ବସ୍ତା, ୨୫।୮(ସ୍ବ.ପ୍ର.)-ବାଲେଶ୍ୱର ଜିଲା ଶନିବାର ରାତିରୁ ବର୍ଷା ଲାଗି ରହିବାରୁ ବସ୍ତା ଡାକ୍ତରଖାନାରେ ରବିବାର ହଠାତ୍ ନର୍ଦ୍ଦମା ପାଣି ପଶିଯାଇଥିଲା। ଡାକ୍ତରଖାନା ପାଖ ଡ୍ରେନ୍ରେ ଅନାବନ ସାମଗ୍ରୀ ଜମା ହୋଇ ରହିଥିବା ଏଭଳି ପରିସ୍ଥିତି ଉପୁଜିଥିଲା। ଫଳରେ ରୋଗୀ ଓ ସେମାନଙ୍କର ସମ୍ପର୍କୀୟଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଏହି ଦୂଷିତ ପାଣି ଆଉଟଡ଼ୋରରେ ଥିବା ଡାକ୍ତରଙ୍କ ରୁମ ଓ ନାମ ପଞ୍ଜୀକୃତ ହେଉଥିବା ରୁମ, ଟିକାଗ୍ରହଣ କେନ୍ଦ୍ର, ରୋଗୀ ରହୁଥିବା ରୁମ୍ ପର୍ଯ୍ୟନ୍ତ ପଶିଯାଇଥିଲା। ଫଳରେ କାଦୁଅ ପଚ ପଚ ସହ ଦୁର୍ଗନ୍ଧମୟ ପରିବେଶ ସୃଷ୍ଟି ହୋଇଥିଲା। ଖବରପାଇ ହସ୍ପିଟାଲର ସଫେଇ କର୍ମଚାରୀ ପହଞ୍ଚି ସଫେଇ କାର୍ଯ୍ୟ କରିଥିଲେ ା ହସ୍ପିଟାଲ ଭିତରେ ସ୍ବଚ୍ଛତା ପାଇଁ ଅର୍ଥବ୍ୟୟ ହେଉଥିବା ବେଳେ ଏହା ମଧ୍ୟ ଠିକ୍ ଭାବେ କାଯର୍ୟକାରୀ ହେଉନାହିଁ କିମ୍ବା ବିଭାଗୀୟ ଅଧିକାରୀମାନେ ଏହାକୁ ଆଖି ବୁଜି ଦେଉଥିବା ଜଣାଯାଇଛି। ପାଖରେ ଥିବା ଡ୍ରେନ୍କୁ ନିୟମିତ ସଫେଇ କରାଯାଉନାହିଁ। ଏହି ଦୂଷିତ ପାଣିରେ ପଶି ଲୋକେ ଯାତାୟାତ କରିଥିଲେ। ଏଭଳି ଦୁର୍ଗନ୍ଧ ମଧ୍ୟରେ ରହିବା କାଠିକର ବୋଲି ଚିକିତ୍ସାଧୀନ ରୋଗୀମାନେ ଅଭିଯୋଗ କରିଛନ୍ତି। ଏସବୁ ସମସ୍ୟା ପ୍ରତି ସ୍ବାସ୍ଥ୍ୟ ବିଭାଗର ଅଧିକାରୀ ତୁରନ୍ତ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।