ବସ୍ତା, ୨୯।୬(ସ୍ବ.ପ୍ର) : ବାଲେଶ୍ୱର ଜିଲା ବସ୍ତା ଓ ତାହାର ଆଖପାଖ ଅଞ୍ଚଳରେ ଲୁଟେରାଙ୍କ ଦୌରାମତ୍ୟ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଲୁଟେରାମାନେ ବିଶେଷ କରି ବିଭିନ୍ନ ବ୍ୟାଙ୍କରୁ ବାହାରୁଥିବା ଲୋକଙ୍କ ଉପରେ ତୀକ୍ଷ୍ଣ ନଜର ରଖି ସେମାନଙ୍କ ଦୃଷ୍ଟି ଆଢୁଆଳରେ ଲୁଟ୍ କରୁଥିବା ଜଣାପଡିଛି। ଏହିଭଳି ଜଣେ ଶିକ୍ଷକ ସ୍ଥାନୀୟ ବ୍ୟାଙ୍କରୁ ଟଙ୍କା ନେଇ ବାହାରିବା ପରେ ଲୁଟେରାମାନେ ଟଙ୍କା ବ୍ୟାଗକୁ ଛଡ଼ାଇ ନେଇ ଖସି ପଳାଉଥିଲେ। ଲୋକେ ତାଙ୍କୁ କାବୁ କରି ପୋଲିସ ଜିମା ଦେଇଛନ୍ତି।
ଶନିବାର ମଧ୍ୟାହ୍ନରେ ବସ୍ତା ବ୍ଲକ ପାଟପୁର ୟୁଜିୟୁପି ସ୍କୁଲର ପ୍ରଧାନଶିକ୍ଷକ ପୁରୁଷୋତ୍ତମପୁର ପଞ୍ଚାୟତ ସରିଷା ଗ୍ରାମର ନାରାୟଣ କିସ୍କୁ ବ୍ୟାଙ୍କ ଅଫ ଇଣ୍ଡିଆ ବସ୍ତା ଶାଖାକୁ ଟଙ୍କା ଉଠାଇବାକୁ ଆସିଥିଲେ। ଟଙ୍କା ଉଠାଇ ସାରି ସେଠାରେ ଥିବା ଏକ ଦୋକାନରୁ ସେ ଦହିବରା ଖାଉଥିଲେ। ଏହି ସମୟରେ ଯୋଜନାବଦ୍ଧ ଭାବେ ଛିଡ଼ା ହୋଇଥିବା ଜଣେ ଲୁଟେରା ତାଙ୍କ ହାତରୁ ଟଙ୍କା ବ୍ୟାଗ୍କୁ ଛଡ଼ାଇ ନେଇ ପାଖରେ ଥିବା ଜଣେ ଯୁବକଙ୍କ ସହ ବାଇକ୍ରେ ବସି ପଳାଇବାକୁ ଉଦ୍ୟମ କରିଥିଲେ। ହେଲେ ଦୁର୍ଭାଗ୍ୟବଶତଃ ସେ ଗାଡିରୁ ଖସିପଡିବାରୁ ଶିକ୍ଷକ ନାରାୟଣ ଜୋରରେ ଚିତ୍କାର କରିଥିଲେ। ସେଠାରେ ଉପସ୍ଥିତ ଲୋକମାନେ ଲୁଟେରାଙ୍କୁ କାବୁ କରିବାରେ ସକ୍ଷମ ହୋଇଥିଲେ। ଗାଡିରେ ଥିବା ଅନ୍ୟ ଲୁଟେରା ସହଯୋଗୀ ବାଲେଶ୍ୱର ଅଭିମୁଖେ ଚାଲିଯାଇଥିଲେ। ଲୁଟେରା ଜଣକ ସ୍ଥାନୀୟ ଲୋକଙ୍କ ଆକ୍ରୋଶର ଶିକାର ହୋଇଥିଲେ। ଟଙ୍କା ବ୍ୟାଗ୍କୁ ଶିକ୍ଷକଙ୍କୁ ସ୍ଥାନୀୟ ଲୋକେ ହସ୍ତାନ୍ତର କରିଥିବାବେଳେ ଲୁଟେରାଙ୍କୁ ପୋଲିସରେ ଜିମା ଦେଇଥିଲେ। ଏ ନେଇ ଶିକ୍ଷକ ନାରାୟଣ କିସ୍କୁ ଥାନାରେ ଲିଖିତ ଅଭିଯୋଗ କରିଛନ୍ତି। ଲୁଟେରାଙ୍କୁ ପୋଲିସ ନିଜ ହେପାଜତକୁ ନେଇ ତଦନ୍ତ ଜାରି ରଖିଛି। ତେବେ ଲୁଟେରା ଜଣକ ତାର ନାମ କହୁ ନ ଥିବା ବେଳେ ତାଙ୍କ ଘର ଯାଜପୁର ଅଞ୍ଚଳରେ ବୋଲି କହିଛନ୍ତି। ତେଣୁ ଏହି ଲୁଟେରା ଗ୍ୟାଙ୍ଗକୁ ଧରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।