ବଲାଙ୍ଗୀର ଅଫିସ, ୨୯।୫-ବଲାଙ୍ଗୀର ଜିଲାରେ ଜୁନ ୧ତାରିଖରୁ ଘରୋଇ ବସ୍ ଚଳାଚଳ ଆରମ୍ଭ କରିବ। ଜିଲା ଘରୋଇ ବସ୍ ମାଲିକ ସଂଘର ଏକ ଗୁରୁତ୍ୱପୂର୍ଣ ସାଧାରଣ ପରିଷଦ ବୈଠକରେ ଏହି ନିଷ୍ପତ୍ତି ନିଆଯାଇଛି। ଜୁନ୍ ୧ତାରିଖ ପୂର୍ବରୁ ସମସ୍ତ ବସ୍କୁ ସଂଘ ପକ୍ଷରୁ ସାନିଟାଇଜ୍ କରାଯିବ ବୋଲି ନିଷ୍ପତ୍ତି ଗ୍ରହଣ କରାଯାଇଛି। ସମସ୍ତ ଯାତ୍ରୀ ମାସ୍କ ବ୍ୟବହାର କରି ବସ୍ରେ ନିୟୋଜିତ କର୍ମଚାରୀଙ୍କୁ ସହଯୋଗ କରିବା ପାଇଁ ସଂଘ ପକ୍ଷରୁ ଜନସାଧାରଣଙ୍କୁ ଅନୁରୋଧ କରାଯାଇଛି। ଏ ନେଇ ସଂଘ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ସଂଘ ସଭାପତି ହେମନ୍ତ ପଣ୍ଡା ଏହା ଜଣାଇଛନ୍ତି । ଜିଲାବ୍ୟାପୀ ବସ୍ ଚଳାଚଳ ହେଲେ ଜିଲାରେ ଜୀବନଯାତ୍ରା ସ୍ବାଭାବିକ ହେବା ସହ ଗରିବ, ଖଟିଖିଆ, ଚାଷୀ ମୂଲିଆ ଏବଂ କର୍ମଚାରୀ ଉପକୃତ ହେବେ ବୋଲି ସଭାପତି ପଣ୍ଡା କହିଛନ୍ତି। ସରକାରୀ ବ୍ୟବସ୍ଥା ମଧ୍ୟରେ ରହିଥିବା ନିର୍ଦ୍ଦିଷ୍ଟ କେତେକ ବର୍ଗଙ୍କ ପାଇଁ ଉଦ୍ଦିଷ୍ଟ ଯାତ୍ରୀଭଡା ରିହାତିକୁ ବାଦ୍ ଦେଲେ ଅନ୍ୟ କୌଣସି ପ୍ରକାର ରିହାତି ଦାବି ନ କରିବାକୁ ଯାତ୍ରୀଙ୍କୁ ସଂଘ ପକ୍ଷରୁ ଅନୁରୋଧ କରାଯାଇଛି। ଯାତ୍ରୀ ଭଡାରେ ସମସ୍ତ ପ୍ରକାର ରିହାତିକୁ ସଂଘ ପକ୍ଷରୁ ବାରଣ କରାଯାଇଛି ା ସରକାରୀ କାର୍ଯ୍ୟରେ ନିୟୋଜିତ ଥିବା କେତେକ ବସ୍କୁ ପର୍ଯ୍ୟାୟ କ୍ରମେ ଯାତ୍ରୀ ସେବାରେ ନିୟୋଜିତ କରାଯିବ ବୋଲି ସଂଘ କହିଛି । ଯାତ୍ରୀମାନଙ୍କର ସୁବିଧା ପାଇଁ ଜିଲାର ସମସ୍ତ ବସ୍ଷ୍ଟାଣ୍ଡରେ ରହିଥିବା ହୋଟେଲ ଓ ଅନ୍ୟାନ୍ୟ ଦୋକାନ ଗୁଡିକୁ ଖୋଲିବା ପାଇଁ ସଂଘ ଦାବି କରିଛି। ଲକ୍ଡାଉନ ପୂର୍ବରୁ ମଧ୍ୟ ଜିଲା ଘରୋଇ ବସ୍ ମାଲିକ ସଂଘ ପକ୍ଷରୁ ହାତ ଧୋଇ ବସ୍ରେ ବସିବା ପାଇଁ ବିଭିନ୍ନ ସଚେତନତା କାର୍ଯ୍ୟକ୍ରମ କରାଯାଇଥିଲା। ଏହି ବୈଠକରେ ସଂଘ ସମ୍ପାଦକ ପ୍ରଶାନ୍ତ ଶତପଥୀ, ଉପସଭାପତି ସୌମେନ୍ଦ୍ର ପରିଚ୍ଛା, କୋଷାଧ୍ୟକ୍ଷ ଶିବଶଙ୍କର ପଟେଲ, ସହ ସମ୍ପାଦକ ଲିକୁନ ଆଚାର୍ଯ୍ୟଙ୍କ ସହ ଅନ୍ୟମାନେ ଉପସ୍ଥିତ ଥିଲେ।