ମୁମ୍ବାଇ: ସାରା ଭାରତରେ ଗୁରୁବାର ପାଳନ କରାଯାଉଛି ରାଖୀ ପୂର୍ଣ୍ଣିମା ଉତ୍ସବ। ଏହି ଅବସରରେ ଭଉଣୀ ଭାଇ ହାତରେ ସୁରକ୍ଷାର ଡୋର ବାନ୍ଧୁଥିବା ବେଳେ ଭାଇ ଜୀବନ ଥିବା ପର୍ଯ୍ୟନ୍ତ ଭଉଣୀକୁ ସୁରକ୍ଷା ଦେବାପାଇଁ କଥା ଦେଇଥାଆନ୍ତି। ଏହି ପର୍ବକୁ ବଲିଉଡ୍ରେ ମଧ୍ୟ ଖୁବ୍ ଧୁମଧାମରେ ପାଳନ କରାଯାଇଥାଏ। ତେବେ ବଲିଉଡ୍ରେ ଏମିତି କେତେଜଣ ଭଉଣୀ ଭାଇ ଅଛନ୍ତି ଯେଉଁମାନେ ସାବତ। ହେଲେ ଏମାନଙ୍କ ମଧ୍ୟରୁ ଅନେକଙ୍କ ସମ୍ପର୍କ ଖୁବ୍ ନିବିଡ।
ସାରା ଅଲ୍ଲି ଖାଁ ହେଉଛନ୍ତି ଶୈଫ ଅଲ୍ଲି ଖାଁଙ୍କ ପ୍ରଥମ ସ୍ତ୍ରୀ ଅମ୍ରିତା ସିଂଙ୍କ ଝିଅ। ଆଉ ତୈମୁର ହେଉଛନ୍ତି ଶୈଫଙ୍କ ଦ୍ୱିତୀୟ ସ୍ତ୍ରୀ କରିନା କପୁରଙ୍କ ପୁଅ। ହେଲେ ଏହି ସାବତ ଭଉଣୀ-ଭାଇଙ୍କ ମଧ୍ୟରେ ସମ୍ପର୍କ ଖୁବ୍ ନିବିଡ। କାରଣ ଗତବର୍ଷ ସାରା ଓ ତୈମୁରଙ୍କ ରାଖୀ ବାନ୍ଧିବାର ଫଟୋ ଯେତିକି ସୁନ୍ଦର ହୋଇଥିଲା ତାହା ସେହି ପରିମାଣରେ ସୋସିଆଲ ମିଡିଆରେ ଭାଇରାଲ ମଧ୍ୟ ହୋଇଥିଲା।
ଅର୍ଜୁନ କପୁର ହେଉଛି ବୋନି କପୁରଙ୍କ ପ୍ରଥମ ସ୍ତ୍ରୀ ମୋନାଙ୍କ ପୁଅ। ହେଲେ ଜାହ୍ନବୀ ଓ ଖୁସି ହେଉଛନ୍ତି ବୋନିଙ୍କ ଦ୍ୱିତୀୟ ସ୍ତ୍ରୀ ତଥା ବଲିଉଡ୍ ନାୟିକା ଶ୍ରୀଦେବୀଙ୍କ ଝିଅ। ପୂର୍ବରୁ ଏମାନଙ୍କର ସମ୍ପର୍କ ଏତେଟା ଭଲ ନ ଥିବା ବେଳେ ଶ୍ରୀଦେବୀଙ୍କ ମୃତ୍ୟୁ ପରେ ଅର୍ଜୁନ, ଖୁସି ଓ ଜାହ୍ନବୀଙ୍କର ଖୁବ୍ ଯତ୍ନ ନେଉଛନ୍ତି।
ସେମିତି ସନ୍ନି ଦେଓଲ ଓ ବବି ଦେଓଲ ଧର୍ମେନ୍ଦ୍ରଙ୍କ ପ୍ରଥମ ସ୍ତ୍ରୀ ପ୍ରକାଶ କୌରଙ୍କ ସନ୍ତାନ ହୋଇଥିବା ବେଳେ ଇସା ଓ ଆହାନା ଧର୍ମେନ୍ଦ୍ରଙ୍କ ଦ୍ୱିତୀୟ ସ୍ତ୍ରୀ ହେମା ମାଳିନିଙ୍କ ଝିଅ। ଏମାନେ ସାବତ ମା’ଙ୍କ ଝିଅ ହୋଇଥିଲେ ମଧ୍ୟ ସନ୍ନି ଓ ବବି ଏମାନଙ୍କୁ ନିଜ ଭଉଣୀ ଭଳି ସ୍ନେହ ଦିଅନ୍ତି ବୋଲି କୁହାଯାଏ।
ସେମିତି ବଲିଉଡ୍ ନାୟକ ରାଜ ବବ୍ବରଙ୍କ ପ୍ରଥମ ସ୍ତ୍ରୀ ନଦିରାଙ୍କ ସନ୍ତାନ ହେଉଛନ୍ତି ଜୁହି ଓ ଆର୍ଯ୍ୟନ ହେଲେ ରାଜ ବବ୍ବରଙ୍କ ଦ୍ୱିତୀୟ ସ୍ତ୍ରୀ ସ୍ବିତା ପାଟିଲଙ୍କ ସନ୍ତାନ ହେଉଛନ୍ତି ପ୍ରତିକ ବାବ୍ବର। ଯଦିଓ ଏହି ସାବତ ସନ୍ତାନମାନଙ୍କ ମଧ୍ୟରେ ସମ୍ପର୍କ ଏତେଟା ଭଳ ନ ଥିଲା ଏବେ କିନ୍ତୁ ଏମାନଙ୍କ ସମ୍ପର୍କ ଭଲ ଥିବା କୁହାଯାଉଛି।
ତ୍ରିଶାଳା ଅଭିନେତା ସଞ୍ଜୟ ଦତ୍ତଙ୍କ ପ୍ରଥମ ସ୍ତ୍ରୀ ରୁଚା ଶର୍ମାଙ୍କ ସନ୍ତାନ ହୋଇଥିବା ବେଳେ ସଞ୍ଜୟଙ୍କ ଦ୍ୱିତୀୟ ସ୍ତ୍ରୀ ମାନ୍ୟତାଙ୍କର ସନ୍ତାନ ହେଉଛନ୍ତି ସାହାରାନ ଓ ଇକରା। ହେଲେ ଏମାନଙ୍କ ମଧ୍ୟରେ ସମ୍ପର୍କ ଏତେଟା ଭଲ ନୁହେଁ ବୋଲି ଶୁଣିବାକୁ ମିଳେ।