ଅତାବିରା, ୪।୩ (ଡି.ଏନ୍.ଏ.)-କେନ୍ଦ୍ର ଆର ରାଏଜ୍ ଉଭଏ ସରକାର ଗରିବ୍ ଦୁଖିକର ଲାଗି ଅନେକ ଯୋଜନା କାଯ୍କାରୀ କରୁଛନ୍। ସରକାରୀ ଯୋଜନା ଭଁଡ଼ାରରେ ଛୁଆ ଜନମ୍ ହେଲାନୁ ମଲା ଲୁକ୍କର ଶୁଧି କାଯ୍ ତକ ସାହାଯ୍ ଦେବାର ବେବସ୍ତା ରହିଛେ। ହେଲେ ଆଏଜ୍ ବି ଆମର ରାଏଜେ ନିହାତି ଗରିବ୍ ଲୋକ୍ ପେଟ୍ ପାଟନାର ଲାଗି ନାନା ଦୁଖ୍ ଭୁଗୁଛନ୍। କିଏ ପେଟ୍ପାଟନା ଲାଗି ଦାଦନ ଯାଉଛେ ତ ଆର କିଏ ଜନମ୍ ମାଏଟ୍କେ ପର କରି ଉନିଆନେ ଯାଇ ରହୁଛେ। ସେନ୍ତା ଆରକେତେ ଗରିବ୍ ଦୁଖି ଜାଗାବାଡ଼ି ଅଭାବୁ କିଏ ବଁଧ୍ ଖଁଡ଼ିଥି ତ ଆର କିଏ କେନ୍ ନାଲ୍ ତରେ ସରକାରୀ ଜାଗାଥି କୁରିଆଟେ କରି ମୁଡ଼ ଗୁଁଜୁଛନ୍। ଏନ୍ତା ଝନେ ଦୁଖି ଲୋକ୍ ସଂଗେ ଭେଟ୍ ହେଇଥିଲା ବୁର୍ଲା ବଡ଼ ଡାକ୍ତରଖାନା ଯକ୍ଷ୍ମା ଓ୍ବାର୍ଡ ସାମନାଥି।
ସୂଚନା ଅନ୍ସାରେ ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ସଂସାରିପାଲି ଗଁାର ମୂଲ ବାସିନ୍ଦା ମୋହନ ମେହେର(୩୫)। ପରିବାର କହେଲେ ମାଏକିନା ପଦ୍ମାବତୀ, ୪ ଝି’ ଶ୍ରୁତୀ, ପ୍ରତି, ଇତି ଆର ଶ୍ରଦ୍ଧାକୁଁ ନେଇ ତାକର ସଁସାର। ମୋହନ ଝନେ ନିହାତି ଗରିବ୍ ଲୋକ୍। ଆଏଜ୍କେ ୫୦ ବଛର ତଲେ ପେଟ୍ପାଟନାର ଲାଗି ମୋହନକଁର ବାପା ଜନମ୍ ମାଏଟ୍ ଛାଡ଼ି କୁଟୁମବସିଆ ବୁର୍ଲାକେ ପଲେଇ ଆସିଥିଲେ। ସେ କୁଲିମଜୁରି କରି ନିଜର କୁଟୁମ ପୁଷୁଥିଲେ। ମହୋନ ବଡ଼ ହେଲା ଉତାରୁ ବିହାଚୁରା ହେଇ ଘର ସଁସାର କରିଛନ୍। ସେ ବୁର୍ଲା ଏନ୍ଏସିର ଗୌରପାଲି ମନ୍ଦିର ପଡ଼ାରେ ଗୁଟେ ସରକାରୀ ଜାଗାରେ କୁରିଆଟେ କରି କୁଟୁମବସିଆ ମୁଡ଼ ଗୁଁଜିଛନ୍। ପରିବାରଟା ସରକାରୀ ଯୋଜନାରେ ମାସିକ ୨୦ କେ.ଜି. ଚାଉଲ ଆର ୨ ଲିଟର କିରାସିନ ପାଉଛନ୍। ହେଲେ ରୟତି ଜାଗାବାଡ଼ି ଅଭାବୁ ସରକାରୀ ଯୋଜନାରେ ଘରଖଁଡ଼େ ପାଇ ନାଇଁପାରବାର ବଲି ସେ କହିଥିଲେ। ମୋହନ ଫିଦିନ ସଖାଲୁ ଭିମସାରର ଯକ୍ଷ୍ମା ଓ୍ବାର୍ଡ ଆଘେ ଗୁଟେ ଠେଲା ଲଗଉଛନ୍। ସେ ଠେଲାରେ ମୁଢ଼ି ମିକ୍ସଚର, ପାଉଁରୁଟି, ବିସ୍କୁଟ, ଇଡ୍ଲି, ଚା’ ବିକୁଛନ୍। ମୋହନ୍ ଓ୍ବାର୍ଡ ଆଘେ ପୁହୁଁଚି ପଡ଼ଲେ ରୁଗୀମାନକର ଲାଗେଲେସରମାନେ ଗଦ୍ଗଦ୍ ମନେ ତାକରନୁ ଜିନିଷ ନେବାର ଲାଗି ଲମ୍ବା ଧାଡ଼ିରେ ଠିଆ ହେଉଛନ୍। ଇ ଯକ୍ଷ୍ମା ଓ୍ବାର୍ଡ ଆସେପାସେ କେହେନ୍ସି ଦୁକାନ ବଜାର ନଁାଇଁନ। ଯେନ୍ଦିନ ମୋହନ୍ କେହେନ୍ସି କାରନ୍ରୁ ନାଇଁ ଆସି ପାରବାର ରୁଗୀମାନକର ଲାଗେଲେସରମାନେ ବହୁତ୍ ହଇରାନ ହରକତ ହେଉଛନ୍। ମୋହନ ଫିଦିନ ଯାହା ରୁଜଗାର କରୁଛନ୍ ସେଥ୍ରେ ତାକର ପରିବାର ଚଲବାର ସଂଗେ ଝି’ମାନକର ପାଠ୍ପଢ଼ା ଖରଚ୍ ତୁଲଉଥିବାର କହିଛନ୍। ହେଲେ ଅଭାବ ଅନାଟନ ସବୁବେଲେ ଲାଗି ରହୁଛେ, ହେଥିର ଲାଗି ଜାଗାବାଡ଼ି କି ଘରଦୁଆର ତିଆରି ନାଇଁପାରବାର। ସରକାରୀ ଯୋଜନାରେ ଡିହ ଖଁଡ଼େ ଆର ଘରଟେ ପାଏଲେ ମୋର ଦୁଖ୍ ଯାଏତା ବଲି ମୋହନ୍ କହିଥିଲେ।