ପରଜଙ୍ଗ, ୨୮।୨(ଡି.ଏନ.ଏ.) – ଢେଙ୍କାନାଳ ଜିଲା ପରଜଙ୍ଗ ବ୍ଲକର ସାଧାରଣ ଜୀବନଯାତ୍ରାକୁ ପ୍ରଭାବିତ କରିଛି ଅଦିନିଆ ବର୍ଷା। ଏଥିରେ ଶୋଚନୀୟ ହୋଇପଡ଼ିଛି ଗ୍ରାମ୍ୟ ସଡ଼କ। ଖାଲଖମାରେ ଭର୍ତ୍ତି ହୋଇପଡ଼ିଥିବା ରାସ୍ତାରେ ଆଣ୍ଠୁଏ ପାଣି ଜମି ରହିଛି। କାଦୁଅରେ ଯାତ୍ରୀମାନେ କଲବଲ ହେଉଥିବାବେଳେ ଏହାକୁ ନେଇ ତୀବ୍ର ଅସନ୍ତୋଷ ସୃଷ୍ଟି ହୋଇଛି।
ଦୁଇଦିନ ଧରି ହୋଇଥିବା ଅଦିନିଆ ବର୍ଷାରେ ୫୩ନଂ. ଜାତୀୟ ରାଜପଥର ହାତୀଲୁଚାଣି ଛକଠାରୁ କୁଆଳୋ ଅଷ୍ଟଶମ୍ଭୁ ମନ୍ଦିର, କୁଆଳୋ, କଲଦା, କଣ୍ଢେଇଖୋଲ, ସିଙ୍ଗଡ଼ା, ବ୍ରାହ୍ମଣବେଡ଼ିଆ, ବାଲିସାହି, ଶୁଣ୍ଢିତଇଲା ଆଦି ଗ୍ରାମକୁ ସଂଯୋଗ କରୁଥିବା ଆର୍ଡି ରାସ୍ତା ମରଣଯନ୍ତା ପାଲଟିଛି। ଫଳରେ କୁଆଳୋ ଅଷ୍ଟଶମ୍ଭୁ ଶୈବପୀଠକୁ ଆସୁଥିବା ଶ୍ରଦ୍ଧାଳୁ ଏବଂ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ସୂଚନାଯୋଗ୍ୟ, ମରାମତି କରାଯାଉ ନ ଥିବାରୁ ଉକ୍ତ ରାସ୍ତାରେ ବଡ ବଡ଼ ଖାଲ ସୃଷ୍ଟି ହୋଇଥିଲା। ଏହା ଏବେ ବିରାଟ ଆକାର ଧାରଣ କରିଛି। ବର୍ଷା ପାଣି ଜମି ରହିବା ପରେ ଛୋଟବଡ଼ ଦୁର୍ଘଟଣା ଘଟୁଛି। ଉକ୍ତ ରାସ୍ତା ଉପରେ ୨ ପଞ୍ଚାୟତର ହଜାର ହଜାର ଜନସାଧାରଣ ନିର୍ଭର କରିଥାନ୍ତି। ସ୍କୁଲ, କଲେଜର ଶତାଧିକ ଛାତ୍ରୀଛାତ୍ର ପାଠ ପଢ଼ିବାକୁ ଏହି ରାସ୍ତା ଦେଇ ଯାଇଥାନ୍ତି। ସେହିପରି ଶୁକ୍ରବାର କୁଆଲୋ ସାପ୍ତାହିକ ହାଟକୁ ବହୁ ବ୍ୟବସାୟୀ ଆସୁଥିବାବେଳେ ସେମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ତେଣୁ ତୁରନ୍ତ ରାସ୍ତା ମରାମତି କରିବା ଦିଗରେ ଧ୍ୟାନ ଦେବାକୁ ଅଞ୍ଚଳବାସୀ ଦାବି କରିଛନ୍ତି।
ଏ ନେଇ ବିଭାଗୀୟ ଯନ୍ତ୍ରୀ ପୁରୁଷୋତ୍ତମ ଗଡ଼ନାୟକ କୁହନ୍ତି, ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଥିବା ସମ୍ପର୍କରେ ସେ ଅବଗତ ଅଛନ୍ତି। ଏହାର ମରାମତି କରାଯିବାକୁ ଏଷ୍ଟିମେଟ୍ ହୋଇଛି। ଟଙ୍କା ମଞ୍ଜୁର ହେଲେ କାମ ହେବ ବୋଲି ସେ ସୂଚନା ଦେଇଛନ୍ତି।