ଅନୁଗୋଳ ଅଫିସ, ୨୯।୪ – ଅନୁଗୋଳ ଜିଲାର ବିଭିନ୍ନ ବ୍ଲକରେ କ୍ୱାରାଣ୍ଟାଇନ୍ରେ ଥିବା ସୁନ୍ଦରଗଡ଼, ଦେବଗଡ଼, କେନ୍ଦୁଝର ଓ କଳାହାଣ୍ଡି ଜିଲାର ୧୭୯ ଜଣ ଲୋକଙ୍କୁ ମଙ୍ଗଳବାର ସେମାନଙ୍କ ଘରକୁ ପଠାଇ ଦିଆଯାଇଛି। କ୍ୱାରାଣ୍ଟାଇନ ଅବଧି ଶେଷ ହୋଇଯାଇଥିବାରୁ ପ୍ରଶାସନ ପକ୍ଷରୁ ବସ୍ ଯୋଗେ ସମ୍ପୃକ୍ତ ଲୋକମାନଙ୍କୁ ପଠାଯାଇଥିବା ଜିଲାପାଳ ମନୋଜ କୁମାର ମହାନ୍ତି ସୂଚନା ଦେଇଛନ୍ତି।
ଲକ୍ଡାଉନ୍ ଉଲ୍ଲଂଘନ କରି ଏହି ବ୍ୟକ୍ତିମାନେ ବିଭିନ୍ନ କାର୍ଯ୍ୟରେ ଆସିଥିବା ବେଳେ ସେମାନଙ୍କୁ ଅନୁଗୋଳ ଜିଲାରେ ପର୍ଯ୍ୟାୟକ୍ରମେ ସଙ୍ଗରୋଧରେ ରଖାଯାଇଥିଲା। ତେବେ ସମ୍ପୃକ୍ତ ୧୭୯ଜଣଙ୍କ ୧୪ ଦିନିଆ କ୍ୱାରାଣ୍ଟାଇନ ସମୟ ଶେଷ ହୋଇଥିବାରୁ ସେମାନଙ୍କୁ ପ୍ରମାଣପତ୍ର ପ୍ରଦାନ କରାଯିବା ସହ ୫ଟି ବସ୍ ଯୋଗେ ନିଜ ନିଜ ଜିଲାକୁ ପଠାଇ ଦିଆଯାଇଛି। ସୁନ୍ଦରଗଡ଼ ପାଇଁ ୨ଟି ବସ୍ରେ ପାଲଲହଡ଼ା, ବଅଁରପାଳ, କଣିହଁା ବ୍ଲକରେ ସଙ୍ଗରୋଧ ଶେଷ କରିଥିବା ୬୯ ଜଣ, ଦେବଗଡ଼ ପାଇଁ ୨ଟି ବସ୍ରେ ପାଲଲହଡ଼ା, ବଅଁରପାଳ, କଣିହଁା ବ୍ଲକରେ ଥିବା ୬୮ ଜଣ ଓ କେନ୍ଦୁଝର ପାଇଁ ଗୋଟିଏ ବସ୍ରେ ବଅଁରପାଳ, ପାଲଲହଡ଼ା, କିଶୋରନଗରରେ ଥିବା ୪୨ ଜଣଙ୍କୁ ପଠାଇ ଦିଆଯାଇଛି। କ୍ୱାରାଣ୍ଟାଇନ୍ରେ ଥିବା ଅନ୍ୟମାନଙ୍କୁ ମଧ୍ୟ ଏପରି ପର୍ଯ୍ୟାୟକ୍ରମେ ସେମାନଙ୍କ ଜିଲାକୁ ପଠାଇ ଦିଆଯିବ ବୋଲି ଜିଲାପାଳ କହିଛନ୍ତି। ଅନୁଗୋଳ ଆଞ୍ଚଳିକ ପରିବହନ ଅଧିକାରୀ ଜିତେନ୍ଦ୍ର କୁମାର ଭୋଇ ଆବଶ୍ୟକ ବସ୍ ବ୍ୟବସ୍ଥା କରିଥିଲେ। ସମସ୍ତ ବସ୍ ଜିଲା କାର୍ଯ୍ୟାଳୟକୁ ଆସିବା ପରେ ଲୋକମାନଙ୍କୁ ନେଇ ସେମାନଙ୍କ ଜିଲାକୁ ଗସ୍ତ କରିଥିବା ପ୍ରଶାସନ ପକ୍ଷରୁ କୁହାଯାଇଛି।
