ଛେଣ୍ଡିପଦା,୨୬।୧୦(ସ୍ବ.ପ୍ର.) – ଅନୁଗୋଳ ଜିଲାରେ ଦୁଇ ଦିନ ଧରି ଲଘୁଚାପ ଜନିତ ବର୍ଷା ଯୋଗୁ ଶୁକ୍ରବାର ଛେଣ୍ତିପଦା ବ୍ଲକ କୁମ୍ଭାରିଆ ନାଳ ଉପରେ ନିର୍ମିତ ପୋଲର ବିଭିନ୍ନ ସ୍ଥାନରେ ଫାଟ ସୃଷ୍ଟି ହେବା ସହ ମଝିରୁ ଗୋଟିଏ ପାର୍ଶ୍ୱକୁ ଦବି ଯାଇଛି। ଫଳରେ ଦୁର୍ଘଟଣା ଆଶଙ୍କାରେ ଏହି ପୋଲଦେଇ ଯାତାୟାତ ବନ୍ଦ ହୋଇଯାଇଛି। କମ୍ପସଲା ପଞ୍ଚାୟତରୁ ଏନ୍ଟିପିସି, କଣିହଁ। , କୋଶଳାକୁ ଯୋଗାଯୋଗ କରୁଥିବା ଏହି ପୋଲ ଉପରେ ନିର୍ଭର କରୁଥିବା ଲୋକେ ନାହିଁ ନ ଥିବା ଅସୁବିଧା ଭୋଗୁଛନ୍ତି। ନିର୍ମାଣବେଳେ ନିମ୍ନମାନର କାମ ହେଉଥିବା ଅଭିଯୋଗ ହୋଇଥିଲେ ହେଁ ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନ ଥିବାରୁ ପୋଲର ଏପରି ଅବସ୍ଥା ହୋଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଏହି ପୋଲ ଉପରେ କମ୍ପସଲା ପଞ୍ଚାୟତର ୫ନଂ ୱାର୍ଡର କେନ୍ଦୁପଶି, କୁଦପଶି ଗ୍ରାମର ୪ ଶହରୁ ଊର୍ଦ୍ଧ୍ୱ ଲୋକଙ୍କ ସମେତ ଆଖପାଖ ଅଞ୍ଚଳବାସୀ ନିର୍ଭର କରନ୍ତି। ଏବେ ପୋଲଟି ଦବିଯିବା ଯୋଗୁ ସେଠାରେ ଯାତାୟାତ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ତୁରନ୍ତ ପୋଲ ମରାମତି କରାଯିବାକୁ ଅଞ୍ଚଳବାସୀ ଦାବି କରିଛନ୍ତି। ଏ ନେଇ କମ୍ପସଲା ସରପଞ୍ଚ ଉଜ୍ୱଳ ପ୍ରଧାନ କୁହନ୍ତି ୭/୮ ବର୍ଷ ତଳେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୪୦ ଲକ୍ଷରୁ ଊଦ୍ଧର୍ବ ଟଙ୍କା ବ୍ୟୟରେ ପୋଲ ନିର୍ମାଣ କରାଯାଇଥିଲା। ସେତେବେଳେ ନିମ୍ନମାନର କାର୍ଯ୍ୟ କରାଯାଉଥିବା ନେଇ ଗ୍ରାମବାସୀ ଅଭିଯୋଗ କରିଥଲେ ମଧ୍ୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନେଇ ନ ଥିଲା। କିଛି ମାସ ପୂର୍ବରୁ ନାଳ ତଳେ ପଡିଥିବା ଫାଉଣ୍ଡେଶନ ଭାଙ୍ଗି ଥିବା ନେଇ ବିଭାଗୀୟ ଯନ୍ତ୍ରୀଙ୍କୁ ଅବଗତ କରାଯିବା ସତ୍ତ୍ୱେ ମରାମତି କରା ନ ଯିବାରୁ ପୋଲଟି ଦବିଯାଇଛି। ଏ ନେଇ ଗ୍ରାମ୍ୟ ଉନ୍ନୟନ ବିଭାଗ ଯନ୍ତ୍ରୀ ଶ୍ରୀନିବାସ ପ୍ରଧାନ କୁହନ୍ତି, ପୋଲଟି ବହୁତ ଦିନର ହୋଇଥିବାବେଳେ ବାଲିମାଫିଆମାନେ ଉକ୍ତ ନାଳରୁ ବେଆଇନ ଭାବେ ବାଲି ଚାଲାଣ କରୁଛନ୍ତି। ଫଳରେ ପୋଲଟି ଦବିଯାଇଛି। ଖୁବ ଶୀଘ୍ର ନୂତନ ପୋଲ ନିର୍ମାଣ ନିମନ୍ତେ ଆଲୋଚନା କରାଯାଇଛି।