ବଲାଙ୍ଗୀର ଅଫିସ, ୨୬।୨ – ବଲାଙ୍ଗୀରରେ ସୋମବାର ବିଳମ୍ବିତ ରାତିରେ ଘୂର୍ଣ୍ଣିଝଡ ସହ ପ୍ରବଳ ବର୍ଷା ହୋଇଥିଲା । ଏଥିରେ ବ୍ୟାପକ କ୍ଷୟକ୍ଷତି ହୋଇଛି। ବଲାଙ୍ଗୀର ସହରରେ ବହୁ ବିଦ୍ୟୁତ୍ ଖୁଣ୍ଟ, ଗଛ ଭାଙ୍ଗି ପଡିବାରୁ ସହରର ଅର୍ଦ୍ଧାଧିକ ଅଞ୍ଚଳରେ ବିଦ୍ୟୁତ୍ ସରାବରାହ ବନ୍ଦ ରହିଛି। ରାତି ପ୍ରାୟ ୨ଟାରେ ହୋଇଥିବା ଘୂର୍ଣ୍ଣିଝଡରେ ସହରର ପ୍ୟାଲେସ ଲାଇନ, ରାମେଶ୍ୱର ନଗର, ମେଘନାଥପଡା, ଗାନ୍ଧୀନଗର ପଡା, ସତ୍ୟନାରାୟଣ ପଡା ଏବଂ ଅନ୍ୟ ଅଞ୍ଚଳରେ ଥିବା ବହୁ ଘରର ଆଜବେଷ୍ଟସ ଛାତ ଉଡି ଯାଇଛି । ରାମେଶ୍ୱର ନଗରରେ କାନ୍ଥ ପଡିଯିବାରୁ ସୈରେନ୍ଦ୍ରୀ ବରାଡ ନାମକ ଜଣେ ମହିଳା ଗୁରୁତର ଆହତ ହୋଇ ବୁର୍ଲା ସ୍ଥାନାନ୍ତରଣ ହୋଇଛନ୍ତି। ସଦେଇପାଲି ଓ ମାଧିଆପାଲିରେ ମଧ୍ୟ ବ୍ୟାପକ କ୍ଷୟକ୍ଷତି ହୋଇଛି। ଶତାଧିକ ଘର ଆଜବେଷ୍ଟସ ଉଡି ଯିବା ସହ ଗଛ ପଡି ବ୍ୟାପକ ଭଙ୍ଗାରୁଜା ହୋଇଛି । ସଦେଇପାଲିରେ ମଙ୍ଗଳବାରଠାରୁ ଆରମ୍ଭ ହେବାକୁ ଥିବା ୧୦ଦିନିଆ ସଂକୀର୍ତ୍ତନ୍ୟ ମହାକୁମ୍ଭ ପାଇଁ ବ୍ୟାପକ ଆୟୋଜନ କରାଯାଇଥିଲା। ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ସୁଦୃଶ୍ୟ ପ୍ରହରୀ ମଣ୍ଡପ ତିଆରି କରାଯାଇଥିଲା। ଘୁର୍ଣ୍ଣଝଡ ସହ ସମ୍ପୂର୍ଣ୍ଣ ଧୂଳିସାତ ହୋଇଯାଇଛି । ଏହି ସଂକୀର୍ତ୍ତନ୍ୟକୁ ସାଇଟ କଲେଜ ନିକଟ ମନ୍ଦିର ମଣ୍ଡପକୁ ସ୍ଥାନାନ୍ତରଣ କରାଯାଇଛି । ଏହା ସହିତ ତଣ୍ଡାମୁଣ୍ଡା, ଲୋୟର ସୁକତେଲ ବୁଡିଅଞ୍ଚଳ, ଚନ୍ଦନଭାଟି ଅଞ୍ଚଳରେ ବର୍ଷା ଯୋଗୁଁ ବ୍ୟାପକ ପନିପରିବା ନଷ୍ଟ ହୋଇଛି। ଗାନ୍ଧୀନଗର ପଡାସ୍ଥିତ ପଟେଲ ନର୍ସିଂହୋମ ସମ୍ମୁଖରେ ରାସ୍ତା ଉପରେ ଦୁଇଟି ଗଛ ଉପୁଡି ପଡିଥିଲା। ଏଥିଯୋଗୁ ସେଠାରେ ରାସ୍ତାକଡରେ ଥିବା ବିଦ୍ୟୁତ ତାର ଛିଣ୍ଡି ଯାଇଛି। ଏହା ସହିତ ତେଲିଗୋଠ ପଡା, ମାଲପଡା, ଟିକ୍ରାପଡା, ରାଧାରାଣୀପଡା, କ୍ଲବପଡା, ପ୍ୟାଲେସଲାଇନ, ଇଚ୍ଛାପଡା, ମୁଖ୍ୟ ମାକେର୍ଟରେ ବିଦ୍ୟୁତ୍ ସରାବରାହ ବନ୍ଦ ରହିଥିବାରୁ ଅଞ୍ଚଳଟି ସମ୍ପୂର୍ଣ୍ଣ ଅନ୍ଧାରରେ ରହିଛି ।