ମହାକାଳପଡ଼ା,୨୩ା୭(ଡି.ଏନ୍.ଏ.)- ଚଳିତ ବର୍ଷ ମହାକାଳପଡା ବ୍ଲକରେ ଭଲ ବର୍ଷା ନ ହେବାରୁ ଚାଷୀଙ୍କ ଠାରୁ ଆରମ୍ଭ କରି ସମସ୍ତଙ୍କ ଚିନ୍ତା ବଢ଼ିବାରେ ଲାଗିିଛି। ବର୍ଷା ଅଭାବରୁ ଜମିରେ ଗଜା ମରୁଡ଼ି ହେବାର ଆଶଙ୍କା ରହିଛି।
ଏନେଇ ମହାକାଳପଡା ବ୍ଲକ ଅନ୍ତର୍ଗତ ବଉଳକଣୀ ପଞ୍ଚାୟତରେ ବସବାସ କରୁଥିବା ବାଘୁଆମେଦ ଆଦିବାସୀପଡ଼ାର ଲୋକେ ବେଙ୍ଗ ଓ ବେଙ୍ଗୁଲୀଙ୍କ ପୂଜାର୍ଚ୍ଚନା କରିଥିଲେ। ସେମାନଙ୍କ ପୂଜା କଲେ ଭଲ ବର୍ଷା ହେବ ବୋଲି ଏହି ଆଦିବାସୀ ସମ୍ପ୍ରଦାୟର ଲୋକଙ୍କ ବିଶ୍ୱାସ ରହିଛି। ଏହି ବିଶ୍ୱାସରେ ପଡ଼ାରେ ବସବାସ କରୁଥିବା ୮୦ରୁ ଊର୍ଦ୍ଧ୍ୱ ପରିବାରର କିଛି ମହିଳା ଓ ମୁରବୀ ଏକତ୍ର ହୋଇ ବେଙ୍ଗ, ବେଙ୍ଗୁଲିକୁ ଧରି ଚାଷ ଜମିର ମଧ୍ୟସ୍ଥଳରେ ରଖି ପୂଜାର୍ଚ୍ଚନା କରିଥିଲେ। ବେଙ୍ଗ,ବେଙ୍ଗୁଲୀକୁ ଧରିବା ପରେ ସେମାନଙ୍କ ମୁଣ୍ଡରେ ସିନ୍ଦୁର ମାରି ପିଢ଼ାରେ ବସାଇ ପୂଜା କରିଥିଲେ। ଶଙ୍ଖ, ଘଣ୍ଟ ଓ ମୃଦଙ୍ଗ ଆଦି ବଜାଇ ଗୀତ ଗାଇବା ସହ ନାଚିଥିଲେ। ପୂଜା ସରିବା ପରେ ଗ୍ରାମର କିଛି ମହିଳା ବେଙ୍ଗ ଓ ବେଙ୍ଗୁଲୀକୁ ନେଇ ଏକ ଜଳାଶୟରେ ଛାଡ଼ି ଦେଇଥିଲେ। ଏହି ପୂଜାରେ ଗ୍ରାମରେ ରବୀନ୍ଦ୍ର ସିଂ, ପୂର୍ଣ୍ଣ ସିଂ, ଗୀତା ସିଂ, ସାବିତ୍ରୀ ସିଂ, କୁନି ସିଂ, ସୁଲୋଚନା ସିଂ ଏବଂ ରାମ ସିଂ ପ୍ରମୁଖ ସାମିଲ ହୋଇଥିଲେ।