ପୁରୀ ଅଫିସ,୩।୫: ଠିକ୍ ବର୍ଷକ ତଳେ ଛାତି ଥରାଇ ଦେଲାଭଳି ପବନ ଏବଂ ମୁଷଳ ବର୍ଷା ସବୁକିଛି ଉଜାଡ଼ି ଦେଇଥିଲା। ମୁଣ୍ଡଉପରୁ ଛପର ଉଡ଼ାଇ ନେବା ସହ ଅନେକ ପରିବାରକୁ ବେଘର କରିଥିଲା। କୌଣସି ପ୍ରକାରେ ଜୀବନ ବଞ୍ଚତ୍ଗଲା ସିନା ହେଲେ ମାଟିରେ ଲୋଟିଗଲା ହଜାର ହଜାର ଘର। ସେଥିମଧ୍ୟରୁ ଅନେକ ପରିବାର ପଲିଥିନରେ ଘର କରି ମୁଣ୍ଡ ଗୁଞ୍ଜିଥିଲେ। ଭାବିଥିଲେ କିଛିମାସ ପରେ ସ୍ଥିତି ସୁଧୁରିଯିବ। ଘରଭଙ୍ଗା ସହାୟତା ପାଇଲେ ପୁଣି ଘର ଠିଆ କରିବେ। ହେଲେ ଏଯାଏ ସେମାନଙ୍କ ସ୍ବପ୍ନ ପୂରଣ ହୋଇନି। ଅନେକ ବାତ୍ୟା ବିପନ୍ନ ଏବେ ବି ପଲିଥିନ ତଳେ ଜୀବନ କାଟୁଛନ୍ତି। ଏପରି କି ବହୁ ବିପନ୍ନଙ୍କ ପାଖରେ ସରକାରଙ୍କ ପକ୍ଷରୁ ପ୍ରଦାନ କରାଯାଉଥିବା ଘରଭଙ୍ଗା ସହାୟତା ଏଯାବତ୍ ପହଞ୍ଚତ୍ ନାହିଁ। ପ୍ରଶାସନିକ ଅଧିକାରୀଙ୍କୁ ପଚାରିଲେ ଏନେଇ ତଦନ୍ତ ଚାଲିଛି ବୋଲି ଉତ୍ତର ମିଳୁଛି। ଜିଲାର ପ୍ରାୟ ୧୧ଟି ଯାକ ବ୍ଲକ ବାତ୍ୟା ଦ୍ୱାରା ପ୍ରଭାବିତ ହୋଇଥିଲା। ଜିଲାରେ ୨,୭୮,୭୬୨ଟି ବାସଗୃହ କ୍ଷତିଗ୍ରସ୍ତ ହୋଇଛି। ସେଥିମଧ୍ୟରୁ ୭୪ଟି ପକ୍କାଘର, ୮,୯୮୫ଟି କଚ୍ଚା ଘର ସମ୍ପୂର୍ଣ୍ଣ ଭାଙ୍ଗିରୁଜି ଯାଇଥିବାବେଳେ ୬,୧୨୭ଟି ପକ୍କାଘର ଏବଂ ୯୮,୫୮୮ କଚ୍ଚାଘର ଅତ୍ୟଧିକ କ୍ଷତିଗ୍ରସ୍ତ ହୋଇଛି। ସେହିପରି ୧,୧୩,୨୮୧ଟି ପକ୍କାଘର, ୪୯,୫୨୯ଟି କଚ୍ଚାଘର ଆଂଶିକ ଭାବେ କ୍ଷୟକ୍ଷତି ହୋଇଥିବା ବେଳେ ୨୧୭୮ଟି କୁଡ଼ିଆ ଏବଂ ୪୪,୩୭୮ଟି ଗୁହାଳ ନଷ୍ଟ ହୋଇଛି। ପକ୍କା କିମ୍ବା କଚ୍ଚାଘର ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲେ ୯୫,୧୦୦ ଟଙ୍କା, ପକ୍କା ଘର ଆଂଶିକ ଭାଙ୍ଗିଥିଲେ ୫,୨୦୦ ଏବଂ କଚା ଘର ଆଂଶିକ ଭାଙ୍ଗିଥିଲେ ୩,୨୦୦ ଟଙ୍କା ଲେଖାଏ ସରକାରୀ ସହାୟତା ପ୍ରଦାନର ବ୍ୟବସ୍ଥା ହୋଇଥିଲା।