମସାତ କରିବାକୁ ଉଦ୍ୟମ ଚାଲିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସମ୍ପୃକ୍ତ ଠିକାଦାର ମନମୁଖି ଓ ନିମ୍ନମାନର କାର୍ଯ୍ୟ କରୁଥିବା କୁହାଯାଉଛି। ସୂଚନା ଅନୁଯାୟୀ, ତିରୁଣା ପଞ୍ଚାୟତ ଦେଇ ପ୍ରବାହିତ ବାଉଁଶ ଯୋରୀରେ ବନ୍ୟାଜଳ ନିୟନ୍ତ୍ରଣ କରିବା ସହିତ ଉଦବୃତ ଜଳ ନିଷ୍କାସନ ଓ ମରୁଡି ସମୟରେ ଚାଷଜମିକୁ ଜଳ ଯୋଗାଇବାକୁ ତେଲସରା ଓ ବାଲିକୁଦା ବ୍ଲକ ମାଛଗଁା ପଞ୍ଚାୟତର ଅସିଲଠାରେ ସ୍ଲୁଇସ ଗେଟ୍ ନିର୍ମାଣ କରାଯାଇଛି। ଏହିଠାରେ ବାଉଁଶ ଯୋରୀ ଦେବୀ ନଦୀ ସହିତ ମିଶିଛି। ସ୍ଥାନୀୟ ଲୋକଙ୍କ ସୂଚନା ଅନୁଯାୟୀ, ଏହି ପଠାଟି ପୂର୍ବରୁ ଚାରଣ ଭୂମି ଥିଲା। ଗୃହପାଳିତ ପଶୁ ଏଠାରେ ଚରାବୁଲା କରୁଥିଲେ। ସମୟ କ୍ରମେ ଦେବୀ ନଦୀରୁ ଅତଡ଼ା ଖସି ଏହି ଚାରଣ ଭୂମି ସମ୍ପୂର୍ଣ୍ଣ ଭାବେ ନଦୀଗର୍ଭରେ ଲୀନ ହେବାକୁ ବସିଛି। ଫଳରେ ନଦୀବନ୍ଧ ଓ ନଦୀ କୂଳିଆ ଗ୍ରାମ ପାଇଁ ବିପଦ ସୃଷ୍ଟି ହେଉଛି। ଏହାର ପ୍ରତିକାର ପାଇଁ ଜଳ ସମ୍ପଦ ବିଭାଗ ପକ୍ଷରୁ ଚଳିତବର୍ଷ ପଥର ପ୍ୟାକିଂ କରିବାକୁ ଟେଣ୍ଡର ଯୋଗେ ଜଣେ ଠିକାଦାରଙ୍କୁ କାର୍ଯ୍ୟ ଦିଆଯାଇଛି। ସମ୍ପୃକ୍ତ ଠିକାଦାର ସୂଚନା ଫଳକରେ ଦର୍ଶାଇଥିବା ତଥ୍ୟ ଅନୁସାରେ ପଥର ପ୍ୟାକିଂ ବାବଦକୁ ୬୮ଲକ୍ଷ ୮୩ ହଜାର ୦୯୯ ଟଙ୍କା ବ୍ୟୟ ଅଟକଳ ରଖାଯାଇଛି। ଠିକାଦାରଙ୍କୁ ୫୮ଲକ୍ଷ ୫୧ହଜାର ୩୨୨ଟଙ୍କା ବିଭାଗ ପକ୍ଷରୁ ପ୍ରଦାନ କରାଯିବାର ଚୁକ୍ତି କରାଯାଇଛି। ଏହି କାର୍ଯ୍ୟ ଆରମ୍ଭ ତାରିଖ ୩ ଜୁନ ୨୦୧୯ ଥିବାବେଳେ ଶେଷ ତାରିଖ ୨ ଡିସେମ୍ବର ୨୦୧୯ ରଖାଯାଇଛି। ତେବେ ଗୁରୁତ୍ୱପୂର୍ଣ୍ଣ କଥା ହେଲା ସମ୍ପୃକ୍ତ ଠିକାଦାର ସପ୍ତାହ ପୂର୍ବରୁ ନଦୀବନ୍ଧ ନିକଟରେ ମାତ୍ର କେଇ ହାତ ମାଟି ଖୋଳି କିଛି ପଥର ପକାଇ ସୂଚନା ଫଳକ ଲଗାଇ ଉଭାନ ହୋଇଯାଇଛନ୍ତି। ସୂଚନାଯୋଗ୍ୟ, ସ୍ଲୁଇସ ନିକଟରେ ମାସାଧିକ କାଳ ଏହି ପଥର ପଡ଼ିରହିଥିଲା। କିନ୍ତୁ ଏହି ୧୦ ଦିନ ହେବ ଉକ୍ତ ପଥରକୁ ନଦୀ ତଳକୁ ଖସାଯାଇ ମାଟି ପକାଯାଇଛି। ଏଥିସହ ସ୍ଲୁଇସ ଗେଟ୍ ନିକଟରେ ସୂଚନା ଫଳକ ଲଗାଯାଇଛି। ବର୍ତ୍ତମାନ ବର୍ଷାଦିନ ଯୋଗୁ ନଦୀରେ ବନ୍ୟା ପାଣି ପ୍ରବେଶ କରି ନଦୀ ଫୁଲି ରହିଛି। ଏପରିକି ପଥର ପ୍ୟାକିଂ ସ୍ଥାନରେ ଅତଡ଼ା ମଧ୍ୟ ଖାଉଛି। ଏହି ସମୟରେ ଠିକାଦାର ନାମକୁମାତ୍ର କେଇ ଖଣ୍ଡ ପଥର ପକାଇ ସୂଚନା ଫଳକ ଲଗାଇ ବିଲ କରି ନେବାକୁ ମସୁଧା କରୁଥିବା କୁହାଯାଉଛି। ଏ ସମ୍ପର୍କରେ ବାଲିକୁଦା ଜଳ ସମ୍ପଦ ବିଭାଗ କନିଷ୍ଠ ଯନ୍ତ୍ରୀ ଅନିଲ କୁମାର ରାଉତ କହିଛନ୍ତି ଯେ, କାଯର୍ୟ କରିବାର ଅବଧି ଶେଷ ହୋଇନାହିଁ। ଠିକ୍ ସମୟ ମଧ୍ୟରେ କାର୍ଯ୍ୟ ଶେଷ କରାଯିବ।