ଭୁବନେଶ୍ୱର, ୫।୭(ବ୍ୟୁରୋ)- ମୌସୁମୀ ବର୍ଷା ଜାରି ରହିଥିବାବେଳେ ରାଜଧାନୀବାସୀ ଯେପରି ଜଳ ନିଷ୍କାସନ ଜନିତ ସମସ୍ୟାର ସମ୍ମୁଖୀନ ନ ହେବେ ସେଥିପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ତତ୍ପର ହୋଇପଡ଼ିଛି। ବିଶେଷକରି ଆରମ୍ଭରୁ ଭୁବନେଶ୍ୱର ଦେଇ ଯାଇଥିବା ଜାତୀୟ ରାଜପଥ ସମେତ ସହରର କେତେକ ସ୍ଥାନରେ ବର୍ଷା ପାଣି ଜମି ରହି ସମସ୍ୟା ସୃଷ୍ଟି କରିଥିଲା। ଏବେବି ଆଉ କେତେକ ସ୍ଥାନରେ ସମାନ ସ୍ଥିତି ସୃଷ୍ଟି ହେଉଛି। ତେଣୁ ଏହାର ସ୍ଥାୟୀ ସମାଧାନ ପାଇଁ ବିଏମ୍ସି ପଦକ୍ଷେପ ଆରମ୍ଭ କରିଛି। ଶୁକ୍ରବାର ବିଏମ୍ସି ଅତିରିକ୍ତ କମିଶନର ଶ୍ରୀମନ୍ତ ମିଶ୍ରଙ୍କ ସହ ସିଟି ଇଞ୍ଜିନିୟର ଦେବସୁନ୍ଦର ମହାପାତ୍ର, ଉତ୍ତର ମଣ୍ଡଳ ଡେପୁଟି କମିଶନର ପ୍ରମୋଦ କୁମାର ପୃଷ୍ଟି, ଏକ୍ଜିକ୍ୟୁଟିଭ ଇଞ୍ଜିନିୟର-୧ ପି.ଏସ୍.ଏନ୍. ପାତ୍ର, ଡ୍ରେନେଜ୍ ଇଞ୍ଜିନିୟର ପ୍ରଦୀପ ସାଗର ଦୁରିଆ ବିଭିନ୍ନ ସମ୍ବେଦନଶୀଳ ସ୍ଥାନକୁ ପରିଦର୍ଶନ କରି ସ୍ଥିତି ପରଖିଥିଲେ। ସେମାନଙ୍କ ସହ ବିଭାଗୀୟ ଅଧିକାରୀ ଓ ଅମିନମାନେ ଥିଲେ। ଓ୍ବାର୍ଡ ନଂ.୧୯ ଅନ୍ତର୍ଗତ ଭାଗବତ ସନ୍ଧାନ ଅଞ୍ଚଳରେ ଉପରୋକ୍ତ ଅଧିକାରୀମାନେ ଜଳବନ୍ଦୀ ସମସ୍ୟାର ସମୀକ୍ଷା କରିଥିଲେ। ପାଣି ଯିବା ବାଟରେ ବେଆଇନ ଭାବେ ଘରୋଇ ନିର୍ମାଣ କରାଯାଉଥିବା ଅଧିକାରୀଙ୍କ ଦୃଷ୍ଟିଗୋଚର ହୋଇଥିଲା। ଅତିରିକ୍ତ କମିଶନ ମିଶ୍ର ତୁରନ୍ତ ଉକ୍ତ କାର୍ଯ୍ୟ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ସେହି ଜମିର ସ୍ଥିତି ଅନୁଧ୍ୟାନ ନ କରାଯିବା ଯାଏ ନିର୍ମାଣ କାର୍ଯ୍ୟ ବନ୍ଦ ରହିବ ବୋଲି ଅଧିକାରୀମାନେ କହିଛନ୍ତି। ସେହିପରି ଅଧିକାରୀମାନେ ଓ୍ବାର୍ଡ ନଂ. ୩୮ ଅନ୍ତର୍ଗତ ନୟାପଲ୍ଲୀ ଖିମ୍ଜୀ ଗଳିରେ ଥିବା ଡ୍ରେନ୍ ଡିସେଲଟିଙ୍ଗ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା କରିଥିଲେ। ପରେ ସିଆର୍ପି ଛକରେ ଜାତୀୟ ରଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ) ଦ୍ୱାରା କରାଯାଇଥିବା ରାସ୍ତାତଳ ଡ୍ରେନ୍ରେ ଆବର୍ଜନା ଜମା ହୋଇଥିବା ଦେଖିଥିଲେ। ଉକ୍ତ ଡ୍ରେନ ସଫା ହେଉ ନ ଥିବାରୁ ଇସ୍କନ ମନ୍ଦିର ନିକଟରେ ବାରମ୍ବାର ଜଳବନ୍ଦୀ ସମସ୍ୟା ଉପୁଜୁଛି। ଉକ୍ତ ଡ୍ରେନ୍ର ନିୟମିତ ସଫେଇ କରିବା ନିମନ୍ତେ ଅଧିକାରୀମାନେ ଏନ୍ଏଚ୍ଏଆଇଙ୍କୁ ଜଣାଇଛନ୍ତି।
ବର୍ଷା ପାଣି ଜମୁଥିବା ସହରର ୩୭ଟି ସମ୍ବେଦନଶୀଳ ଅଞ୍ଚଳ ଚିହ୍ନଟ କରାଯାଇଛି। ୧୨ଟି ପ୍ରମୁଖ ସମ୍ବେଦନଶୀଳ ଅଞ୍ଚଳରେ ୧୭ଟି ପମ୍ପସେଟ୍ ଲଗାଯାଇଛି। ଜଳ ନିଷ୍କାସନର ଆବଶ୍ୟକତା ମେଣ୍ଟାଇବା ନିମନ୍ତେ ଯନ୍ତ୍ରୀ ଏବଂ ସମ୍ପୃକ୍ତ ନୋଡାଲ ଅଧିକାରୀମାନେ ପ୍ରସ୍ତୁତ ରହିଛନ୍ତି। ବର୍ଷା ଶେଷ ପର୍ଯ୍ୟନ୍ତ ସେମାନେ ପ୍ରତିଦିନ ଉକ୍ତ ସ୍ଥାନକୁ ଯାଇ ସ୍ଥିତି ଅନୁଧ୍ୟାନ କରିବେ ଓ ବରିଷ୍ଠ ଅଧିକାରୀମାନେ ନିୟମିତ ତଦାରଖ କରିବାକୁ କମିଶନର ନିର୍ଦ୍ଦେଶ ଦେଇଛନ୍ତି।